Мэкъумэш хъыбархэр

Тэрчыр лымкIэ япэщ

2026 гъэм и япэ мазищым къриубыдэу Тэрч щIыналъэм и мэкъумэш IуэхущIапIэхэм лырэ джэдкъазылу къалэжьам (псэууэ шэчауэ) я куэдагъым хуэди 3,5-кIэ хагъэхъуащ е тонн мин 381,1-рэ хъуащ.

 Районым апхуэдэ бжыгъэхэр къезытар джэдкъазылырщ – тонн мин 332-м нэблагъэ (псэууэ шэчауэ).

Апхуэдэуи, ди республикэм лымкIэ хэхъуэ  къыщагъэлъэгъуащ Аруан (процент 15,4-рэ), Прохладнэ (процент 13,3-рэ), Бахъсэн (процент 12,4-рэ) щIыналъэхэм.

Гъатхасэр щIагъэхуабжьэ

Къэбэрдей-Балъкъэрым гъатхасэм щоужьэрэкI. Республикэм и щIыналъэ администрацэхэм АПК-мкIэ я управленэхэм къызэратамкIэ, нобэкIэ жылэхэр хагъэзэгъащ гектар мин 50-м нэблагъэм, абы щыщу гектар мин 22-м нартыхур, гектари 6-м сэхураныр, зы гектарым щIигъум соер.

КъищынэмыщIауэ, губгъуэхэм нобэ жыджэру щыхащIэ джэш хъуреймрэ кIэртIофымрэ. Хьэр (гектар мини I0-м нэблагъэ хухахащ), дагъэ къызыщIаху къэкIыгъэхэр, зэнтхъыр, джэшыр хасакIэщ.

ЗэкIэ зэрытраухуамкIэ, гъатхасэм гектар мин 214-м щIигъу ди республикэм щыхухахынущ мы гъэм.

Зэрыхасэм къыдэкIуэу, мэкъумэш къэкIыгъэхэм, жыг хадэхэм йолэжь, хущхъуэхэр тракIэ, ягъэкъабзэ, хьэпIацIэхэм ахэр щахъумэ.

Губгъуэ лэжьыгъэхэм хуэхьэзырщ

Дзэлыкъуэ щIыналъэм и мэкъумэшыщIэхэм гъатхасэм мы гъэм хухаха гектар 22 207 щыщу нобэкIэ гектар 5990-м жылэхэр трасащ икIи, къэбгъэлъагъуэмэ, нэгъабэ и апхуэдэ лъэхъэнэм яхузэфIэкIам нэхърэ хуэди 2,7-кIэ нэхъыбэщ. Ар псори зи фIыгъэр дунейм и щытыкIэмрэ мэкъумэшыщIэхэр губгъуэ лэжьыгъэхэм хуэхьэзыру гъэм зэрытехьамрэщ.

 НобэкIэ гектар 2925-м нартыху жылапхъэр, гектар 1373-м сэхураныр, гектар 1019-м хьэр тращIащ. Апхуэдэуи, тритикалер гектар 393-м, гуэдзыр гектари 100-м, Iэщым ирагъэшхыну къэкIыгъэ щхъуантIэр гектар 50-м, кIэртIофыр гектар 30-м щыхасащ. ЩIы нэхъ мащIэ зэкIэ зыхухахар зэнтхъырщ – гектари 10.

 Гъатхасэ лэжьыгъэхэр ныкъусаныгъэншэу ирагъэкIуэкIын хуэдэу районым и мэкъумэшыщIэхэр жылапхъэхэмкIи, гъэсыныпхъэхэмкIи, нэгъуэщI зыхуей-зыхуэфIхэмкIи нэсу къызэгъэпэщащ икIи зыхуагъэувыжа пIалъэм тету ахэр зэфIагъэкIын гугъэхэр щыIэщ.

ЩЭУЕЙ Болэ.