Политикэмрэ туризмэмрэ
Ди республикэм щыяпэу, шыщхьэуIум и 21 - 23-хэм щекIуэкIащ «Ди Кавказ» зыфIаща зэхуэсышхуэр.
Туризмэм пыщIауэ, абыкIэ къызэщIрагъэубыдащ къуршылъэ гъуэгуанэ быркъуэшыркъуэхэм зи лъащIэр лъагэу Iэта машинэ лъэрызехьэхэмкIэ къызэрыщакIухьар, Налшык къалэ щыIэ Абхъазым и утыкум къыщызэрагъэпэща гъэлъэгъуэныгъэ зэмылIэужьыгъуэхэр, абдеж дыдэм Къэбэрдей-Балъкъэрым и къэфакIуэхэмрэ уэрэджыIакIуэхэмрэ зэхаша концертышхуэр, щIыналъэм и IэпэIэсэхэмрэ цIыху IэпщIэлъапщIэхэмрэ къыщызэIуаха гъэсапIэ цIыкIухэр, ныбжьыщIэхэмрэ сабийхэмрэ папщIэ щызэхаубла джэгукIэ удэзыхьэххэр.
Урысей Федерацэм и щIыналъэ зыбжанэм, Къыргъызымрэ Беларусымрэ щыщхэри яхэту, къикIа хьэщIэхэмрэ щIыпIэрысхэмрэ зэзышэлIэжа мы фестивалыр КъБР-м и къалащхьэ Налшыкрэ ди псыежэх нэхъ инхэм ящыщ Шэрэдж и ныджащхьэхэмрэ, зэрыжытIащи, махуищкIэ щекIуэкIащ, Iуэхугъуэ зэмылIэужьыгъуэу къыщызэрагъэпэщахэм теплъэ удэзыхьэххэр щратауэ.
Япэ махуитIым гъуэгу тэмэм къыщумыгъуэт къуакIэбгыкIэхэмкIэ автомобиль нэхъ лъэщхэмкIэ къыщызыкIухьын зыфIэфIхэмрэ нэхъ гугъужхэм техьэн зи щIасэхэмрэ гъуэгуанэ хьэлъэхэм зэдытетащ.
Бгым ихьахэм нэмыщI, фестивалым, дауи, къекIуэлIащ Абхъазым и утыкум зэпэхъурейуэ къыщызэIуаха жармыкIэ абрагъуэр къыщызэIузыхахэри, ныбжьыщIэхэмрэ сабийхэмрэ папщIэ джэгукIэ зэмылIэужьыгъуэхэр щезыгъэкIуэкIахэри, концерт программэ гъэщIэгъуэнхэр щызэхэзышахэри, арыххэу зи нэгу зыщезыгъэужьыну а щIыпIэм Iухьахэри.
УщымыгуфIыкIынкIэ Iэмал зимыIэт фестивалым и етIуанэ пщыхьэщхьэм къыщегъэжьауэ жэщыку хъуху, «мыбы къемыкIуэлIа къалэм дэтыжу пIэрэ?» хужыпIэну, Абхъазым и утыкум цIыху Iув зэрыщыпэкIуар.
Къызэрыхэдгъэщауэ, УФ-м и къэрал ныпым и махуэм ирырагъэхьэлIа мы гуфIэгъуэ зэхыхьэхэм я япэ Iыхьэр шыщхьэуIум и 21-м сыхьэт 12-м Налшык дэт Абхъазым и утыкум къыщызэIуахат. А махуэм къыкIэлъыкIуаитIри хэту, хьэщIэхэмрэ щIыпIэрысхэмрэ абдежым щалъэгъуащ икIи щыгъуазэ зыщыхуащIащ щызекIуэгъуей бгылъэ щIыпIэхэм къыщыжыхьыным траухуа машинэ лъэрызехьэу къэралым и щIыналъэ зэмылIэужьыгъуэхэм кърашахэмрэ щIыпIэ къуейщIейхэр къызэнэкIыным хуэщIа техникэшхуэхэмрэ.
Апхуэдэу, абдеж щагъэлъэгъуащ икIи щащащ туризмэм и унэтIыныгъэу гъуэгуанэ жыжьэм хуэгъэзам къыщагъэсэбэп Iэмэпсымэ щхьэхуэхэри, къекIуэлIахэм гукъинэж ящыхъуа, махуищыр зыгъэдэха хьэпшып цIыкIухэри.
Къалащхьэм а и утыкушхуэм, махуищым къриубыдэу, республикэм и артист цIэрыIуэхэм уэрэд щыжаIащ, гъуазджэм и лэжьакIуэхэм зыкъыщагъэлъэгъуащ, къэфакIуэ гуп щхьэхуэхэм хэтхэм я лъэгу щыщIагъэплъащ, цIыхубэ IэпщIэлъапщIагъэм ехьэлIа Iэмэпсымэхэм дапхъэхэр щагъэбжьыфIащ, бгылъэ щIыпIэхэм лъагъуэ зэхуэмыдэхэмкIэ къызэрыщакIухьыным хуагъэпса дерсхэм къызэхуэсахэр щIагъэдэIуащ.
Район муниципалитетхэм къыщызэрагъэпэща плIанэпэхэм ди республикэм ис лъэпкъхэм я шхыныгъуэ зэмылIэужьыгъуэхэр зэрыщапщэфIами зэхыхьэр нэхъри игъэдэхащ.
ЗекIуэм хэтахэм я ехъулIэныгъэ нэхъыщхьэу къабжар автомобилхэмкIэ зэлъэбгъэIэс хъуну къуршылъэ щхьэдэхыпIэу Урысей Федерацэм щыIэхэм я нэхъ лъагэм ехьэлIауэ рекордыщIэ зэрыщагъэуварщ - Балъкъэр Ипщэ жылэр зыдэс къуэм зыщхьэщаIэтыкIыу, бгылъэ джабэ нэкIухэмкIэ къыдэкIыу, Безенги къуажэр здэщыIэмкIэ яунэтIу, а тIум я зэхуаку дэт Чегет-Джарэ щхьэдэхыпIэм (метр 3147-рэ и лъагагъщ) зэман нэхъ кIэщIым къитIасэу зэрынэсарщ икIи абдеж дыдэм УФ-м метри 150-рэ зи бгъуагъ и къэрал ныпыр зэрыщаукъуэдиярщ.
А Iуэхум кърикIуауэ къабжащ къэралым и бгылъэ щIыпIэхэм къурш тхыцIэ щхьэдэхыпIэу щыIэхэм ящыщу я нэхъ лъагэм машинэ лъэрызехьэхэмкIэ зэрамыгугъауэ псынщIэу зэрынэсар рекордыщIэу къэлъытапхъэу. Гъуэгу зэдытетахэм а я зэфIэкIыр и тхылъым изытхар абы и редактор нэхъыщхьэ Коненкэ Станиславщ.
УФ-м и щIыналъэхэм ящыщу 20-м къикIа машини 100-м щIигъур зыщхьэщыхута щхьэдэхыпIэм деж зекIуэм хэтахэм а Iуэхур къазэрехъулIам щыхьэт техъуэ сертификатхэр щратащ, лъэпкъ шхыныгъуэхэмкIи щызэIурагъэуащ.
Зэхыхьэшхуэм и иужьрей махуэм, шыщхьэуIум и 23-м, фестивалым къекIуалIэу абы къыщызэрагъэпэща зэпеуэ зэмылIэужьыгъуэхэм щытекIуахэм щIыхь тхылъхэр иратащ, тыгъэ цIыкIухэмкIэ щегуэпащ.
Абхъазым и утыкум иужьрей махуэм къыщызэхуэсахэм фIыщIэ псалъэкIэ захуигъэзащ КъБР-м курортхэмрэ туризмэмкIэ и министр Быф Аскэр.
- Дэ къызэрытлъытэмкIэ, дызыщыщ къэралыр, дыщалъхуа щIыналъэр фIыуэ тлъагъун зэрыхуейм и мызакъуэу, махуищкIэ екIуэкIа мы зэхыхьэм псом я нэхъыщхьэжу дэ къыдигъэщIар Къэбэрдей-Балъкъэрыр зищIысыр нэгъэсауэ зыхэтщIэн папщIэ, и зы дэтхэнэ къуэгъэнапIэми къыщыткIухьын зэрыхуейрщ. «Ди Кавказ» зыфIэтща мы зэхуэсышхуэр а Iуэхум зэрыхуэлэжьари нэрылъагъущ. Апхуэдэуи дэ шэч къытетхьэркъым, ди республикэм щыщуи нэгъуэщI щIыпIэ къикIахэуи, фестивалым хэта, зи нэгу зыщезыгъэужьа дэтхэнэми, ар къалэдэс ирехъу, къуажэдэс ирехъу, щилъэгъуа-щызыхищIар и гум IэфIу къызэринэжынуми, - жиIащ министрым.
Зэхуэсышхуэр къызэгъэпэщыным, екIуу егъэкIуэкIыным зи гуащIэ нэхъыбэу хэзылъхьар Къэбэрдей-Балъкъэрым Курортхэмрэ туризмэмкIэ и министерствэрщ. А IуэхумкIэ абы зыщIагъэкъуащ КъБР-м и Правительствэмрэ щIыпIэ муниципалитетхэм я унафэщIхэмрэ.
ЗэхэшакIуэхэм щхьэхуэу фIыщIэ хуащIащ республикэм и Iэтащхьэ КIуэкIуэ Казбек, бгылъэ къуейщIейхэм машинэ лъэрызехьэхэмкIэ къыщыкIухьынымкIэ ди щIыналъэм щыяпэ фестивалыр къыхэзылъхьахэм зэрадиIыгъам папщIэ.
