ПхъэщхьэмыщхьэкIэ дыкъызэрагъэпэщ

КъБР-м и Iэтащхьэ КIуэкIуэ Казбек дыгъуасэ хэтащ Ми­нераль­ные Воды къалэм щекIуэкIа, пхъэщхьэмыщхьэхэмрэ мэра­кIуэхэкIхэмрэ гъэкIыным, ахэр хъумэнымрэ щэнымрэ хуэгъэпса щIэныпхъэхэр утыку къыщрахьа VIII дунейпсо гъэлъэгъуэныгъэм. Абы щыIащ республикэм Мэкъумэш хозяйствэмкIэ и ми­нистерст­вэмрэ жыггъэкI IуэхущIапIэ па­жэхэмрэ я лIыкIуэхэри. Республикэм и унафэщIыр зэхуэсыр зэ­рекIуэкIам щытеп­сэ­лъыхьыжащ Максым щиIэ напэкIуэ­цIым:
«КъБР-м а IэнатIэм пэрыт и IуэхущIапIэхэм я зэфIэкIыр щагъэлъагъуэ абы - жыгыщIэ хасэхэм деж щегъэжьауэ а Iуэхум зегъэужьыным пыщIауэ къагъэсэбэп Iэмэпсымэхэм, Iэмалхэм нэсу.
«PROяблоко 2026» гъэлъэгъуэныгъэм хыхьэ Iуэхугъуэ нэхъыщхьэхэм ящыщт а IэнатIэм зегъэужьыным хуэгъэзауэ щыта урысейпсо зэIущIэр. «Урысейм и хадэхэр 2026» зыфIаща а Iуэхум къыщагъэнэIуащ Урысей Федерацэм ЕрыскъыпхъэмкIэ и шынагъуэншагъэр къызэгъэпэщыным и доктринэм хыхьэ къалэнхэр – пхъэщхьэмыщхьэрэ мэракIуэхэкIхэмкIэ зыкъызэгъэ­пэ­щыжы­ным хуэунэтIауэ Урысейм и Президентым къигъэувахэр.
ЗэIущIэр ирагъэкIуэкIащ Урысей Федерацэм Мэкъумэш хо­зяйст­вэмкIэ и министерствэм и нэIэ щIэту. УФ-м мэкъумэш хозяйствэмкIэ и министр Лут Оксанэ зэхуэсым хэтхэм къахуигъэхьащ абыхэм зэрызакъыхуигъазэ тхыгъэ. 
Абдежым Iуэху гуапи щекIуэкIащ – «Пасэу къызыпыкIэ жыг хадэхэр гъэкIыным и мардэр» къэрал зэпеуэм щытекIуахэр ягъэлъэпIащ.
Ди республикэм къэралым бжьыпэр щиIыгъщ пхъэщхьэ­мыщ­хьэрэ мэракIуэхэкIхэмрэ къехьэлIэнымкIэ. Илъэс кIуам апхуэдэ ерыскъыпхъэу тонн мелуан 1,104-рэ Iуахыжащ, ар Урысейм зэрыщыту къащехъулIам и процент 23-рэ мэхъу. Къэралым и IэнатIэ зэгъэуIуар зэрыщыту къапщтэмэ, КъБР-м абы хуищI хэлъхьэныгъэр нэхъыбэжщ – процент 36-м нос.

Апхуэдэуи ди щIыналъэр къэ­ралым щынэхъыфIитхум ящыщщ илъэс куэдкIэ къызы­пыкIэ пхъэщхьэмыщхьэ-мэра­кIуэ­­хэкIхэм ирагъэубыд щIы­хэм къызэрыхагъахъуэмкIи. Иужь­рей илъэситхум къриу­быдэу абы­­хэм хухахащ гектар мини 6,5-рэ, 2025 гъэм и за­къуэ хасащ пасэу къызыпы­кIэхэм хуэдэу гек­тар мин 1,8-рэ.
А IэнатIэм фIыуэ хащIыкIыу питомник 17 мэлажьэ, илъэс ­кIуам абыхэм щагъэкIащ жы­гы­щIэ цIыкIуу мелуани 4,2-рэ.
 ИкъукIэ мыхьэнэшхуэ иIэщ иджырей хъумапIэхэр зэрытхузэгъэпэщами. Мы зэманым абыхэм зэуэ щIохуэ пхъэщ­хьэмыщхьэ тонн мин 362,7-рэ.
Республикэм жыг хадэхэр гъэкIыным зыщегъэужьыным къэрал дэIэпыкъуныгъэу 2025 гъэм къыIэрыхьащ сом мелард 1,4-рэ. Мы гъэм ар сом мелард 1,5-рэ хъуну дыщогугъ.
ИкъукIэ фIыщIэшхуэ худощI Оксанэ Николай ипхъуми Урысейм Мэкъумэш хозяйствэмкIэ  и министерствэми, Къэбэр-        дей-Балъкъэрым и АПК-м  зэ­пымыууэ щIэгъэкъуэнышхуэ къы­­­­зэ­рыхуэхъухэм папщIэ.
Жыг хадэ гъэкIыным и унэ­тIыныгъэ псомкIи лэжьыгъэхэр щыщIэдгъэхуэбжьэнущ икIи ехъулIэныгъэщIэхэм дыхущIэ­къунущ.
Ди мурадщ пхъэщ­хьэмыщ­хьэрэ мэракIуэхэкIыу къетхьэлIэр 2030 гъэм ирихьэлIэу тонн мелуан 1,2-м нэдгъэсыну икIи тонн мин 700-м зэуэ щIэ­хуэным ди ­хъу­мапIэхэри хузэ­теухуэным», - итхащ КIуэкIуэ Казбек.