Зэхьэзэхуэм щIедзэ

6 августа, 2026 - 12:23
Къэбэрдей-Балъкъэрым щызэхаублэнущ «ЦIыхубэ участковэ-2026» урысейпсо зэпеуэр. 
  Ар хуэгъэпсащ полицэм и лэжьакIуэхэм дзыхь хуащIыным, полицэм и участковэ уполномоченнэхэм я къалэнхэр зыхуэдэмрэ зэфIагъэкIхэмрэ жылагъуэм ягурыгъэIуэным. 
Зэхьэзэхуэр Iыхьищу гуэшащи, япэмрэ етIуанэмрэ районхэмрэ щIыналъэмрэ щызэхэтынущ. 
   Япэ Iыхьэм щытекIуэхэр наIуэ хъунущ онлайн-IэIэтым кърикIуахэмкIэ. Гупыж зиIэ дэтхэнэми къыхихыфынущ  полицэм и участковэ уполномоченнэ цIэр зыхуэфащэу къилъытэр, абы Iэ хуиIэту.
«ЦIыхубэ участковэ» цIэм щIэбэнхэм я лэжьэкIэм  щыгъуазэ защIыфын папщIэ КъБР-м щыIэ МВД-м и сайтым иралъхьэнущ зэпеуэм и япэ Iыхьэм хэт, полицэм и участковэ уполномоченнэхэм ятеухуа хъыбарыр. 
  Зэпеуэм и япэ Iыхьэм и онлайн-IэIэтыр мы гъэм шыщхьэуIум и 11 - 20-хэм екIуэкIынущ. Абы щытекIуахэр наIуэ хъунущ республикэм щыIэ МВД-м и официальнэ сайтым. 
  Полицэм и участковэ уполномоченнэхэу япэ Iыхьэм щытекIуахэр сайтым къралъхьэнущ фокIадэм и 7 пщIондэ  етIуанэ Iыхьэм бжьыпэр щызыубыдыну зыхуэфащэр къыхахын папщIэ.  КIэух Онлайн-IэIэтыр 2026 гъэм фокIадэм и 7 - 16-хэм екIуэкIынущ. 
Зэпеуэм и кIэух Iыхьэм хэтынущ ипэкIэ екIуэкIахэм щытекIуахэм ящыщу дэтхэнэ  щIыналъэми къыбгъэдэкI зы участковэ.
Зыгъэхьэзырар БАХЪСЭН Азэмэтщ
  • 13 просмотров
Поделиться: