Артур еджапIэр къызэрыхихар

2023 гъэм ди республикэм и тхы­дэм щыяпэу Зыуэ Щыт Къэрал экзамен­хэм инджылызыбзэмкIэ ЕГЭ-м балли 100 къыщихьауэ щытащ Сэхъурокъуэ Артур. Ар нобэ КъБКъУ-м ПравэмкIэ, экономикэмрэ финансхэмкIэ и инс­титутым и студентщ.

Артур Налшык къыщалъхуащ икIи къыщыхъуащ. И адэмрэ анэмри, адэш­хуэхэмрэ анэшхуэхэмри щеджар ди ­университетращ. ЗэрыцIыкIурэ ахэр щапхъэ хуэхъуу къэхъуащ Артур.
«Си адэ-анэхэр сыт щыгъуи хуейт лъэ­ныкъуэ псомкIи зызужьыну, щIэныгъэ­хэмрэ творчествэмрэ я мызакъуэу, спортми, псом хуэмыдэу боксымрэ псы есынымрэ зыхуэзгъэсэну», - игу къегъэкIыж Артур.
ЩIалэм курыт школыр «тху» защIэкIэ къиухащ, олимпиадэхэм жыджэру хэтащ, зэпеуэхэм, уеблэмэ театр гъэ­лъэгъуэныгъэхэм и зэфIэкIхэр щигъэунэхуащ. Класс нэхъыжьхэм нэса нэужь, физико-математикэ унэтIыныгъэращ къыхихар, ауэ гуманитар щIэ­ныгъэхэми хуэгущIыIэтэкъым.
- Сэ фIыуэ слъагъуу щыта предметхэр, шэч хэмылъу, математикэмрэ ­инджылызыбзэмрэщ. Школ егъэджа­кIуэхэм нэмыщI, репетиторхэмкIи хуабжьу си кIэн къикIащ, дисциплинэ зэ­мылIэужьыгъуэхэр нэхъ куууэ зджащ. СфIэфIт унэтIыныгъэ зэхуэмыдэхэмкIэ си къэухьым зезгъэужьыну, - жеIэ студентым.
Школ программэм къыдэкIуэу, Артур Яндексым и Академием и лицейуэ ­КъБР-м щыIэм щиджащ программи­рованиемрэ франджыбзэмрэ.
ЕГЭ-м Артур гугъэ хэхахэр хуиIэу нэсащ: урысыбзэр иджыри 10-нэ клас­-сым щIэсу итащ, къыщиух илъэсым про­фильнэ предметхэр къыхуигъанэ­-ри. КърикIуам щыгуфIыкIыжащ: ин­джы­лызыбзэмкIэ балли 100, урысыбзэмкIэ - 96-рэ, математикэмкIэ - 80 къихьащ. 
А балл лъагэхэм Артур къыхузэIуа­-хащ къэралым и еджапIэ нэхъыфI ­зыбжанэм я бжэхэр: ар бюджет мардэм тету щIэхуащ КъБКъУ-м, Плеханов Г. В. и цIэр зезыхьэ РЭУ-м, РАНХиГС-м, УФ-м и Правительствэмрэ НИУ ВШЭ-мрэ я Финанс университетым. Абыхэм уа­хэ­дэныр тыншу щытакъым щIалэщIэм дежкIэ.
- Сыщеджэныр къыхэсхыныр гугъут, дауи, шэч хэмылъу, сыхэгупсысыхьат. ЕплъыкIэ зэмылIэужьыгъуэ куэд зэхэсхащ, ауэ сэ нэхъ спэгъунэгъур зыхэс­щIэн хуейт. Лъэныкъуэ псори зэпэс­лъытри, къызгурыIуащ: КъБКъУ-р си дежкIэ хэкIыпIэфIт. Си Iыхьлыхэм сапэмыIэщIэу, сыщалъхуа къалэм дэту, ди щэнхабзэр, хабзэр нэхъ куууэ зэз­гъащIэу, сызэреджэм хуэдэурэ, спортым, мыхьэнэшхуэ зиIэ нэгъуэщI Iуэху­хэм иужь ситыну Iэмал къызитырт абы», - къыддогуашэ Артур. 
Университетым зэрыщеджа илъэсищым къриубыдэу Артур щIэныгъэ ­зэпеуэ куэдым хэтащ, лэжьыгъэм, еджэ­ным и пIалъэр фIыуэ зригъэщIащ. Нобэ абы и IэдакъэщIэкIхэр щIэны­гъэ журналхэм къытрадзэ, КъБКъУ-ми, ­нэгъуэщI къалэхэми щекIуэкI кон­ференцхэмрэ олимпиадэхэмрэ хэтщ. 2025 гъэм Сэхъурокъуэр «Хьэрычэты­-щIэ цIэрыIуэхэм я щIэин» урысейпсо ­зэпеуэм и финалым кIуащ икIи етIуа­нэ увыпIэр къыщихьащ. Абы «Видеоин­тервью» унэтIыныгъэм щигъэлъэгъуат ди университетым и щыIэкIэ-псэукIэр. 
«Апхуэдэ Iуэхугъуэхэр сэбэп мэхъу уи къэухьым зебгъэубгъунымкIэ, уи зэ­фIэкIхэм хэбгъэхъуэнымкIэ. Къищы­нэмыщIауэ, ар Iэмал хъарзынэщ уи ­гуа­щIэри, ущеджэ университетыр зыхуэдэри урысейпсо утыкум щыбгъэлъэгъуэнымкIэ», - къыхегъэщ Ар­-тур.
Иджыпсту зэреджэм хуэдэурэ щолажьэ КъБКъУ-м щеджэхэм стипен­диальнэ программэхэмрэ мылъкукIэ защIэгъэкъуэнымкIэ я центрым. «Гуп­-ри езы лэжьыгъэри сигу ирохь, сыщо­гугъ сыщеджэ университетым сэбэп сы­хуэхъуфыну. Къэзухмэ, си IэщIагъэмкIэ сылэжьэну си мурадщ икIи нэгъуэщI программэхэмкIэ еджэным пысщэн­кIи хъунущ», - къыддогуашэ и мурадхэмкIэ студентыр.
Студент гъащIэм Артур жыджэру хэтщ. Абы зэрыжиIэмкIэ, КъБКъУ-м щыIэ зэгухьэныгъэхэмрэ клубхэмрэ ухэтмэ, Iэмал уиIэщ уи гур зыщIэхъуэпс лъэныкъуэр къыхэпхыну, ныбжьэгъу куэд зэбгъэгъуэтыну. 
Артур и къуэш нэхъыщIэ Альберти и гъащIэр КъБКъУ-м ирипхыну мурад ищIащ: ар биологиемкIэ олимпиадэм и республикэ Iыхьэм щытекIуащ икIи ЕГЭ-м кърикIуахэм япкъ иткIэ, балл 300 къихьащ, щхьэзакъуэ ехъулIэ­ныгъэхэр къэлъытауэ. Апхуэдэ бжыгъэм, фызэрыщыгъуазэщи, абиту­риентым къэралым и сыт хуэдэ еджапIэ нэхъыщхьэми и бжэхэр къыхузэIуех, арщхьэкIэ Альберт и къуэш нэхъыжьым и гъуэгъур гъуазэ хуэхъури, Къэбэр­дей-Балъкъэр къэрал университетыр къы­хихащ.