ЗэкIуийр Шэшэным щытокIуэ

Шэшэн Республикэм и япэ президент, УФ-м и ЛIыхъужь Кадыров Ахъмэт и фэеплъу бэнэкIэ хуитымкIэ дунейпсо зэхьэзэхуэ Грознэ къалэм ще­кIуэкIащ. Абы щызэпеуащ къэ­рал 24-м я спортсмену 200-м нэблагъэ, Олимп джэгухэм, ­дунейпсо, Европэ чемпионатхэм щытекIуа, етIуанэ, ещанэ ­щыхъуа спортсмен куэд яхэту.

Къэбэрдей-Балъкъэрым и лIыкIуэхэм ящыщу килограмм 74-рэ зи хьэлъагъхэм я деж япэ увыпIэр къыщихьащ бэнакIуэ цIэрыIуэ ЗэкIуий Анзор. Ди щIалэм финалым щыхигъэщIащ Дагъыстэным и спортсмен лъэщ Гаджиев Гаджимурад.
Кумыщ Темырлан зэхьэ­зэхуэм и домбеякъ медалыр къыщихьащ килограмми 125-рэ зи хьэлъагъхэм я деж. ЗэIущIэм и бжыгъэр 12:2-уэ фи­нал «цIыкIум» ар щефIэкIащ Тыркум и бэнакIуэ Узун Догъан.
Зэхьэзэхуэм щы­те­кIуахэм доллар мин тхурытху, етIуанэр къэ­зыхьахэм доллар мин тIурытI, ещанэ хъуахэм доллар мин зырыз иратащ.
ЩIалэхэм ядэлажьэр ЗэкIуий Арсен, Бэрэгъун Рашид, Башиев Екъуб сымэщ. 

СЫЖАЖЭ Аскэр.­