Уи гущIэгъушхуэм и хьэтыркIэ

«И гуэныхь Тхьэм къыхуигъэгъу» фIэкIа хужумыIэми, дунейм ехыжам псэум и тхьлъэIур хуэщхьэпэу жаIэ. Абы узэрыхуэлъэIуэну псалъэхэр зэманым къыпхыкIауэ щыщытым деж, и къарури нэхъ инщ.

Алыхьу си Тхьэ! Узэрызакъуэм, уи ЛIыкIуэ Мухьэмэду щэлатымрэ сэламымрэ зэхам къихьа щIэныгъэр зэрыпэжым щыхьэт техъуарэ муслъымэн диным иту дунейм ехыжа псоми, цIыхухъухэми цIыхубзхэми, я гуэныхьхэр къахуэгъэгъу.

Алыхьу си Тхьэ! КъухьэпIэр КъуэкIыпIэм зэрыпэIэщIэм хуэдэу, щIы ахэр я щыуагъэхэм япэIэщIэ.

Хьэрш лъапIэм и тепщэ! КъадэIэпыкъу абыхэм, Мункэррэ Нэкиррэ я упщIэхэм жэуап щраткIэ.

ДунеягъэкIэ яфIэкIуэдахэм я пIэкIэ, Уэ яхуэхъу абыхэм псэм и щIасэ, дэIэпыкъуэгъу, хъумакIуэ.

ФIэщхъуныгъэкIэ абыхэм папщIэ зыныпхуэзыгъэзахэм я тхьэлъэIум къыпэджэж, жэуап къет. Уи гущIэгъушхуэм и хьэтыркIэ, ялъыгъэс абыхэм фIыгъуэрэ насыпрэ.

Я Алыхь! Ди лIахэр мащэ зэвым къихи, унэ Iэхуитлъэхуитхэмрэ сэрей дахэхэмрэ гъэIэпхъуэ, хьы ахэр пхъэщхьэмыщхьэм къришэх жыг банэншэхэм я жьауэм, псыежэххэм я Iуфэм.

Я Алыхь! ЯхуэщI абыхэм я нэкIухэр дахащэ, я Тхьэм Iуплъэным хуэпIащIэ.

Алыхьу си Тхьэ! Я гуэныхьхэр къахуэгъэгъу, яхудэчых, тезырхэр ящхьэщых! ЯхуэщI абыхэм я екIуэлIапIэр махуэ, я щIыхьэпIэр дахэ. Щыгъын хужьым бжьыгъэр зэрикIыжым хуэдэу, псырэ уэс щIыIэмылкIэ я псэхэр яхуэгъэкъабзи, я щыуагъэхэмрэ псэкIуэдхэмрэ якIэрыхыж.

Я Алыхь! Яхуэхъуэж ди япэ ищахэм я унэр нэхъ унэфIкIэ, я Iыхьлыр нэхъ IыхьлыфIкIэ, я кхъэлъахэри нэр здынэплъысым хуэдизкIэ яхуэузэщI.

Я мащэр жэнэт хадэ яхуэщI, ар жыхьэнмэ мащэ, ди Тхьэ, яхуумыщI.

Алыхьу си Тхьэ! КъахуэщIыж абыхэм дунейм щашэчам къыпэкIуэн тыгъэ, къащыщIа псори нэхъыфIкIэ яхуэхъуэж. Ахэр зыфIэкIуэда я Iыхьлыхэм тэмакъкIыхьагъ къети, я гуауэр ящыгъэпсынщIэ.

Я Алыхь! Мы тхьэлъэIур зыхуэтIэтыр (и цIэр къипIуэ хъунущ) фIым хуэерыщу щытамэ, езыми дэри ди фIым тхухэгъахъуэ. Iейм хуэерыщу щытамэ, езыми дэри Iейуэ тIэщIэщIар къытхуэгъэгъу.

Я Алыхь, ди лIахэм я тхылъыр я Iэ ижьым къыIэщIегъэлъхьэж, я IуэхущIафэхэр хьисэп тыншкIэ къегъэпщытэж. ЯхуэщI абыхэм ятелъ щIыр щабэ, жэуапым я нэхъыфIыр къаIурылъхьэ, я мащэр нэхурэ хуиту, я хэщIапIэр махуэу, Жэнэтыр псэупIэрэ екIуэлIэжыпIэу къалъыгъэс.

Я Алыхь, игъапсэ абыхэм я мащэм нэхурэ нуррэ, ар хуитыныгъэрэ гуфIэгъуэкIэ гъэнщI, езыхэри шэхьид хъуарэ насыпыфIэу кхъэм щIэлъынухэм ящыщ щIы, дэри абыхэм дащыIубгъэщIэжкIэ, гущIэгъу къытхуэщI.

Уи гущIэгъум и хьэтыркIэ дынолъэIу, Дунейуэ щыIэм я Тхьэ!

Алыхьым и сэламыр ялъыус ди тепщэу Мухьэмэд, абы и Iыхьлымрэ и щэхьабэхэмрэ псоми.