ЦIыхухэр зэрызэмыщхьым дэтхэнэ зыми гъащIэм япэ щригъэщыр къыхрегъэх. Бын зи куэдым мылъкур фIэнэхъапэщ, мылъку зи куэдым абы пщIэ къыхущIэкIыну хуейщ. Зэщхь дызыщIыр псори дызэрыпсэумрэ дызэрылIэжынумрэщ.
«ЦIыхухэр лIэужьыгъуищу зэхедз: губзыгъэхэр, ныкъуэделэхэр, делэ дыдэхэр. Губзыгъэм и къарур дунеягъэми ахърэтми ятрегъэкIуадэ. Ныкъуэделэр е дунеягъэм, е ахърэтым фIэкIа телажьэркъым. Делэ дыдэм а тIури къыфIэмыIуэхуу, и щхьэр трегъэу» - мы жыIэгъуэ цIэрыIуэр щыпщыгъупщэ махуэ къыпхуимыхуэмэ, нэхъыфIщ.
А жыIэгъуэ шэрыуэр поджэж ипэрей къыдэкIыгъуэм зи гугъу щытщIа Гъэзэлий Iэбу Хьэмид и «Хьэл мыхъумыщIэхэр» тхылъым. «Мылъкур хущхъуи щхъухьи зыхэлъ блэм ещхьщ, - жеIэ щIэныгъэлIым. - Абы зэраныгъэуи фIыгъуэуи къыхуихьыфынум щыгъуазэм и Iейм зыщихъумэнурэ, и фIыр зыIэригъэхьэнущ». «Быдагъэр, нэпсеягъэр, цIыхухэм пщIэ зыхуегъэщIын нэрыгъыр зэрымыщIагъуэм теухуауэ» – арщ и фIэщыгъэр адэкIэ къакIуэ хьэдисхэр къызыхэтха 4-нэ томым.
***
«Мылъку угъуеинымрэ щIыхьым щIэнэцIынымрэ цIыхугум фэрыщIыгъэ щагъэкI, псым удзыр зэригъэкIым хуэдэу».
***
«Мэл гуартэм хаутIыпщхьа дыгъужь мэжэлIахэм зэраныгъэу къахьынур нэхъ мащIэщ, мылъкумрэ пщIэмрэ хуэпабгъэным цIыхум и фIэщхъуныгъэм ирищIэм елъытауэ».
***
«Фэ фи ужькIэ къэхъунухэм мы дунейм хъугъуэфIыгъуэу тетыр зрахьэлIэу, шы лъэпкъыфIхэм шэсу, хъыджэбз тхьэIухудхэр щхьэгъусэу къашэу, щыгъын дахэ зэмыфэгъухэмкIэ захуапэу цIыху гуп яхэтынущ. МащIэкIэ загъэнщIынукъым абыхэм я ныбэхэм, я псэхэр куэдми арэзы ищIынукъым. Дунеягъэм зратыпэнурэ, нэхущым щыщIэдзауэ пшапэр зэхэуэху, абы и Iуэху фIэкIа зэрахуэнукъым. Я Тхьэм и пIэкIэ, ар тхьэпэлъытэ ящIынущ, абы и унафэхэр ягъэзащIэу, и щхьэзыфIэфIагъым зыдагъэшу. Аращи, мис, Абдулыхь и къуэ Мухьэмэд а зэманым нэсынухэм яжреIэ: сэлам евмых апхуэдэхэм, я сымаджэхэм фащIэмыупщIэ, я хьэдэхэр ядыщIэвмылъхьэ, я нэхъыжьхэми фафIэмылIыкI. Ар зыщIэм ислъам диным и лъэр щIиуду аращ».
