Москва зэрызыкъыщагъэлъэгъуэнум зыхуагъэхьэзыр

 Бахъсэн щIыналъэм хыхьэ Ислъэмей къуажэм и курыт еджапIэ №3-м и тхыдэ-лъахэхутэ музейр щытекIуащ УФ-м и Президент Путин Владимир и унафэкIэ, УФ-м ЕгъэджэныгъэмкIэ и министерствэр и дэIэпыкъуэгъуу, «ЩIэныгъэ» урысейпсо зэгухьэныгъэм къызэригъэпэща зэпеуэм и Iыхьэм.

 Зэхьэзэхуэм и Iыхьэ зыбжанэм пхыкIа нэужь, Къэбэрдей-Балъкъэрым мы IуэхумкIэ и еджапIэ нэхъыфIитIым язу къалъытащ Ислъэмей школым и музейр. Иджы IуэхущIапIэм Iэмал иIэщ Москва щекIуэкIыну урысейпсо Iыхьэм Къэбэрдей-Балъкъэрым и цIэкIэ зыкъыщигъэлъэгъуэну.

 Ислъэмей къуажэм и школ музейр 2012 гъэм къызэрагъэпэщащ. Илъэс зыбжанэ хъуауэ абы и гъэтIылъыгъэм хагъахъуэ егъэджакIуэхэм, еджакIуэхэм, къуажэдэсхэм. Мы гъэм музейр къагъэщIэрэщIэжащ икIи абы къыщызэрагъэпэщащ «Живая нить традиций» гъэлъэгъуэныгъэр.

 Мы IуэхущIапIэр нэгъуэщIхэм къащхьэщызыгъэкIыр абы и лэжьакIуэхэм егъэджэныгъэм хуаIэ бгъэдыхьэкIэ щIэщыгъуэрщ. 5-6-нэ классхэм я еджакIуэхэм я щIыналъэм и тхыдэр хьэпшыпхэмкIэ ядж къудей мыхъуу, я нэхъыжьхэм я псэукIам, щэнхабзэ щIэинхэм зэрыщагъэгъуазэрщ. ЕджакIуэхэр IэпщIэлъапщIагъэм хуагъасэ, адыгэ арджэн щIынри хыхьэу, лъэпкъ фэилъхьэгъуэхэм, хьэпшыпхэм я фIэщыгъэхэр адыгэбзэкIэ ядж, лъэпкъ дауэдапщэхэм хуагъэхьэзыр теплъэгъуэхэр ягъэлъагъуэ, къэфэкIэ зрагъащIэ.

 КъинэмыщIауэ, къагъэщIэрэщIэжа музейм щагъэуващ  «Зэкъуэтыныгъэм и жыг» арт-теплъэгъуэр. Абы фIадзащ Урысей Федерацэм и щIыпIэ псоми я ныпхэр, лъэпкъ зэмылIэужьыгъуэхэр къэралым зэрыщыпсэумрэ ахэр зэрызэкъуэтымрэ я дамыгъэу.

 Ислъэмей къуажэм и курыт еджапIэ №3-м и гупым дерс щхьэпэхэр, акъылыфIагъэ джэгухэр, гъэлъэгъуэныгъэхэр къыщызэрагъэпэщащ икIи къэпщытакIуэ гупхэм къагъэувхэм ехъулIэныгъэхэр яIэу пхыкIащ.

 КъызэгъэпэщакIуэхэм япэ Iыхьэм хыхьэу къэралым зэхыхьэ 2606-рэ щрагъэкIуэкIащ, цIыху мин 52-рэ къызэщIиубыдэу. Мы гъэм и жэпуэгъуэм Ислъэмей школым и лIыкIуэхэм Москва зыкъыщагъэлъэгъуэнущ, «Память жива» урысейпсо зэпеуэм и иужьрей Iыхьэм я зэфIэкI щеплъыжыну. Иужьрей Iыхьэм хыхьэу, къэралым и еджапIэ нэхъыфIи 150-м я лIыкIуэхэм утыку ирахьэнущ я музейхэм ятеухуа гъэлъэгъуэныгъэхэр. Абы къэпщытакIуэхэм къыщыхахынущ зэпеуэм щытекIуэну IуэхущIапIэ 70.

Зэхьэзэхуэм щытекIуэнухэм саугъэту сом мелуан 35-рэ хухахынущ, школхэм иджырей Iэмэпсымэхэр, компьютерхэр иратынущ, музей гъэлъэгъуэныгъэхэм папщIэ зыхуеинухэмкIэ къызэрагъэпэщынущ, зэпеуэр къадэзыIыгъхэм къабгъэдэкI саугъэт лъапIэхэр щIыгъуу.

 Мы гъэм гъатхэпэм ирагъэжьа зэпеуэм Къэбэрдей-Балъкъэрым и лIыкIуэхэр пашэ зэрыщыхъуамрэ абыхэм зэпеуэм и иужьрей Iыхьэм зэрызыкъыщагъэлъэгъуэнумрэ, дауи, ехъулIэныгъэшхуэщ.

 ТЕКIУЖЬ Заретэ.