УФ-м и Президент Путин Владимир иджыблагъэ правительствэм хэтхэм ядригъэкIуэкIа зэIущIэм къыщыхигъэщащ сабийхэм гъэмахуэм зыщагъэпсэхуну щIыпIэхэр нэхъыбэ щIын зэрыхуейр.
Гъэмахуэ зыгъэпсэхугъуэр КъБР-м зэрыщекIуэкIым Макс-м щиIэ и напэкIуэцIым щытепсэлъыхьащ республикэм и Iэтащхьэ КIуэкIуэ Казбек.
«Ди Президентым къыхигъэщащ мы гъэм Урысейм щылажьэ сабийхэм папщIэ центрхэм цIыху мелуани 5,75-рэ зэрекIуэлIэфынур икIи гъэ къэс а бжыгъэм хэдгъэхъуэну къалэн къытщищIащ, - етх КIуэкIуэ Казбек. - Къэралым и лIыщхьэр тепсэлъыхьащ а Iуэхум епха инфраструктурэм мыхьэнэшхуэ зэриIэми.
«Сабийхэм я узыншагъэр егъэфIэкIуэныр - япэ идгъэщ къалэнщ», - жиIащ Владимир Владимир и къуэм.
Къэбэрдей-Балъкъэрым зыгъэпсэхугъуэ чэзур щIэгъэхуэбжьауэ щокIуэкI. Мы гъэм республикэм и лагерхэм я узыншагъэр щрагъэфIэкIуэнущ сабий мини 10-м щIигъум. Ар гъэмахуэ кIуам елъытауэ, Iыхьэ щанэкIэ нэхъыбэщ.
ЗэхъуэкIыныгъэ нэхъыщхьэу Iуэхум хэтлъхьар зыгъэпсэхугъуэ пIалъэм мылъку нэхъыбэ зэрыхуэдутIыпщарщ: мы гъэм ар сом мелуан 86-м ноблагъэ.
Республикэм и ныбжьыщIэхэм папщIэ лагерь 57-рэ лэжьэнущ, абыхэм ящыщу 15-р жэщ-махуэ зэкIэлъыпытым, 42-р 1 махуэм. Гулъытэ щхьэхуэ хуащI дзэ Iуэху хэхам хэтхэм я бынхэм, сабий куэд зэрыс унагъуэхэм, щытыкIэ гугъум итхэм.
Кавказ Ищхъэрэм Узыншагъэр щызэтрагъэувэжу ит IуэхущIапIэ псоми фIыкIэ къахощ КъБР-м и «Лэгъупыкъу» центрыр. Абы и Iыхьэхэм я зым иджыри цIыху 50 щIэхуэн хуэдэу, ухуэныгъэхэр щрагъэкIуэкI.
«Антарес» центрми и щытыкIэр ирагъэфIакIуэ. Мы гъэмахуэм абы екIуэлIэну Iэмал яIэнущ фIы дыдэу еджэхэмрэ сабий жыджэрхэмрэ.
КъинэмыщIауэ, Херсон областым, Донецк, Луганск лъэпкъ республикэхэм щыщ сабийхэр кърашэлIэнущ, я зыгъэпсэхугъуэ чэзур абы щрахьэкIын хуэдэу.
Гъэмахуэм зыхуей хуэзэу зэрызагъэпсэхум сабийхэм я еджэкIэ хъунури, гъэм и кIыхьагъкIэ яIэну узыншагъэри елъытащ. Дэ дяпэ-кIи дытетынущ къэралым и Президентым дызыхуиунэтIа гъуэгум, хуэмурэ зыгъэпсэхукIэ Iэмалхэр едгъэфIакIуэу икIи къытхузэщIэубыдэ цIыху бжыгъэм хэдгъахъуэу. КъБР-м щыпсэу дэтхэнэ зы сабийми а Iэмал псори зэреттыным дыхущIэкъунущ».
