ПщIэ зыхуэсщI ди лъэпкъэгъухэ!
Дунейпсо Адыгэ Хасэм и ГъэзэщIакIуэ гупми сэри къыдбгъэдэкIыу Хэкум къэзыгъэзэжам и махуэмкIэ гуапэу сынывохъуэхъу.
Ди лъэпкъым и тхыдэм мыхьэнэшхуэ зиIэ Iуэхугъуэ 1998 гъэм шыщхьэуIум и 1-м къыщыхъуат: Косовэ щIыналъэм къикIыжа адыгэ гупышхуэ адэжь лъахэм къихьэжащ. Ар къызэрымыкIуэ Iуэхут, ауэ Урысейм диIыгъащ, ди лъэпкъэгъухэр къэшэжынми и гуащIэ хилъхьащ. Абы зыхигъэхъуар ди къэралым и пщIэм и закъуэкъым, абы къызэщIиIэтащ щIыпIэ куэдым щыпсэу адыгэхэр, адэжь лъахэм къэзыгъэзэжыну хуейхэм я хъуэпсапIэхэр къызэщигъэужащ.
Дэ нобэ ди нэгу щIокI Тыркум, Иорданием, Сирием, Израилым, Германием, Америкэм и Штат Зэгуэтхэм щыщ куэдым я унапIэхэр адэжь лъахэм зэрыщызрагъэгъуэтыжыр. Ди щIыналъэм щекIуэкI гъащIэм фызэрыхэсыхьыжыр гуапэ пщымыхъункIэ Iэмал иIэкъым. Экономикэм, щэнхабзэм, щIэныгъэм хуэфщI хэлъхьэныгъэр ди зыужьыныгъэм щIэгъэкъуэнышхуэ хуохъу. Ди цIыхухэм фытщыщу фIэкIа нэгъуэщIу факъыщыхъуркъым, псэукIэщIэм фыхэзэгъэжын, щыIэкIэщIэр къыфтемыхьэлъэн папщIэ, дэIэпыкъуэгъу къыфхуэхъуу яхэтри мащIэкъым. Ар фIыгъуэшхуэщ.
Ауэ къыфщIэхъуэ щIэблэр плъагъуныр зыми хуэдэжкъым. Къэзыгъэзэжахэм я бынхэр курыт еджапIэхэмрэ университетхэмрэ щIэсщ, къызыхэкIа лъэпкъым и хабзэхэр яхъумэ, къэралым и цIыху нэс зэрыхъуным хущIокъу.
Адэжь лъахэм бгъэзэжыныр зэхьэлIар укъыщалъхуа икIи ущыпсэуа щIыпIэр пхъуэжыным и закъуэкъым. Ар лIэужь зыбжанэм я хъуэпсапIэхэр зэгъэхъулIэным, я уэсятхэр гъэзэщIэным теухуащ. Дэ хьэкъыу ди фIэщ мэхъу а хъуэпсапIэхэм ужьых зэрамыIэнур, дяпэкIи Хэкум къихьэжыныр зэрызэпымыунур.
Дэтхэнэ зыми узыншагъэ быдэ, унагъуэ насып, ехъулIэныгъэ фиIэну си гуапэщ. Дунейм адыгэу (шэрджэсу) тетым Урысейм къыхуаIэ пыщIэныгъэхэр нэхъри иребыдэ, лъэпкъхэм я зэкъуэтыныгъэри нэхъри лъэщ ирехъу!
Сынывохъуэхъу махуэщIымкIэ! Фыкъеблэгъэж адэжь лъахэм, дэ сыт щыгъуи дыныфпоплъэ!
Дунейпсо Адыгэ Хасэм и тхьэмадэ
СЭХЪУРОКЪУЭ Хьэутий.
