Амирлан и медалыр

УФ-м и еджакIуэхэм дзюдомкIэ я 13-нэ Гъэмахуэ спартакиадэм и кIэух зэхьэзэхуэ Армавир къалэм иджыблагъэ щекIуэкIащ. Абы щызэпеуащ ди къэралым и щIыналъэхэм ящыщу 44-м я спортсмену, щIалэхэри хъыджэбзхэри зэхэту, 137-рэ. Зэхьэзэхуэм щагъэджэгуащ медаль комплекту 16 - щIалэхэм щхьэкIэ 9-рэ, хъыджэбзхэм щхьэкIэ 7-рэ.

Къэбэрдей-Балъкъэрым и щIыхьыр иIэту зэпеуэм хэтащ УФ-м спортымкIэ и мастер Унэж Амирлан икIи и хьэлъагъ елъытауэ щыбэна гупым (кг 50) домбеякъ медаль къыщихьащ.

Ди щIалэм япэщIыкIэ хигъэщIащ Краснодар крайм и бэнакIуэ Аваков Саркис. Абы иужь Амирлан къыпэщIэтащ Пензэ областым щыщ Куркаев Ильдар. Мыбдежми ди республикэм и лIыкIуэр щынэхъ лъэщащ. КъыкIэлъыкIуэ зэIущIэр Унэжым дригъэкIуэкIащ Челябинск областым и дзюдоист Протасов Тимофей икIи щIалитIым я зэхьэзэхуэм хухаха зэманыр зэрытемыгъакIуэу и кIэм нагъэсри, абы къыдыщIагъужын хуей хъуащ, нэхъ лъэщыр зэхагъэкIын папщIэ.

Ди жагъуэ зэрыхъущи, Амирлан Протасовыр мызыгъуэгукIэ къытекIуащ икIи ар финал цIыкIум ягъэкIуащ домбеякъ медалым щIэбэныну. Абдежым ди щIалэм къыщыпэщIэта Каплев Дмитрий Унэжым хигъэщIащ.

Амирлан дэлажьэр УФ-м щIыхь зиIэ и тренер Джэданэ Залымщ.

Къыхэдгъэщынщи, еджакIуэхэм я 13-нэ Гъэмахуэ спартакиадэу мы гъэм Урысей Федерацэм щекIуэкIым спорт лIэужьыгъуэу 51-рэ къызэщIеубыдэ, мэкъуауэгъуэм щегъэжьауэ фокIадэм и кIэм нэсыху зэхьэзэхуэхэр зэхэтынущ. Абыхэм хэтынущ ди къэралым и щIыналъэ 89-м я спортсмену мин 13-м щIигъу.

МЭРШЭН Батыр.