Къасболэт екIуу утыку къокIыж

28 августа, 2026 - 10:30

Тхэквондо

«Кубок Президента ВТ - Азия» фIэщыгъэр зэрихьэу Пакистаным и Лахор къалэм щекIуэкIащ Олимп джэгухэм хыхьэ тхэквондомкIэ (ВТФ) дунейпсо зэхьэзэхуэ. Абы щызэпеуащ къэрал 20-м щIигъум я спортсмену, щIалэхэри хъыджэбзхэри зэхэту, 600-м щIигъу. 
Зэхьэзэхуэм пашэныгъэр къыщыхьыным тхэквондистхэр зэрыщIэбэнам къыдэкIуэу, Лахор щагъэджэгуащ 2028 гъэм США-м и Лос-Анджелес къалэм щекIуэкIыну олимпиадэм ягъэкIуэнухэр къызэрыхах рейтинг очкохэри. 
Ди гуапэ зэрыхъущи, УФ-м и командэ къыхэхам хэту Пакистаным щыIащ Къэбэрдей-Балъкъэрым и «Пять колец» спорт академием и гъэсэн Къэзанш Къасболэт икIи килограмм 68-рэ зи хьэлъагъхэм я деж ещанэ увыпIэр къыщихьащ, абы къыдэкIуэуи, рейтинг очкохэр щызыIэригъэхьащ. Финалым и Iыхьэ ныкъуэм ди щIалэм къефIэкIащ Узбекистаным и спортсмен Ахмедов Шохиджон. 
Къасболэт зэхьэзэхуэм хуагъэхьэзыращ УФ-м щIыхь зиIэ и тренер Ахъмэт Амиррэ Унэжокъуэ Абдельджэбаррэ. 

ЖЫЛЭХЬЭЖ Артур.
  • 20 просмотров
Поделиться: