ЕгъэджакIуэхэм утыкур хуит хуащI

3 августа, 2026 - 11:11

КъБР-м Егъэджэныгъэмрэ щIэныгъэмкIэ и министерствэм хъыбар зэрыдигъащIэмкIэ, фокIадэм и 7-м къыщыщIэдзауэ и 11 пщIондэ Липецк щекIуэкIынущ «Анэдэлъхубзэмрэ литературэмкIэ егъэджакIуэ нэхъыфI» V урысейпсо зэпеуэр. Абы хэтынущ анэдэлъхубзэр щIэблэм яIурылъхьэным зи гъащIэр тезыухуа егъэджакIуэхэр.
Мы гъэм щIыхь зыпылъ а цIэм щIэбэнынущ Урысейм и щIыналъэ 87-м щыщ егъэджакIуи 130-м щIигъу. Къэбэрдей-Балъкъэрым къыбгъэдэкIыу а зэхьэзэхуэм хэтынущ зэпеуэм и щIыналъэ Iыхьэм щытекIуа цIыхуитI: Къэрэгъэш курыт еджапIэ №I-м епха сабий гъэсапIэм и гъэсакIуэ Хъарзынэ Маринэрэ («Сабий гъэсапIэхэм анэдэлъхубзэм зыщегъэужьынымкIэ Iуэху бгъэдыхьэкIэ нэхъыфIхэр» Iыхьэм щытекIуащ) Эльбрус къуажэм и курыт школым балъкъэрыбзэр щезыгъэдж Абдуллаевэ Мадинэрэ. 
Абыхэм къапэщылъщ я Iуэху бгъэдыхьэкIэхэр утыку кърахьэну, дерс зэIухахэмрэ мастер-классхэмрэ, «УзэщIыныгъэ практикум» гъэунэхуныгъэр ирагъэкIуэкIыну.
Зэхьэзэхуэр къызэIуахынущ фокIадэм и 8-м - УФ-м и лъэпкъхэм я бзэхэм я махуэм. ТекIуахэм я цIэхэр фокIадэм и 11-м наIуэ хъунущ.

 

БАГЪЭТЫР Луизэ.
  • 14 просмотров
Поделиться: