ТопджэгумкIэ дунейпсо зэхьэзэхуэм и кIэух зэпеуэр иухакIэщ. Гъэ къэси хуэдэу, утыкушхуэм хьэл зэхуэмыдэ куэд къигъэнэIуащ, гу ялъыптэху, щапхъэ щIатепхын ядэплъагъуу.
Нэхъыбэрэ зи цIэ зэхэтхахэм язщ япэ увыпIэр къэзыхьа Испанием и топджэгу гупым щыщ Ламин Ямал. ГъэщIэгъуэным щIалэм и цIэм деж къыщыщIедзэ. ЗэрыжаIэжымкIэ, сабийр дунейм къыщытехьам, и анэр илъэс 16, и адэр – илъэс 15 хъууэ арат. Хэхъуэ яIэным зыхуэзыгъэхьэзыр зэщхьэгъусэ ныбжьыщIэхэр апхуэдизкIэ тхьэмыщкIэти, щыпсэу фэтэрым и уасэр ирамытыфыну къыщыщIэкIым, Ламинрэ Ямалрэ зи цIэ зэныбжьэгъуитIым ахъшэ хузэхадзауэ жаIэ. ЩIалэ диIэ хъумэ, фи цIэхэр фэтщынущ жаIэу къагъэгугъати, ягъэпэжащ. Зи гугъу тщIы зэхьэзэхуэм хэту зи ныбжьыр илъэс 19 ирикъуа топджэгу цIэрыIуэм и унэцIэр Нэсрауи Эбанэщ. Ауэ Ламиныр и цIэу, Ямалыр и унэцIэ хуэдэу тхыдэм хыхьакIэщ.
Дунейпсо топджэгу зэхьэзэхуэхэр зыгуэркIэ Урысейм щекIуэкI хабзэ, бэнакIуэхэм я зэпеуэм ещхьщ. Утыкум къихьэр лъэпкъ зэмылIэужьыгъуэхэм къыхэкIахэрщ. Апхуэдэщ «француз» цIэрыIуэхэу Зидан Зинедин (и адэ-анэр Алжирым щыщщ), Мбаппе Килиан (и адэ-анэр Камеруным щыщщ), къинэмыщIхэр. Мы дызытепсэлъыхь Ламин и анэшхуэ Нэсрауи ФатIимэщ Мароккэм иIэпхъукIыу, Испанием лэжьакIуэ кIуар, и ныбжьыр илъэс 40 хъууэ. Мароккэрщ зыщыщыр Ламин и адэ Мунир, и анэ Эбанэ Шейлэ – Экватор Гвинеем иIэпхъукIащ. Иджы зэрыжаIэжымкIэ, сабиитху зиIэ ФатIимэ Испанием лъэкIэ щыуву, и бынитхури здишэну арат и мурадыр. Ламин и адэ Мунир Испанием щыIэпхъуам зэрыхъур илъэси 9 къудейт. «Си адэм уэрамым хьэпшыпхэр къыщилъыхъуэу дэтащ, зыгуэр пщэ хъуну къахихыу, ишхын къищэхун щхьэкIэ. Си анэр сэ сыкъыщилъхуам зэрыхъур илъэс I6 къудейт. Мис ахэращ гугъуехьыр. Сэ топ сыджэгуу аркъудейщ, ар икIэри ипэри джэгущ», - жиIэнущ иужькIэ дунейпсо чемпион хъуа щIалэ цIыкIум.
Унагъуэр щыпсэуар Барселонэ и хьэблэ Рокафондэ жыхуаIэрщ, щIыпIэ шынагъуэхэм хабжэу зыгуэрщ ар. Сурэт зытригъэхрэ пэт, Ламин зы лъэныкъуэмкIэ и анэшхуэр, адреймкIэ къэмэх уз зэфыкI и адэр зыбгъуригъэувэу щыплъагъукIэ, щIалэм унагъуэм и мыхьэнэр къызэрыгурыIуэр, фIыщIэ зэрыхэлъыр, нэхъыжь-нэхъыщIэр зэрищIэр IупщI мэхъу.
«Си адэ-анэр сыткIи си щапхъэщ, - жеIэ Ламин. – Топджэгу губгъуэм сыщитым деж, си адэм и хьэлыр нэхъ къэзгъэлъагъуэ къыщIэкIынщ. Абы сыкъикIыжмэ – си анэм срещхьщ. Си сабиигъуэр насыпыфIэ дыдэу щымытами, си адэ-анэм ялъэкI къагъэнакъым псоми срагъэсэн папщIэ. Си адэм къысхуиIэ лъагъуныгъэр зэбгъэпщэфын мы дунейм теткъым. Абы укъызыхэкIар пщыгъупщэ зэрымыхъунум сыхуиущиящ, цIэрыIуэ хъуа нэужь, къызыфIэщIыжа топджэгухэр щапхъэу къысхуихьурэ».
Дунейпсо чемпионатыр иуха нэужь, Ламин Ямал и Iыхьлы псори пщигъэгъупщэу, утыкум къизэрыхьащ абы и къуэш нэхъыщIэ Кейн. «Си къуэш нэхъыщIэм мыхьэнэшхуэ щеубыд си гъащIэм, ар си къуэм хуэдэщ», - жеIэ езым. ЩIалэм къехъуэхъуну топджэгу губгъуэм къихьа Гарсиа Инес Ламин иджыблагъэ къызэришар хъыбар щIэрыпсщ.
Спортыр политикэм и бынщ. Мыпхуэдэ зэхьэзэхуэшхуэхэри къэрал тепщэхэм къагъэсэбэп, щхьэж и Iуэху зехьэкIэр дигъэкIын папщIэ. ГущIэгъу зыхэлъ политикэ зэрыригъэкIуэкIымкIэ Европэм щыщ адрей къэралхэм къахэщ Испанием и премьер-министр Санчес Педрэ США-ри и гъунэгъу къэралхэри къигъэуIэбжьауэ щытащ, Ираным феуэн папщIэ, Испаниер къэвгъэсэбэпу фхуэддэнукъым жиIэу. Апхуэдэ дыдэу хахуэу Санчес къыщхьэщыжауэ щытащ Палестинэм и ныпыр зыIэта Ламин Ямал. «Дэтхэнэ фирхьэунми езым и Муса иIэжщ», - кIэщIатхащ а сурэтым леишхуэ къызытехьэ хьэрып къэралым къыдэщIхэм.
Зэрытлъагъущи, топ фIыуэ уджэгуным и мыхьэнэр ар ныкъуэкъуэгъум и гъуэм дэпхуфыным деж щиухыркъым. Абы къыуит пщIэмкIэ цIыхубэ гъащIэм фIыкIэ ухэIэбэфу щытын хуейщ. Армыхъумэ, уи лъакъуитIым топ дэзыхуф Iэмэпсымэ къазэрыхэпщIыкIыфым цIэрыIуэ уищIыркъым.
Псалъэ зыбжанэ хуэфащэщ мы чемпионатым «Бутсэ дыщэ» тыгъэр зыхуагъэфэща, Франджым и топджэгу гупым я капитан Мбаппе Килиан. Психологхэм нэгъунэ гу лъатащ Килиан и псэм и къарум. Парагвайм щыдэджэгум, абы и зэфIэкIыр ялъэхъэн, езыр и пIэ кърашын папщIэ, зэреIунщIамрэ зэрыжьэхэуамрэ, ягъэбэлэрыгъыну зэрыхэтамрэ кино щхьэхуэу урикъунщ. Ауэ иджы Франджым и гуп къыхэхам и тренеру ягъэувыжа Зидан Зинедин и щхьэ кърикIуар ищIэж къыщIэкIынти, Мбаппе тэмакъкIыхьагъ хурикъуащ, и къарур ихъумэжу, и гупыр тригъэкIуэну. Дэ тлъагъур текIуэныгъэ утыкуращ. Ауэ щыхъукIэ, хэхэс лъэпкъхэм къатехъукIа мы щIалэхэр егъэлея гугъу ирагъэхь. «Япэ увыпIэр къызэрыдмыхьам щхьэкIэ, номинкIэ къызэджэу, си деж къэпсэлъар пхуэбжынкъым», - щыжиIэжащ интервьюхэм я зым Мбаппе.
ЕмыкIу дыдэу франджы топджэгум къыхуэпсэлъащ Парагвайм щыщ сенатор Амарилье Селестэ. КIэух джэгум и Iыхьэ 1\8-м Парагвайр 1:0-у щыхэнам, голыр дэзыхуар Мбаппет. «Емышу франджыфэ зытезыгъэуэну хэт, Камеруным щыщ шимпанзе», - къыхужиIащ абы Мбаппе. ЩIалэм и жэуапми зиIэжьакъым. ЦIыхубзым жиIар зэрыемыкIур, ар Парагвайм я еплъыкIэу зэрыщымытыр къыхигъэщу, Мбаппе дуней псом зэхригъэхащ лъэпкърэ фэкIэ зэхэгъэж ищIыныр абы зэрыхуимыдэнур. Губзыгъэхэр кIуэдыжатэкъыми, ООН-ри, ФИФА-ри, езы Парагвайм и сенатри щIалэм къыщхьэщыжащ, сенатор цIыхубзри ягъэкъуэншащ. Зиухеижын папщIэ, иужькIэ Мбаппе хуитха «письмо зэIухам» гулъытэ щIагъуэ игъуэтакъым, и напэр зытрихыжати.
И гугъу дымыщIу дыблэкIыфынукъым игъащIэм зи цIэ зэхэдмыха Кабо-Верде къэралым и топджэгухэм я гъуащхьэтет Возинье. И цIэ дыдэр Жозе Эвора Диаш Жозимару къыщIокI. И адэ-анэр зэрыхущIэмыхьэм къыхэкIыу, адэшхуэ-анэшхуэм япIа Жозимар и жагъуэ къащIмэ, «мамэхуэ» деж гъыуэ зэрыкIуэжым щхьэкIэ, «нанэ», «нанэ и къуэ» цIэ лейуэ къыкIэрыпщIауэ къэхъуащ, езым ар илъагъу мыхъурэ зыкIэридзыну Iэмал имыгъуэту. Илъэс 40-м ит гъуащхьэхъумэр электрикщ, автобусыр кърихуэкIыу жаIэ. Ауэ щыхъукIэ, топджэгу дунейр зыгъэгулэз Месси Лионель бгъуэнейрэ и гъум къытригъэпсарэ пэт, Возинье IэщIэкIар зы топ закъуэщ.
Мис апхуэдэ цIыхухэм гу ялъыдигъэтащ топджэгу зэхьэзэхуэшхуэм. Псом нэхърэ нэхъыщхьэращи, спортыр щыIэу, цIыхухэр IэщэкIэ щIызэпэщIэувэн щхьэусыгъуэ къыкъуэкIын зэрыхуэмейр иджыри зэ къыдигъэщIэжащ.
