Хэкум сыхуолажьэ

«Хэкум и хъумакIуэхэр» къэ­рал фондымрэ «ЩIэныгъэ» урысей зэгухьэныгъэмрэ ирагъэжьащ «Хэкум сыхуолажьэ» урысейпсо акцэр. Ар езыгъэ­кIуэкIыр дзэ Iуэху хэхам и ветеранхэмрэ зэуапIэ губгъуэм щыIэ сэлэтхэмрэщ. Акцэм ­къриубыдэу ирагъэкIуэкI Iуэхугъуэ псори «ЩIалэгъуалэмрэ сабийхэмрэ» лъэпкъ проектым ипкъ иткIэ къызэрагъэпэщ. Абы и мурад нэхъыщхьэр дзэ Iуэху хэхам и ветеранхэр щIалэгъуалэм ирагъэцIыхунырщ, пщIэ хуащIынырщ, езы лIы­хъужьхэри ущииныгъэ, гъэсэ­ныгъэ лэжьыгъэм хэшэнырщ.

- «ЩIэныгъэ» урысей зэгухьэныгъэм и гъусэу мы гъэм илъэс ещанэ хъуауэ къызыдогъэпэщ ветеранхэмрэ ди къэралым щIалэгъуалэу исымрэ зэзышалIэ, зэпызыщIэ проектыр. «Хэкум сыхуолажьэ» Iуэхум Iэмал къет лIыхъужьым къикIуа гъуэ­гуа­нэр, абы и Iуэху еплъыкIэр, и гупсысэкIэр къыдэкIуэтей щIэб­лэм я деж нихьэсыну, гъуэгу пэжым тригъэувэну. Апхуэдэ зэIущIэхэр щIэх-щIэхыурэ екIуэкI­мэ, шэч хэлъкъым жылагъуэм и зэкъуэтыныгъэм и лъабжьэр нэхъ­ри зэригъэбыдэнум, уасэ зимыIэ лъапIэныгъэхэр къытщIэ­хъуэ щIэблэм зэрабгъэдэтлъхьэ­фынум. ЛIыхъужьхэм къаIуэтэж хъыбархэр гурэ псэкIэ щIалэ­гъуалэм зэрызыхащIэр ди нэгу щIокI. А зэIущIэхэр Урысей псом и еджакIуэхэмрэ студентхэмрэ ягу зэрынэсыр, зэрыхуэпабгъэр, я упщIэ куэдым жэуап зэрыща­гъуэтыр, зэпсэлъэныгъэ зэIухам щIэупщIэ зэриIэр долъагъу, - жиIащ УФ-м зыхъумэжыныгъэмкIэ и министрым и къуэдзэ - статс-секретарь, «Хэкум и хъума­кIуэ­хэр» фондым и унафэщI Цивилевэ Аннэ.
Апхуэдэ зэIущIэхэм дзэ Iуэху хэхам щыIахэр щытопсэлъыхь къэ­ралым къулыкъу хуэщIэным и мыхьэнэм, абы и пащхьэ цIыхум щихь жэуаплыныгъэм, СВО-м щыIэхэм къагъэлъагъуэ лIыгъэмрэ хахуагъэмрэ, дзэ, граждан IэнатIэхэм щагъэзащIэ къалэнхэм, абыкIэ зауэ зэфIэкIхэр хуабжьу къызэрысэбэпым. 
ЛIыхъужьхэр дяпэкIэ ныбжьыщIэхэм щаIущIэнущ гъэмахуэ зыгъэпсэхугъуэр щагъакIуэ щIыпIэхэми. 
ЩIалэгъуалэм я хэкупсэ лъапIэныгъэхэр игъэбыдэн мурадкIэ, езым къикIуа гъуэгуанэр и щапхъэу Къэбэрдей-Балъкъэр Республикэм зэIущIэхэр щрегъэкIуэкI СВО-м и ветеран, «ЩIэныгъэ» урысей зэгухьэныгъэм и лектор ПщыхьэщIэ Ахь­мэд. Гумрэ псэмрэ къабгъэдэкI зэпсэлъэныгъэм япэ дакъикъэхэм щегъэжьауэ зыкъыщызэкъуах щIалэхэми. Сыт щхьэкIэ жыпIэмэ, абыхэм яфIэгъэщIэ­гъуэнщ дзэ Iуэху хэхам епха псори. Хэкупсагъэм, нобэ Iэщэ яIыгъыу ди къэралыр зыхъумэхэм, тылым щыIэхэм я дэIэпыкъуныгъэм мыхьэнэшхуэ зэриIэм, «зауэ зэкъуэшыныгъэм» и мыхьэнэм яхутопсэлъыхь Ахьмэд.
2024 гъэ лъандэрэ «Хэкум и ­хъумакIуэхэр» фондым и щIыналъэ къудамэм «ЩIэныгъэ» урысей зэгухьэныгъэм ирищIылIа зэгурыIуэныгъэм ипкъ иткIэ, Къэ­бэрдей-Балъкъэр Республикэм апхуэдэ узэщIыныгъэ зэIущIэу 100-м щIигъу щекIуэкIащ.
«Хэкум ухуэлэжьэныр къалэн къудейкъым, ар дэтхэнэми ди пщэм дэлъ щIыхьымрэ жэуап­лыныгъэмрэщ. Гугъуехь пхыкIа дэтхэнэми ещIэ зи гъащIэ гъуэгур щIэзыдзагъащIэхэм ябгъу­рытыным, ядэIэпыкъуным, унэ­тIыным мыхьэнэшхуэ зэриIэр. Ди хъыбархэмкIэ ныбжьыщIэхэм дащIыдэгуашэр лIыгъэм тедгъэгушхуэн, лъэщагъыр зэкъуэты­ныгъэмрэ Хэкум хуэпэжынымрэ зэрыарар захедгъэщIэн папщIэщ. Ди щIалэгъуалэр Урысейм и къэкIуэнуращ, ахэращ ди пщэдейр зыухуэнур, абы къыхэкIыу, зауэ губгъуэм ди псэ демыблэжу щытхъумэ лъапIэныгъэхэр къагурыдгъэIуэн хуейщ. ЛIыхъужь псоми иращIэ Хэкур хъумэным хуащI хэлъхьэныгъэр зы пщалъэкIи къызэрыпхуэмы­лъытэнур, мамыр гъащIэм щы­псэухэм абыкIэ защIэдгъэкъуэ­-ну дызэрыхьэзырыр», - жиIащ СВО-м и ветеран ПщыхьэщIэ Ахьмэд.
«Хэкум сыхуолажьэ» урысейпсо Iуэхур 2024 гъэ лъандэрэ ирагъэкIуэкI «Хэкум и хъумакIуэхэр» къэрал фондымрэ «ЩIэныгъэ» зэгухьэныгъэмрэ. А зэманым ­къриубыдэу зэIущIэ 1300-м нэблагъэ къызэрагъэпэщащ. Жэрдэмыр даIыгъри, лектор ­къалэныр ягъэзэщIэну гукъы­-дэж ящIащ дзэ операцэ хэхам хэта, «Хэкум и хъумакIуэхэр» фон­дым щылажьэ ветеран ­300-м щIигъу.