«Пашэхэм я зэщIэхъееныгъэр» мы гъэм еплIанэу яхэтащ «Мэшыкъуэ» XVII Урысейпсо щIалэгъуалэ форумыр къызэзыгъэпэщхэм. Абы хэтхэр илъэс къэс щIалэгъуалэм щыхуозэ Псыхуабэ бгы лъапэм деж щыт Комсомольскэ хуейм.
«Пашэхэм» езыхэм я утыку щаIащ форумым икIи пIалъитIми купщIафIэу щылэжьащ. Шэтыр Iэхуитлъэхуитхэм лэжьыгъэр щекIуэкIын, зыщагъэпсэхун щIыпIэ зэIузэпэщхэр щаухуат. «Пашэхэм я гъусэу къызэIух» арт-объектым скетчбукхэр щIынымкIэ, матрешкэхэм сурэт тещIыхьынымкIэ мастер-классхэр ирагъэкIуэкIырт, япэ дэIэпыкъуныгъэр зэрырат щIыкIэхэри къекIуалIэхэм ирагъащIэрт.
Махуэхэм форумым хэтхэр щызэрыцIыхурт ирагъэкIуэкI нетворкингым, пщыхьэщхьэхэм зэщIэхъееныгъэм и щIыпIэр акъыл зэпеуэхэм, джэгукIэхэм, макъамэ викторинэхэм я центр, ныбжьэгъу щызэхуэхъу утыку хъурт.
- Къэралым ущииныгъэ, гъэсэныгъэ институт лъэрызехьэ щызэтеублэнымкIэ лэжьыгъэшхуэ езыгъэкIуэкI «Пашэхэм я зэщIэхъееныгъэр» «Мэшыкъуэ» урысейпсо щIалэгъуалэ форумым мы гъэм япэу хэлэжьыхьу аракъым. Ди дежкIэ ар Iэмал телъыджэщ лIакъуитIыр - егъэджакIуэ Iэзэхэр, вожатэхэр, езы щIалэгъуалэр - зэдгъэуIунымкIэ, зэдэдгъэлэжьэнымкIэ. А лъэныкъуэмкIэ жэуаплыныгъэ ин я пщэ далъхьэжу, ныбжьэгъухэм яхэтщ зэгухьэныгъэм щыщхэр. Мы гъэм пIалъэхэм я программэхэр зыхуэунэтIауэ щытар къызэхуэсахэм я зэфIэкIхэм зегъэужьыным и закъуэкъым, атIэ щIэныгъэмрэ Iэзагъымрэ хэзыгъэхъуэн IэмалыщIэхэр къэгупсысынырщ. Адрей гъэхэм зэдгъэгъуэта Iуэху бгъэдыхьэкIэм Iэмал къыдет лэжьыгъэр нэхъ купщIафIэу зэтедухуэну, балигъхэмрэ ныбжьыщIэхэмрэ я еплъыкIэхэр зэуIу тщIыуэ программэхэр зэхэтлъхьэну. Мыхьэнэшхуэ иIэщ форумым и кIэухым практикэ къэхутэныгъэ нэхъыфIу I2 нэхърэ мынэхъ мащIэ Урысей псом зэрыщызэбграхынум, ныбжьыщIэхэм къыхалъхьа жэрдэмхэр 2030 гъэ пщIондэ къэралым щекIуэкIыну гъэсэныгъэ лэжьыгъэм лъабжьэ зэрыхуэхъунум, - къыхигъэщащ Урысейм и ЛIыхъужь, «ЛIыхъужьхэм я зэман» президент программэмкIэ еджа, къэзыуха, «Пашэхэм я зэщIэхъееныгъэм» и Правленэм и унафэщI Орлов Артур.
ЗэщIэхъееныгъэр унэтIыныгъитIкIэ щылэжьащ зэхуэсышхуэм - «ГъэсакIуэхэр», «Пашэхэр ущииныгъэ лэжьыгъэм зэрыхэтыр».
«ГъэсакIуэхэр» унэтIыныгъэм зэкъуигъэуващ зэщIэхъееныгъэм и гъэсакIуэ-ущиякIуэу I00. А лэжьыгъэм и лъабжьэ сабийхэмрэ ныбжьыщIэхэмрэ зэрадэлажьэ щIыкIэхэр егъэфIэкIуэнырщ, Урысейм и лъэпкъхэм я зэкъуэтыныгъэм и илъэсым «Пашэхэм» къыхалъхьэ лъапIэныгъэхэмрэ мыхьэнэшхуэ зиIэ Iуэхухэмрэ тещIыхьа джэгукIэхэр, тренингхэр, мастер-классхэр зэхэлъхьэнырщ. Сменэм и кIэух махуэм хьэзыр хъуа лэжьыгъэхэр «Пашэхэм я зэщIэхъееныгъэм» и аппаратым и лIыкIуэхэм я пащхьэ ирахьащ.
«Пашэхэр ущииныгъэ лэжьыгъэм зэрыхэтыр» унэтIыныгъэм щылэжьащ а Iуэхум фIыуэ хэзыщIыкI, зи ныбжьыр илъэс I4-м къыщыщIэдзауэ I7-м нэс щIалэгъуалэу I00. Абыхэми купщIэ иIэу утыку кърахьа Iуэху бгъэдыхьэкIэхэр хагъэхьэнущ 2030 гъэ пщIондэ къэралым щекIуэкIыну гъэсэныгъэ лэжьыгъэм теухуа программэм.
Фигу къэдгъэкIыжынщи, «Мэшыкъуэ» форумыр зи ныбжьыр илъэс I4-м къыщыщIэдзауэ 35-м нэс хъу, къэрал псом щыщ IэщIагъэлI ныбжьыщIэхэмрэ жылагъуэ зэгухьэныгъэхэм я лIыкIуэхэмрэ щызэхуэс утыку телъыджэщ. Форумым хабзэ телъыджэрэ тхыдэ къулейрэ иIэщ, абы къищынэмыщIауэ, иджырей инновацэ технологиехэмрэ щеджэ, щылажьэ, зыщагъэпсэху щIыпIэхэмрэ екIуу къыщызэрагъэпэщ, абы щыгъуэми щIыуэпсымрэ экологиемрэ зыкIи зэран хуэмыхъуу.
Ар ящыщщ «Росмолодежь.Форумхэр» урысейпсо зэхыхьэу ЩIалэгъуалэм я IуэхухэмкIэ федеральнэ агентствэм (Росмолодежь) къызэригъэпэщхэм, Платформэм къызэщIиубыдэ егъэджэныгъэ программэхэм нэмыщI, къэралым къыщызэрагъэпэщ щIалэгъуалэ зэхуэсышхуэхэри хохьэ.
«Мэшыкъуэ» щIэныгъэ центрыр егъэджэныгъэм, щIалэгъуалэ политикэм, гъэсэныгъэ лэжьыгъэм епха унафэщIхэр щагъэхьэзыр урысейпсо егъэджэныгъэ IуэхущIапIэщ. Ар къызэIухыным теухуа жэрдэмыр 20I8 гъэм ядиIыгъауэ щытащ Урысейм и Президент Путин Владимир. А зэхыхьэр къызэрызэIуахрэ ныбжьыщIэ 60 000-м щIигъу щыIакIэщ.
Къалэн куэд щагъэзащIэ «Мэшыкъуэ» щIалэгъуалэ хэкупсэ центрыр иджырей егъэджэныгъэ щекIуэкI утыкущ, щIэблэм псэкупсэ-гъэсэныгъэ, дзэ-хэкупсагъэ хэлъхьэным хуэгъэза лэжьыгъэшхуи щокIуэкI.
