СурэтыщI гъуазджэмкIэ музейм, Ткаченкэ Андрей и цIэр зезыхьэм, мы махуэхэм щагъэлъагъуэ «С мольбертом к вершине Эльбруса» зыфIаща гъэлъэгъуэныгъэ гъэщIэгъуэн. Ар къызэрагъэпэщащ «Время молодых XXI» зэгухьэныгъэмрэ «Мира» творческэ центрымрэ (и унафэщIыр Берберашвили Юрэщ), КъБР-м и Правительствэр, ЩэнхабзэмкIэ и министерствэр, Iуащхьэмахуэ район администрацэр я дэIэпыкъуэгъуу. Iуэхур зытраухуар совет спортсмен цIэрыIуэ, инженер Берберашвили Алексей мотоциклым тесу Iуащхьэмахуэ зэрыдэкIрэ илъэс 60 зэрырикъурщ.
- Гуапэщ гъэлъэгъуэныгъэр Урысейм и лъэпкъхэм я зэкъуэтыныгъэм и илъэсым зэрекIуэкIыр икIи дыщогугъ ди къэралым и щIыналъэ зэмылIэужьыгъуэхэм къикIа сурэтыщI ныбжьыщIэхэм я гум ди республикэр гуапэу къинэну, - жиIащ зэIущIэр къызэIузыхыу езыгъэкIуэкIа, музейм и унафэщI Ремхен Еленэ.
IуэхущIапIэм и пэшищри яуфэбгъуащ ди къэралым и еджапIэ нэхъыщхьэхэм, колледжхэм, художественнэ школхэм щеджэ студентхэм, ахэр къэзыухагъащIэ щIалэхэмрэ хъыджэбзхэмрэ я IэдакъэщIэкI лэжьыгъэхэм. Псоми итлъагъуэр Iуащхьэмахуэщ, ауэ хэти нэщхъейщ, хэти нэжэгужэщ, зым къуршым щизакъуэщ, адрейм цIыху е псэущхьэ итщи, Iуащхьэмахуэ псэ зэрыхэтым и щыхьэт пэлъытэщ. ЖыпIэнурамэ, цIыхуу дунейм тетыр зэрызэмыщхьым, сурэтыщIу хъуам дэтхэнэми и лэжьэкIэрэ и гупсысэ къэгъэлъэгъуэкIэрэ зэриIэжым дыхагъэгъуазэми ярейщ. Уафэр къащхъуэщ, щIылъэр щхъуантIэщ, цIыху къызэрыгуэкI здынэмысыну уи гугъэ Iуащхьэма-хуэ и щыгур Iэгум илъым хуэдэщ. Дызэрыщыгъуазэщи, и щыгум ихьэф цIыхухэри мащIэкъым.
IуэхущIапIэ куэдым я студентхэм я лэжьыгъэ хэтщ гъэлъэгъуэныгъэм. Псалъэм папщIэ, Герасимовым и цIэр зезыхьэ ВГИК-м, Акварелымрэ гъуазджэ къызэрымыкIуэмкIэ Андрияки Сергей и академием, Глазунов Илья и цIэкIэ щыIэ РАЖВиЗ-м, Суриков В. И. и цIэр зезыхьэ МГАХИ-м, Пащты Герман и лъэщапIэу КъБКъУ-м щылажьэм, ГъуазджэхэмкIэ сабий школ №2 Къэзанокъуэ Жэбагъы и цIэр зезыхьэм, Кавказ Ищхъэрэм ГъуазджэхэмкIэ и институтым Щэнхабзэмрэ гъуазджэмкIэ и колледжым, нэгъуэщIхэми я еджакIуэхэр. Убгъэдыхьамэ, уакъыбгъэдэмыкIыжыфу апхуэдэщ лэжьыгъэхэр, апхуэдизкIэ нэIурыту, нэри пэри пIэпихыу гъэзэщIа хъуахэщи. Зыгуэрым ищIар къыхэбгъэщхьэхукIыну гугъу дыдэщ, дэтхэнэри цIыхупсэм нэс бзэ щхьэхуэкIэ къопсалъэри.
ХьэщIэхэм фIэхъус псалъэкIэ захуигъэзащ ди республикэм щэнхабзэмкIэ и министрым и къуэдзэ Мизиев Iэбубэчыр.
- Лэжьыгъэ тIощI нэхъыбэ яхуэщIагъэнкъым апхуэдэ зэман кIэщIым къриубыдэу, жысIэу сегупсысырти, пэшищми щIэхуэр зэрыщIэтыр си гуапэ хъуащ. ФIыгъуэшхуэр къывэуэлIэну сыхуейщ ди щIыналъэм фыкъызэрыкIуам, фызэрыщыIам, мыпхуэдэ Iуэху дахэкIэ дызэрызэхэвгъэплъэжам папщIэ, - жиIащ абы икIи зи лIыкIуэ министерствэм къыбгъэдэкI фIыщIэ тхылъхэмкIэ яхуэупсащ хьэщIэхэм.
УФ-м и цIыхубэ сурэтыщI, ХудожествэхэмкIэ Урысей академием хэт, профессор Пащты Герман псалъэ щратым къыхигъэщащ, и адэ къуэш Пащты Iэмдул Берберашвили Алексей и гъусэу мотоциклкIэ Iуащхьэмахуэ зэрыдэкIар. Игу къигъэкIыжащ «Советский Союз» журналым и IуплъапIэм абы и сурэтышхуэ къытрадзауэ зэрыщытари зэрищIэжыр.
- Ар щIыжысIэращи, щIалэгъуалэр нэхъыжьхэм я лъэмбым иувэу, тегушхуауэ мэбакъуэ. Хэти ирехъу ар - график, живописец, скульптор е нэгъуэщI унэтIыныгъэр къыхэзыха - псори зыхуэлажьэр дахагъэрщ, гухэхъуэрщ, дэрэжэгъуэрщ, Iэзагъэрщ, - жиIащ Герман.
КъБР-м и СурэтыщIхэм я зэгухьэныгъэм и унафэщI Къаныкъуэ Жаннэ къыщыпсалъэм къыхигъэщащ мыпхуэдэ дахагъэ ди республикэм «къызэрыщалъхур», ди щIыналъэр зыфIэгъэщIэгъуэну къыхуеблэгъахэм гухэхъуэгъуэ зэрагъуэтар зэригуапэр.
ЗэIущIэр къигъэсэбэпу, къызэхуэсахэм географым и махуэмкIэ ехъуэхъуащ Урыс географие зэгухьэныгъэм и щIыналъэ къудамэм и гуащэ, Къэбэрдей-Балъкъэрым ЩIэныгъэмрэ егъэджэныгъэмкIэ и министерствэм «Сабийхэмрэ ныбжьыщIэхэмрэ я уардэунэ» и IуэхущIапIэм и унафэщI КIэрашэ Аксанэ. «Наталье, Юрэ, адрей хьэщIэхэри щызэдгъэцIыхуар дыгъуасэщи, хьэкъ тщыхъуащ куэдым дызэрызэришалIэр, IэджэкIэ дызэрызэпыщIар. Ди къэралым щыпсэу дэтхэнэм и дежкIи Iуащхьэмахуэ Къэбэрдей-Балъкъэрым и дамыгъэ нэхъ лъапIэ дыдэщ. Ауэ, гъэщIэгъуэнракъэ, псоми ар зэралъагъур зэмылIэужьыгъуэущ. Географхэм гу зылъатэр зыщ, сурэтыщIхэм ялъагъур нэгъуэщIщ», - жиIащ Аксанэ.
Iуэхур зи нэIэм щIэту екIуэкI Костецкая Наталье дызэрыщигъэгъуэзащи, сурэтыщI ныбжьыщIэхэр Къэбэрдей-Балъкъэрым щызэхуишэсыну, зэрылажьэ Iэмэпсымэхэр яIыгъыу Iуащхьэмахуэ кIуэуэ, абы къарит гухэхъуэгъуэмрэ гукъыдэжымрэ я лъабжьэу сурэтхэр щаригъэщIыну, а IэдакъэщIэкIхэм я гъэлъэгъуэныгъэ Налшык къыщызэригъэпэщыжыну и мурадт. А гукъэкIыр къыщежьар 2024 гъэрщ, илъэситI дэкIауэ ар нахуэ хъуащи, икъукIэ щогуфIыкI бзылъхугъэр. ФIыщIэ ин яхуищIащ Iуэхур къадэзыIыгъа IуэхущIапIэхэми цIыху щхьэхуэхэми икIи СурэтыщI гъуазджэмкIэ музеймрэ ЩэнхабзэмкIэ министерствэмрэ сурэт зырыз тыгъэ яхуищIащ. Абы жиIащ куэд мыщIэу Москва къыщызэIуахыну я гугъэ гъэлъэгъуэныгъэм утыку къыщрахьэн папщIэ, Налшык и IуэхущIапIищу зи студентхэр выставкэм хэтахэм я IэдакъэщIэкI зыбжанэ ди къэралым и къалащхьэм зэрыздишэнур.
«Мира» творческэ центрым и унафэщI, Берберашвили Алексей и къуэ Юрэ къыхигъэщащ и адэм и фэеплъым хуащI пщIэр абы и дежкIэ зэрыуасэншэр. ИкIи ЩэнхабзэмкIэ министерствэм тыгъэ хуищIащ спортсмен цIэрыIуэр зытеса мотоциклым и теплъэр, и фэр зиIэ IэфIыкIэ IэрыщIыр.
ЗэIущIэр «Эльбрус-красавец» (псалъэхэр Семёнов Исмэхьил ейщ), «Еду в город Нальчик» (пс. Юлдашев Исмэхьил) хэкупсэ уэрэдхэмкIэ ягъэдэхащ «Укулеле» ансамблым хэт уэрэджыIакIуэ бзылъхугъэхэм. Къызэхуэсахэр дихьэхауэ абыхэм ядежьурт, гъэлъэгъуэныгъэми концерт цIыкIуми гуфIэгъуэрэ дэрэжэгъуэрэ къызэрыратам я щыхьэту.
