Илъэс етIуанэ хъуауэ цIыкIуи ини мэтхьэджэ Палестинэм, Газэм щекIуэкI лъэпкъгъэкIуэдым щхьэкIэ. Мы къэрал цIыкIум хуитыныгъэ етын зэрыхуейм къыхураджэу, артистхэр, тхакIуэхэр, топджэгухэр, бэнакIуэхэр, тренерхэр, сабийхэр, балигъхэр увыIэгъуэ ямыIэу утыку къохьэ.
КъБР-м и Правительствэм иджыблагъэ къигъэнэIуащ Курортхэмрэ туризмэмкIэ министерствэм и фонд гъэтIылъам щыщу Палестинэм щекIуэкI гузэвэгъуэм кърагъэлын папщIэ ди республикэм къашахэм иджыри сом мелуани 3,2-рэ зэрыхуаутIыпщынур.
Махуэ къэс зи бжыгъэм хэщI цIыхубэ хейм папщIэ зи макъ зыгъэIухэр зэрымымащIэм хуэдэу, щытыкIэм зэрызимыхъуэжми укъегъэуIэбжь. Зыми шэч къытрихьэжыркъым а мафIэшхуэр къызыщIэзыгъэстар Израилым и премьер-министр Нетаньяху Беньямину зэрыщытым.
ООН-м и Зэхуэс нэхъыщхьэм и 81-нэ зэIущIэр фокIадэм Нью-Йорк щекIуэкIынущ. Абы и гугъу ищIкIэрэ, Нью-Йорк и къалэтет Мамдани Зохран «Нью-Йорк таймс» газетым и корреспондент Гарсиа-Наваррэ Лулу ирита интервьюм щыжиIащ: «Нетаньяху Беньямин зауэ щIэпхъаджащIэщ. Аращ жэуап зыхьыр Палестинэм щыщу яукIа цIыху мин 73-м щхьэкIэ. Абыхэм яхэтщ сабий мин пщIы бжыгъэхэр, я Iэпкълъэпкъым щыщ Iыхьэхэр узыр ящхьэщызыхын хущхъуэ ямыIэу зыфIэкIуэдахэр, ныкъуэдыкъуэу къэнахэр, лагъым къагъауэхэм икIуэдыкIыпахэр. Ардыдэр къащыщIащ абдежым щекIуэкIыр къагъэнэIуэну хэта журналистхэм, лей зытехьэхэм гъуэмылэрэ зыхуэныкъуэ тIэкIумрэ хуашэну хуит ямыщIу яукIа волонтёрхэм. МафIэр къагъэувыIэну зэрызэгурыIуам хуэдэу, иужьрей мазэм палестинэдэсхэр зэтраукIэн щагъэтакъым. Сэ сыщIэупщIащ, Нетаньяху Нью-Йорк къакIуэ хъумэ, дгъэтIысыну дыхуитрэ дыхуимытрэ. Апхуэдэ хуитыныгъэ димыIэу къыщIэкIащ, ауэ къэралым и хабзэхъумэ IуэхущIапIэр къыхузоджэ Дунейпсо хейщIапIэм и унафэр игъэзэщIэну (зи гугъу ищIыр Нетаньяху ягъэтIысын хуейуэ унафэ зыщIа, Гаагэ щыIэ МУС хейщIапIэрщ – Ч. М.). ИкIи къыхызогъэщ Нью-Йорк дэсхэм Нетаньяху ялъагъуным я нэ къызэрыхуимыкIыр».
«Сэ Нью-Йорк сыкIуэнущ», - жэуапыншэу къигъэнакъым Нетаньяху къалэтет щIалэм и псалъэхэр, дунейм ехыжа сенатор Грэм Линдси щыщIалъхьэ махуэм Вашингтон зэрыкIуамкIэ лIыгъэшхуэ къигъэлъагъуэ хуэдэу. Мамдани зэрымуслъымэныр башым фIиIури, «абы и еплъыкIэр Нью-Йорк дэс псоми я гупсысэм техуэркъым, сэ къалэм щыпсэу журтхэм сепсэлъати…» жиIэурэ, зэрымытым Iэтищэ кърихащ. Шэрыуэу абы пэджэжа гуэрми зэрыжиIащи: «ЦIыху мин 73-рэ езыгъэукIар «Мамдани цIыхухэр зэфIегъанэ» жеIэри, мамырыгъэм топсэлъыхь».
И макъыр игъэIуащ Лондон и къалэтет Хъан Садикъи: «ХъыбарыфIыр сыт жыпIэмэ, Нетаньяху Лондон къэкIуэн мурад зэримыIэрщ. КъакIуэмэ, цIыхубэм я ней зэрыщыхуам и щыхьэт хъунущ. ЛъэпкъгъэкIуэд езыгъэкIуэкI цIыхухэр фIыуэ щалъагъуркъым Лондон. ЗыгуэркIэ Нетаньяху ди къалэм къиунэтIмэ, сэ сыхьэзырщ ди премьер-министрым ар зэригъэтIысыну щIыкIэм теухуауэ сыдэлэжьэну».
Палестинэм къыщхьэщыжахэм ящыщщ Дагъыстэным щыщ бэнакIуэ Нурмагомедов Хьэбиб. Америкэм щита интервьюхэм я зым инджылызыбзэм шэрыуэу ирипсалъэ спортсменым щыжиIауэ щытащ: «Дунейм щыщ цIыху куэдым Газэм щекIуэкIыр зауэу къащохъу. ЗауэкIэ дэ дызэджэр Iэщэ зыIыгъ зы армэр адрей армэм щыпэщIэувэм дежщ. Мыбдежым щекIуэкIыр нэгъуэщIщ. Манхэттен нэхърэ мынэхъ ин, цIыху мелуани 2,5-рэ зэрыс щIыналъэм и гъунапкъэр ягъэбыдауэ, абдежым ираубыда цIыху къызэрыгуэкIхэр ираукIыхь. Фи нэгу къыщIэвгъэхьэт сэ уэрамым сыдыхьэу, игъащIэм мыбэна гуэрым сезауэу, абы ещхьщ ар. ЩIыпIэр къахухьауэ, лагъымкIэ зэтраукIэ. Яшхын ерыскъы, псы къудей лъамыгъэIэсу. Муслъымэну ущытын хуейкъым Палестинэм укъыщхьэщыжын папщIэ, цIыхуу ущытмэ, ирикъунущ. Ар къагурыIуэн хуейщ. Мыр зауэкъым, лъэпкъгъэкIуэдщ. ЦIыху меларди 8-м я пащхьэм щрагъэкIуэкI лъэпкъгъэкIуэд».
