Мэкъуауэгъуэм и 20-м «ЩтапIэ ихьэжахэм я махуэр» ягъэлъапIэ. 2026 гъэм къызэрапщытамкIэ, я Хэку имысыжхэм я бжыгъэр цIыху мелуани 116-м ноблагъэ нобэкIэ. Абыхэм ящыщу мелуан 70-р къэрал щхьэхуэхэм я гъунапкъэм имыкIыу Iэпхъуэмэ, адрейхэр хамэ къэралхэм макIуэ.
И унэр ибгынэн папщIэ, цIыхум щхьэусыгъуэ нэхъыщхьэу къыхукъуэкI хабзэр зауэхэрщ. ЩтапIэ ихьэжын папщIэ цIыху зэрыIэпхъукIа къэралхэм нэхъ къахощ Афганистаныр, Венесуэлэр, Сириер, Мьянмэр, Суданыр, Палестинэм хыхьэ Газэ щIыналъэр, Украинэр. 2026 гъэм тещIыхьауэ къапщтэмэ, Сирием иIэпхъукIахэм я бжыгъэр мин 13-м щIегъу, Суданым – мин 12-м, Украинэм – мини 10-м, Афганистаным – мини 9-м, Конгэм – мини 8-м, Венесуэлэм – мини 7-м. ЩIэпхъуэжахэм псэупIэ нэхъ щагъуэтхэм яхохьэ Тыркур, Пакистаныр, Ираныр, Колумбиер, Германиер. Щхьэж нэхъ пэгъунэгъу къэралым мэIэпхъуэ жыпIэми, ущыуэнукъым.
Политикэ псалъалъэм ипкъ иткIэ, «щтапIэ ихьэжа» лIэужьыгъуэм хохьэ езыр щыпсэу къэралыр абы къыщыхъея щытыкIэ гугъум и зэранкIэ нэгъуэщI щIыпIэ Iэпхъуэм ищIэм, ар IэщэкIэ зэпэщIэтыныгъэ, дуней къэхъукъащIэ, къызыхэкIа лъэпкъым е зэрихьэ диным, къыдалъхуа фэм е зыхиубыдэ цIыху гупым елъытауэ зэхэзехуэн ящIа ирехъу. Зи адэ-анэр къедбжэкIахэм я зым хиубыдэу Iэпхъуа щIэблэри «щтапIэ ихьэжахэм» ящыщ мэхъу. Псалъэм папщIэ, ищхьэкIэ къэтхьа бжыгъэхэм я зэхуэдитIыр сабийщ.
Хэхэс хъуным тегушхуэ псори, дауи, щтапIэ ихьэжа защIэу щыткъым. Езыхэм я гукъыдэжкIэ я Iуэху нэхъ щыдэкIыну зыщыгугъ къэралхэм куэд мэIэпхъуэ. Щхьэхуимыту икIахэм ящыщу, зи Хэку зыгъэзэжхэм я бжыгъэр хуэгъэфэщауэ мелуани 5-м нэсынщ, зы илъэсым тещIыхьауэ.
Адыгэм дежкIэ гугъукъым мы псалъэ къызэрыгуэкIым къызэщIиубыдэ мыхьэнэм и инагъымрэ и гущIэгъуншагъымрэ къыгурыIуэну. Тхыдэр къэгъэнауи, дызэрыт зэманми тхегъэщI цIыху бжыгъэшхуэ, щхьэусыгъуэр нэгъуэщIу щытми.
«Кавказ Ищхъэрэм 2030 гъэм ирихьэлIэу цIыху мини 110-рэ хэщIынущ, - етх «Магас хъыбархэр» къыдэкIыгъуэм. – Кавказыр игъащIэ лъандэм цIыху бжыгъэм нэхъ псынщIэу щыхэхъуэ щIыналъэхэм хабжэу къокIуэкI, ауэ зэманыр мащIэу тоIэзэщIыхьыж а еплъыкIэм. КъэпщытакIуэхэр зэрыхуагъэфащэмкIэ, КИФЩI-м куэд дэмыкIыу цIыху мини 112-м нэс иIэпхъукIынущ. Иджыпсту Кавказым цIыху мелуани 10-м нэс ису къапщтэмэ, абы хиубыдэ щIыналъэ псоми цIыхуу къахэхъуэр нэхъ мащIэ хъуащ. ЩIэблэ къызыщIэхъуапхъэ ныбжьым итхэм ящыщу нэхъыбэ зэрыIэпхъукIхэм ящыщщ Къэрэшей-Шэрджэсымрэ Къэбэрдей-Балъкъэрымрэ».
Урысейм и бжыгъэрыбжэ IуэхущIапIэм (Росстат) къызэригъэлъагъуэмкIэ, Кавказым цIыху мин 770,1-рэ къыхэхъуэну, щыпсэухэр мелуани 10,7-м нэсыну ущыгугъ хъунущ 2036 гъэм ирихьэлIэу. Ауэ а бжыгъэм хэщIу, цIыху мелуани 9,8-рэ фIэкIа къэмынэнри Iуэхум хэлъщ.
Тхыдэ тхылъхэм дащыхэджыхькIэ, Хэкур зыфIагъэкIуэдахэм дахуэщыгъуэу, ди хъуреягъкIэ зыщытплъыхьмэ, ар езыхэм я гукъыдэжкIэ зыбгынэхэм я бжыгъэм зэрыхэхъуэр ди нэгу щIокI… Узэгупсыс хъун куэд хэлъщ мы Iуэхум.
