Дзэлыкъуэ районым щыпсэухэм яIущIащ

Къэбэрдей-Балъкъэрым и Iэтащхьэ КIуэкIуэ Казбек, Урысей Федерацэм и Къэрал Думэм и депутатхэу Геккиев Заур, Родинэ Викторие, Щхьэгуэш Адэлбий сымэ иджыблагъэ яIущIащ Дзэлыкъуэ районым и цIыхухэм. ЩIыналъэ администрацэм щызэхуэсахэр тепсэлъыхьащ цIыхухэм я псэукIэм, экономикэм, жылагъуэ Iуэхухэм, егъэджэныгъэм, медицинэм, спортым. Къызэрыхагъэщащи, иужьрей илъэситхум къриубыдэу Дзэлыкъуэ районым IуэхуфI куэд щызэфIахащ щIэблэм хуэгъэзауэ: курыт еджапIэхэр, сабий садхэр яухуащ, жьы хъуахэр къагъэщIэрэщIэжащ. Сабийхэр гъэсэнымрэ ныбжьыщIэхэр егъэджэнымрэ тынш зыщI иджырей технологиехэмкIэ IуэхущIапIэхэр къызэрагъэпэщащ. Зыхуей хуагъэзащ ЩэнхабзэмкIэ унэхэр, спорт IуэхущIапIэхэр, сымаджэщхэр, библиотекэхэр. Мы зэманым яухуэ щIалэгъуалэ IуэхущIапIэ. Къуажэхэм щыIэ псы бжьамийхэр зыхуей хуэгъэзэжыным, цIыхухэм псыр ярикъуу ялъэгъэIэсыным елэжьащ. Гулъытэ лей хуащIащ гъуэгухэм - ахэр яухуащ е зыхуей хуагъэзащ, уэрамхэр уэздыгъэкIэ къагъэнэхуащ. Гъуэгум елэжьыныр иджыри зэпыуакъым. Районым щыпсэухэр зыщыгуфIыкI Iуэхугъуэщ къуажэхэм зыгъэпсэхупIэхэр къызэрыщызэрагъэпэщар. Абыхэм итщ сабийхэм зэрызытрагъэухэр – хъыринэхэр, къежэхыпIэхэр, тIысыпIэхэр, хагъэщхьэхукIащ велосипедкIэ къыщыбжыхь лъагъуэхэр. Паркхэр хуитщ, гъэщIэрэщIащ, къабзэщ. 
Районым и къуажэхэм къикIахэм ди Iэтащхьэм, УФ-м и депутатхэм зыгъэпIейтей упщIэхэр иратыну Iэмал яIащ. ХьэщIэхэми я гуапэу жэуап иратащ упщIэхэм.
Зэхуэсым къыщаIэта Iуэхухэр къапщытэжынущ лъэпкъ проектхэм, къэрал программмэхэм хэту.