Дохутыр IэщIагъэм уехъулIэу упэрытын папщIэ Iэзагъышхуэрэ щIэныгъэшхуэрэ убгъэдэлъын, къищынэмыщIауэ, сыт щыгъуи абыхэм хэбгъэхъуэн хуейщ. Апхуэдэуи гущIэгъу, гуапагъэ пхэлъу, цIыхум сытым дежи уи дэIэпыкъуныгъэ зэрылъыбгъэсыным ухуэхьэзыру щытыпхъэщ. А псор къагурыIуэу дохутыр IэщIагъэм хуеджэныр къыхахащ Дыгулыбгъуей къуажэм щыщ пщащэхэу БжыкIший Даянэрэ Къаныкъуэ Алинэрэ. И къуажэгъу хъыджэбзхэм ятетхыхьащ Къэбэрдей Адыгэ Хасэм и тхьэмадэм и дэIэпыкъуэгъу Хъыжьрокъуэ Азэмэт.
IэщIагъэм куууэ зыхегъэгъуазэ
Дэтхэнэ зы цIыхуми и гъащIэм хэтщ адэкIэ и гъуэгур зыубзыху Iуэхугъуэхэр. БжыкIший Даянэ и гъащIэ гъуэгур зыхуэдэнур щызэхэкIар IэщIагъэкIэ и хъуэпсапIэр къыщынэхуамрэ ар зэрызригъэхъулIэным и къару псори зэрырихьэлIэнум зэрыхущIэкъунур къыщыгурыIуамрэщ.
Даянэ къиухащ Къардэн Б.М. и цIэр зезыхьэ курыт школ №10-р. А илъэсхэм абы зыкъигъэлъэгъуащ зыпэрыхьэ Iуэхур егугъуу зыфIэзых, зи мурадхэр ерыщу зызыгъэхъулIэф еджакIуэу. Пасэу дохутыр IэщIагъэм щIэхъуэпсын щIэзыдза хъыджэбзыр школ нэужьым зыщIэтIысхьэнум егупсысын хуей хъуакъым. Абы къыхихащ Къэбэрдей-Балъкъэр къэрал университетым медицинэмкIэ и къудамэм Стоматологиемрэ жьэпкъ-напэпкъ хирургиемкIэ и институтыр. БжыкIшийм гукIи псэкIи къыхиха IэщIагъэм куууэ зыхегъэгъуазэ, еджэным ехъулIэныгъэфIхэр къыщигъэлъагъуэу. Зыхуеджэ Iуэхум и пIалъэ нэхъыфIу къищIэнымкIэ абы сэбэпышхуэ къыхуохъу Налшык къалэ стоматологие поликлиникэм щрихьэкI лэжьыгъэри. Даянэ къызэрилъытэмкIэ, IэщIагъэм и щэху псори къищIэнымкIэ зригъэгъуэта щIэныгъэр лэжьыгъэм къыщигъэсэбэпыну Iэмал зэриIэр икъукIэ къыхуощхьэпэ.
БжыкIшийм и лэжьэгъухэмрэ унэтIакIуэхэмрэ къыхагъэщ хъыджэбзым жэуаплыныгъэ зэрыхэлъыр, IэщIагъэм и лъабжьэр куууэ къызэрыгурыIуэр, мыхьэнэшхуэ зиIэращи, дэтхэнэ сымаджэми хуиIэ гуапагъэмрэ набдзэгубдзаплъагъэмрэ, абыхэм бгъэдыхьэкIэ къахуигъуэтыфу зэрыщытыр. Шэч зыхэмылъыжращи, апхуэдэ бгъэдыхьэкIэр зи лэжьыгъэр фIыуэ зылъагъу IэщIагъэлIым зыпэрыт Iуэхум щиIэну ехъулIэныгъэхэм я шэсыпIэщ.
Ерыщу и мурадым хуокIуэ
Къаныкъуэ Алинэ и лъабжьэр къыщежьэм, и унагъуэм, и хэку цIыкIум къуэпс быдэкIэ пыщIа, абы кърит къарум и фIыгъэкIэ гушхуэныгъэ хэлъу ехъулIэныгъэщIэхэм тегушхуэ щIалэгъуалэм я щапхъэщ.
Пщащэр щеджащ КIуэкIуэ В. М. и цIэр зезыхьэ курыт школ №8-м. ЕджапIэр дыщэ медалкIэ къэзыуха хъыджэбзым сыт хуэдэ IэщIагъэри зэрызригъэгъуэтыфын щIэныгъэ бгъэдэлът. Зыуэ щыт къэрал экзаменхэм баллыфI дыдэхэр къыщызыхьа Къаныкъуэр Москва и еджапIэ нэхъыщхьэхэм ящыщ зым щIэхуат. Куэдым я дежкIэ ар я хъуэпсапIэхэм хуэзышэ Iэмал хъарзынэт – къыхэпха IэщIагъэмкIэ уи зэфIэкIым хэбгъэхъуэнымкIэ бжэ куэд къыпхузэIузыхт къэралым и къалащхьэм щIэныгъэ щызэбгъэгъуэтыныр. АрщхьэкIэ Алинэ гукIи псэкIи фIыуэ илъагъу и щIыналъэм къинэжмэ, адэ-анэм я гъусэмэ нэхъ къищтащ. ЩIыпIэ мыцIыхум къыщыпэплъэр зэримыщIэм къригъэкIуэтауэ аракъым хъыджэбзыр, атIэ унагъуэ зэпыщIэныгъэхэм мыхьэнэшхуэ зэрыритым, и хэку цIыкIур фIыуэ зэрилъагъум къыхэкIыу къыхихауэ аращ. ЗыхапIыкIа жылагъуэм и Iыхьэу къэнэжыныр нэхъ къищтащ хъыджэбзым икIи зы махуи хущIегъуэжакъым и Iуэхур къызэрекIуэкIам.
Нобэ пщащэ цIыкIур Къэбэрдей-Балъкъэр къэрал университетым и медицинэ къудамэм и студентщ. И хъуэпсапIэр дохутыр хъууэ, и дэIэпыкъуныгъэ хуэныкъуэхэм яхуэщхьэпэнрати, ерыщу и мурадым хуокIуэ. Еджэным зэфIэкI хъарзынэхэр къыщегъэлъагъуэ, къыпэщыт къалэн псоми фIы дыдэу полъэщ. IэщIагъэр фIэфIу къызэрыхихам, абы хуэIэзэ хъуну зэрыщIэхъуэпсым, жэуаплыныгъэшхуэ зэрыхэлъым къыхэкIыу медицинэм и программэ гугъур зэгъэщIэныр абы тыншу къохъулIэ.
Къаныкъуэ Алинэ медицинэм щыпхиш лъагъуэр иришэжьа къудейщ. Апхуэдэ щIэдзапIэ зиIэм къэкIуэну дахэкIи узыщегъэгугъ.
