Къэбэрдей-Балъкъэрым футболымкIэ и гъэмахуэ зэхьэзэхуэм бжьыпэр щызыIыгъ «Тэрчымрэ» «Логоваз»-мрэ зи чэзу текIуэныгъэхэр джэгугъуэ блэкIам щызыIэрагъэхьащ. А тIур зэкIэ зэдобакъуэ икIи хэт япэу къэдзыхэнуми укIэлъыплъыну хьэлэмэтщ.
Езыхэр зэрызэдэджэгуам къарикIуамрэ (1:0, 2:2) топ дагъэкIахэмрэ къыхудагъэкIахэмрэ зэрызэхущытымкIэ хэпщIыкIыу бабугентдэсхэм ефIэкI «Тэрчым» и Iуэхухэр нэхъыфIыж ищIащ Псыкуэд къикIахэм щаIущIам. Джэгур 8:1-уэ иухащ.
«Логоваз»-м абы пигъэувыфар 5:1-щ. Апхуэдэу ар Щхьэлыкъуэ щытекIуащ.
Дыщэмрэ дыжьынымрэ щIэбэнынухэр зэхэкIа хуэдэми, ещанэ увыпIэр зылъысынур хуэбгъэфэщэну гугъущ. Абы иджыпсту нэхъ пэгъунэгъу «Малка»-ми, «Ислъэмейми», «Спартак-Д»-ми блэкIа джэгугъуэм очко щырыщ зыIэрагъэхьащ. Япэр Шэджэм щытекIуащ, етIуанэр нэгъабэрей чемпионым ефIэкIащ, ещанэм губгъуэм къимыхьэхыу и Iуэхур зэфIэкIащ и хьэрхуэрэгъур Яныкъуей къызэримыкIам къыхэкIыу. Абыхэм япэмыжыжьэ «Урыхуми» зиIэтыну гугъэр къыхуэнащ, Аргудан и «Бедик»-р бжыгъэшхуэкIэ зэрыхигъэщIам и фIыгъэкIэ.
Гъуащхьауэхэм я зэпеуэм бжьыпэр зэрыщиIыгъщ Мокаев Таулан. «Логоваз»-м иригъэкIуэкIа иужь зэIущIэхэм ар къыщыхэмыжаныкIыфами, мы гъэм дигъэкIа топ 21-м пашэныгъэр IэщIигъэкIыркъым. Абы кIэщIу къыкIэлъокIуэ «Малка»-м щыджэгу Умар Азэмэт.
АдэкIэ щыгъуазэ фыхуэтщIынщ Къэбэрдей-Балъкъэрым футболымкIэ 2026 гъэм и гъэмахуэ зэхьэзэхуэм и зи чэзу джэгугъуэм кърикIуа . Мис ахэр: «Черкес» (Шэджэм) - «Малка» (Малкэ) - 0:3, «Тэрч» (Тэрч) - «Псыкуэд-Марвил» (Псыкуэд) – 8:1, «Урыху» (Урыху) – «Бедик» (Аргудан) - 4:1, «Спартак-Д» (Налшык) - «Яникой-1961» (Яныкъуей) - 3:0 (зэрымыкIуам къыхэкIыу), «Ислъэмей» (Ислъэмей) - «Искра» (Алътуд) – 6:0, «7 Вершин-Шалушка» (Щхьэлыкъуэ) – «Логоваз» (Бабугент) - 1:5.
ДызыхуэкIуэ щэбэтымрэ тхьэмахуэмрэ зэхэтынущ къыкIэлъыкIуэ джэгугъуэр. А махуэхэм зэIущIэн хуейщ: шыщхьэуIум и 15-м - «Псыкуэд-Марвил» - «7 Вершин-Шалушка»; шыщхьэуIум и 16-м – «Урыху» - «Черкес», «Бедик» - «Тэрч», «Логоваз» - «Ислъэмей», «Яникой-1961» - «Малка» командэхэр.
