И адэм и щIэинхэмкIэ музейм хуоупсэ

Художник Трындык Василий СурэтыщI ­гъуазджэхэмкIэ музейм, Ткаченкэ Андрей и цIэр зезыхьэм, и фондым тыгъэ хуищIащ ­КъБАССР-м щIыхь зиIэ и художник, респуб­ликэм мы IэщIагъэм хуеджа и япэ профессиональнэ сурэтыщIхэм ящыщ, и адэ Трындык Николай къыщIэна лэжьыгъэ 24-рэ. 

50 - 70 гъэхэм художникым и Iэдакъэ къы­щIэкIа сурэтхэм къыщыгъэлъэгъуэжащ щIыуэп­сым и теплъэгъуэхэмрэ натюрмортхэмрэ. Ахэр Совет Союзыр зэрыкъутэжрэ утыку къызэры­рамыхьам къыхэкIыу куэдым ялъэгъуакъым. Трындык Николай дунейм ехыжа нэужь, и адэм и лэжьыгъэхэр щихъумащ и къуэ Василий Санкт-Петербург щиIэ фэтэрым. Сурэтхэр тынш ды­-дэу, уасэфIи къапэкIуэу абы хуэщэну щытами, мурад ищIащ и адэм зыхилъхьэ щымыIэу фIы­-уэ илъагъуу, и сурэтхэр зытриухуэу щыта Къэ­бэрдей-Балъкъэрым къытхуигъэнэну.
Музейм и унафэщIхэм дыкъагъэгугъэ Налшык щыпсэухэмрэ ди хьэщIэхэмрэ папщIэ а сурэтхэм я гъэлъэгъуэныгъэ етIанэгъэ къызэ­рагъэпэщыну. Абы и фIыгъэкIэ къалэдэсхэм ­Iэмал яIэнущ XX лIэщIыгъуэм икухэмрэ и етIуа­-нэ лъэхъэнэмрэ Налшык иIа теплъэм зыщагъэ­гъуэзэну, зэрызихъуэжам кIэлъыплъыну.
Трындык Василий лэжьыгъэхэм къыщыгъэ­лъэгъуэжахэм щхьэхуэу я гугъу ищIащ. Къапщтэмэ, 1959 гъэм и адэм ищIа «Отдых под весенним солнцем» сурэтым щыболъагъу 1961 гъэм мэлыжьыхьым и 29-м къызэIуаха, Налшык и архитектор нэхъыщхьэу 1957 - 1968 гъэхэм щы­та Мосулишвили Гамлет и проектымкIэ ящIа, тIысыпIэ 800 зиIэ «Эльбрус» шхапIэр зэраухуэр. 1972 гъэм Николай ищIа «Осенние хлопоты» сурэтым къыщигъэлъэгъуащ Василий и анэ­шхуэр. Абы зэрыжиIэжымкIэ, анэ етIуанэ хуэ­хъуа, гъэмахуэ зыгъэпсэхугъуэхэр зи гъусэу ­игъэкIуа анэшхуэр игу къызэринэжам хуэдэ дыдэу лэжьыгъэми къощ. Щыгъупщакъым и анэшхуэм хьитIрэ джэдуитIрэ иIэу, джэдхэр, тхьэкIумэкIыхьхэр игъэхъуу, пхъэщхьэмы­щхьэ­хэмрэ хадэхэкIхэмрэ щигъэкI хадэшхуэ зэрихьэу, фIэIугъэхэр ищIу зэрыщытар. 1974 гъэм Николай и Iэдакъэ къыщIэкIа, «Строится дом в Нальчике» сурэтымкIэ иджы Налшык къыпхуэ­мы­цIыхужынкIэ зэрыхъунур Василий ибзы­щIыркъым. Абы къыщыгъэлъэгъуэжащ нэ­хъапэIуэкIэ Советскэу щыта, иджы КIыщокъуэ Алим и цIэр зезыхьэ, езыхэр щыпсэуа уэрамым асфальт зэры­те­мы­лъыр, апхуэдэ унэхэри иджы зэрамыухуэжыр. 
Трындык Николай Украинэм къыщалъхуащ, Донбассым щыпсэуащ, щылэжьащ. 1934 гъэм щIэ­тIысхьащ Луганск и художественнэ училищэм. Зэгуэр, гъэмахуэ зыгъэпсэхугъуэу, Къэ­бэрдей-Балъкъэрым зыплъыхьакIуэ къа­кIуэри, ди щIыналъэм и дахагъэм итхьэкъуати, 1938 гъэм Налшык къытригъазэри абы щыщIэ­дзауэ ди къалэм епха хъуащ и гъащIэри и гуа­щIэри. Ар Къэбэрдей-Балъкъэрым и сурэтыщI гъуазджэр зэфIэзыгъэувахэм, абы зезыгъэу­жьахэм ящыщ зы хъуащ, сурэтыщI ныбжьы­щIэхэр игъэсащ. 1939 гъэм Николай яхэтащ ­КъБАССР-м и Художникхэм я зэгухьэныгъэм и бюро къызэзыгъэпэщахэм. А илъэс дыдэм абы япэу утыку щигъэлъэгъуащ и сурэт 20-м щIигъу. «Социалистическая Кабардино-Бал­кария» газетым и художественнэ къудамэм 1941 гъэм щыщIэдзауэ и унафэщIу икIи къыхуеджэныгъэхэр, пла­катхэр игъэхьэ­зыру щытащ.
Николай 1942 гъэм фронтым ираджащ. Абы ­къулыкъу щищIащ Украинэ фронтым и мото­стрелковэ 160-нэ батальоным. Ар яхэтащ Кав­каз Ищхъэрэр, Украинэр хуит къэзыщIыжахэм, ­Ясс­кэ-Кишинёвскэ щIыпIэм деж щекIуэкIа зэ­хэуэ гуащIэм. ТекIуэныгъэм ар Болгарием щыIущIащ. Хэку зауэшхуэм щыщыIами, зэман тIэкIу къызэрыхудэхуэу, сурэт ищIырт. Зэрихьа лIыгъэмрэ хахуагъэмрэ къалъытэри, «За оборону Кавказа», «За победу над Германией» дамыгъэ лъапIэхэр къратащ. 1945 гъэм зауэм къикIыж- ри газетым и редакцэм къигъэзэжащ. Псэуху, жы­лагъуэ Iуэхуи лэжьыгъи зэпигъэуакъым. Трындык Николай ящыщщ Къэбэрдей-Балъкъэрым и щэнхабзэмрэ гъуазджэмрэ зыгъэ­беяхэм.