Гъуэгухэм я фIагъми елъытащ

10 августа, 2026 - 13:37
«Ифраструктура жизни» лъэпкъ проектым хыхьэу, Къэбэрдей-Балъкъэрым и Старэ Шэрэдж – Жэмтхьэлэ – Сукан-Суу автомобиль зекIуапIэр иджырей мардэхэм къитIасэу зэгъэпэщыжыным ехьэлIа лэжьыгъэхэм я иужьрей Iыхьэри и кIэм нагъэсащ. АтIэми, гъуэгум а и пакIэм къуажэхэу Псыгуэнсурэ Старэ Шэрэджрэ зэпещIэ. 
Ар зэрагъэпэщыж иджырей мардэхэм къигъэтIасэу. Лэжьыгъэхэр 2019 гъэ лъандэрэ  йокIуэкI. 
Гъуэгум зэрагъэзэхуэжа и иужьрей Iыхьэм километри 5,3-рэ и кIыхьагъщ. ИращIылIа Iуэхугъуэхэм хыхьэу, абдежым асфальт-бетон «уэншэкущIэ» тралъхьащ, къыхыхьэ-уIузыш гъуэгу бгъунжхэм я щIэдзапIэхэр мыдрейм къыпащIащ. 
  Шынагъуэншагъэм тетынри гулъытэ щхьэхуэ зыхуащIахэм ящыщщ. А гупсысэм техуэу, гъуэгум хутыкъуауэ укъытезымыгъэхьэ бжыхьхэр нэхъ зыхуэныкъуэхэм деж IуащIыхьащ, и Iуфэхэр дэнэкIи зэрыщытыпхъэу ягъэбыдащ, зэрыгъуазэ нагъыщэхэр щIыпIэ-щIыпIэкIэрэ щагъэуващ, асфальт гущIыIум дамыгъэхэр традзащ. А псори зыхуэгъэзэжар зыщ: гъуэгум щызэрихьэлIэ машини лъэсырыкIуи шынагъуэншэу щызэблэкIынырщ.
Хуагъэува пщалъэхэмрэ тхылъымпIэм иратхамрэ хуэкIуэрэ техуэу автомобиль зекIуапIэр зэрызэрагъэпэщыжар IэщIагъэлIхэм къапщытащ абы папщIэ къагъэщхьэпэ IэмэпсымэхэмкIэ. Нэхъыбэу зэхагъэкIар асфальт тебзэм и быдагъымрэ ар захуэу зэрытралъхьамрэщ, и Iуфэхэм арэзы укъызэращIри абы хэтыжу.    
«Къуажэхэмрэ къалэхэмрэ зэпызыщIэ гъуэгухэр нэхъри нэхъыфI щыхъукIэ, абыхэм дэсхэм я щыIэкIэ-псэукIэри а Iуэхуми зэрыригъэфIакIуэм шэч хэлъкъым. Аращ, сызэреплъымкIэ, ди лэжьыгъэм и мыхьэнэр зыIэту, и джэлэс нэхъыщхьэу къэлъытапхъэри», - игъэбелджылащ зи гугъу тщIы автомобиль зекIуапIэр зэзыгъэзэхуэжахэм я унафэщI Абрэдж Iэюб.
АтIэми, лъэпкъ проектхэм япкъ иткIэ, дызытепсэлъыхьа гъуэгум лэжьыгъэхэр зэрыщызэфIагъэкIари и зы Iыхьэщ республикэм щыпсэухэм я гъащIэр нэхъри езыгъэфIакIуэхэм.    
БЭРАУ Бышэ.
  • 23 просмотра
Поделиться:

Читать также:

11.09.2026 - 18:17 → ЩIы Iыхьэхэр ират
11.09.2026 - 16:15 → Унагъуэхэм зыщIагъакъуэ
11.09.2026 - 15:25 → Бзэ куэд зыщIэхэр
11.09.2026 - 15:14 → Гектар мини 6,7-м щIигъу
11.09.2026 - 14:13 → Лъэпкъыбзэхэм я махуэм ирихьэлIэу