Къэбэрдей-Балъкъэрым, адрей щIыналъэ псоми хуэдэу, дыгъуасэ сыхьэтийм, Урысейм и Къэрал гимныр къеуэу, хэхыпIэхэм я бжэхэр къыщызэIуахащ. ЗэрыфщIэщи, цIыхухэм къапэщылъщ мы махуищым (фокIадэм и 18-м къыщыщIэдзауэ 20 пщIондэ) Урысей Федерацэм и Къэрал Думэм и ебгъуанэ зэхуэсыгъуэм и депутатхэмрэ муниципальнэ унафэщIхэмрэ хахыну.
КъБР-м и ХэхакIуэ комиссэм къызэригъэлъагъуэмкIэ, дыгъуасэ республикэм и хэхыпIэу 354-рэ къызэIуахащ, хэхыныгъэхэр зэрекIуэкIынум сыт и лъэныкъуэкIи хуэхьэзыру. IэщIагъэлIхэр хуосакъ IэIэтыр цIыхухэм я дежкIэ нэрылъагъуу, тыншу икIи шынагъуэншэу зэрекIуэкIынум. ЩIыпIэ къэс Iэ зэраIэт бюллетенхэр зрадзэ ашыкхэр щагъэуващ, зыхуеину Iэмэпсымэ псори яIэщ. Нэхъыщхьэращи, дэтхэнэми видеокIэлъыплъыныгъэр къыщызэгъэпэщащи, ар Iуэхур тэмэму зэрекIуэкIым шэч къыщIытумыхьэн щхьэусыгъуэщ.
ХэхыпIэхэм жылагъуэ кIэлъыплъакIуэ 1700-м щIигъу щылэжьэнущ, дэтхэнэми хабзэхъумэ IэнатIэхэм я лэжьакIуэхэр щIэтынущ. Къыхэгъэщыпхъэщ, мы хэхыныгъэхэр зэрекIуэкIым иджы япэу КъБР-м ЦIыхухэм я хуитыныгъэхэр хъумэнымкIэ и уполномоченнэм и аппаратым и лэжьакIуэхэри зэрыкIэлъыплъынур. КъБР-м и ХэхакIуэ комиссэм и унафэщIым и къуэдзэ Джаппуев Мусса зэрыжиIамкIэ, республикэм и хэхакIуэхэр псори зэхэту цIыху 550 194-рэ мэхъу.
(КIэухыр. ПэщIэдзэр 1-нэ нап.)
Хэхыныгъэхэм ипэ къихуэу, «Информ УИК» хъыбарегъащIэ Iуэхур зэфIагъэкIащ. ХэхакIуэ комиссэхэм хэтхэм республикэм и къалэ, район псоми фэтэрхэмрэ унэхэмрэ, апхуэдэуи IуэхущIапIэхэр къыщызэхакIухьащ. Я мурад нэхъыщхьэу щытар къапэщылъ хэхыныгъэхэм цIыхухэр щыгъэгъуэзэнырт, Iэ зэраIэтыну щIыкIэхэр гурагъэIуэнырт. Зи ныбжь хэкIуэта, зи узыншагъэм къимыхь цIыхухэм хуитыныгъэ яIэщ я унэм деж Iэ щаIэтыну. КъБР-м и ХэхакIуэ комиссэм хэт Бекъан Заур зэрыжиIэмкIэ, хъыбарегъащIэр щрагъэкIуэкIым Къэбэрдей-Балъкъэрым щыпсэу цIыху мини 8-м щIигъум унэм Iэ щаIэтыну хуейуэ къагъэлъэгъуащ. Мы гъэм зи ныбжьыр илъэс 18 ирикъуа цIыху мини 7-м щIигъум иджы япэу Iэ яIэты-нущ. Республикэм бюллетень мелуаным щIигъу щагъэхьэзыращ, уэрамхэм дэтынущ мобильнэ хэхыпIэхэри.
Депутат хэхыныгъэхэм и япэ махуэм Iэ зыIэтахэм ящыщщ ди щIыналъэм и Iэ-тащхьэ КIуэкIуэ Казбекрэ и щхьэгъусэмрэ. Ахэр щыIащ Налшык къалэм дэт Гимназие №1-м къыщызэIуаха хэхыпIэ №I23-м. Журналистхэм щепсалъэм, республикэм и Iэтащхьэм жиIащ: «Дыщыпсэу къэралым ифI зыхэлъ мыпхуэдэ Iуэхугъуэшхуэхэм дэтхэнэ зыри жыджэру хэ-тын хуейуэ къызолъытэ. Мы хэхыныгъэхэм ди къэкIуэнур елъытащи, къэралым къыдит хуитыныгъэхэр къэдгъэсэбэпыпхъэщ. Сыт щыгъуи хуэдэу дыщогугъ хэхыныгъэхэм зэхъуэкIыныгъэфIхэр къыдэкIуэну. Къыхэзгъэщынут нобэ ди лIыхъужьхэр зэкъуэту я къэрал къалэным зэрыпэрытри. Мамырыгъэрэ текIуэныгъэрэщ дызыпэплъэр, дызэгъусэм псори къыдэхъулIэнущ».
ХэхыпIэ №123-м пщэдджыжьыпэм щегъэжьауэ хэхакIуэхэр жыджэру екIуэлIэн щIадзащ. ХэхыпIэм и унафэщIым и къуэдзэ Цой Наталие зэрыжиIамкIэ, я япэ хэхакIуэу щытар а еджапIэр къэзыухахэрщ. «Ди школыр нэхъ ипэкIэ къэзыухахэр зэгъусэу сыхьэти 8-м ирихьэлIэу ди хэхыпIэм къызэрытхуеблэгъар ди гуапэ мыхъуу къэнакъым. Нэжэгужэу, къытщыгуфIыкIыу, къыдэхъуэхъуу ахэр къытхыхьащ. Ди лэжьыгъэр апхуэдэу дахэу едгъэжьащи, икъукIэ дрогушхуэ ди сабийхэм жэуаплыныгъэ зыхэлъ, цIыху гуапэ къазэрищIыкIам», - жеIэ Наталие.
КъБР-м и Парламентым и УнафэщI Егоровэ Татьянэ и щхьэгъусэм щIыгъуу Iэ щиIэтащ Къэбэрдей-Балъкъэр къэрал университетым къыщызэрагъэпэща хэхыпIэ №147-м. Хабзэубзыху IуэхущIапIэм и УнафэщIым къыхигъэщащ дызэрыт зэманым мы хэхыныгъэхэм мыхьэнэшхуэ зэраIэр. «УФ-м и Президент Путин Владимир къызэрыхигъэщщи, Урысейр хущIэкъунущ дзэ Iуэху хэхам епха мурадхэр псори зэрызригъэхъулIэнум. Абы щхьэкIэ дызэкъуэтын хуейщ. Къэрал Думэм и гупыщIэм жылагъуэр щогугъ, ипэ ита зэхуэсыгъуэми хуэдэу, зэгурыIуэу, зэгъэуIуауэ лэжьэну. СызэреплъымкIэ, дызэрыт зэман мытыншым, КъухьэпIэр Урысейм къыщыпэщIэтым, ди къэралым и хабзэубзыху IуэхущIапIэ нэхъыщхьэм и мыхьэнэм нэхъри хохъуэ. Аращи, нобэ гъэунэхуныгъэхэм пэщIэтыфынухэм, пэжымрэ захуагъэмрэ зи лъабжьэ законхэр къэзыщтэнухэм дахуейщ. Шэч къытесхьэркъым а псоми и мыхьэнэр къагурыIуэу, ди хэхакIуэхэр жыджэру IэIэтым къызэрыкIуэнум, егупсысауэ къызэрыхахынум, - къыхигъэщащ Егоровэм.
КъБР-м и Парламентым и УнафэщIым зэрыжиIэмкIэ, Къэбэрдей-Балъкъэрым дежкIэ мыхьэнэшхуэ иIэщ щIы-пIэ унафэр зезыхьэ IэнатIэхэм я советхэм я депутатхэр хэхынми. Абыхэм я лэжьыгъэ купщIафIэм куэдкIэ елъытащ къэралым хуащI дзыхьыр зыхуэдэнумрэ цIыхухэм я псэукIэр зэIузэпэщ зэрыхъунумрэ.
- Псом япэу абыхэм я дежщ цIыхухэр здэкIуэр, зыхуэныкъуэр, я гугъуехьхэр зыхуэдэр ирахьэлIэу. Аращи, мыхьэнэшхуэ иIэщ щIыпIэ унафэхэр зэрахьэну Iуэхум хэзыщIыкI, жэрдэмщIакIуэ, гумызагъэ, ди лъахэгъухэм я гъащIэр егъэфIэкIуэным гурэ псэкIэ хущIэкъу цIыхухэр хэхыным. Си гугъэщ хэхыныгъэхэм ар кърикIуэну», - дыщIигъуащ Егоровэм.
Дыгъуасэ нэрылъагъу зэрытщыхъуащи, хэхыпIэхэм волонтёрхэри къыщыпIуощIэ. Абыхэм хахыным теухуауэ къыхураджэу аракъым, атIэ нэхъ зи ныбжь хэкIуэтахэм ядэIэпыкъуу, упщIэ зиIэхэм жэуап ирату, ягъэгъуазэу аращ. Ар IэмалыфIщ чэзу зэтримыхьэу, зэрызехьэ щымыIэу Iуэхур зэкIэлъыкIуэу екIуэкIынымкIэ. КъищынэмыщIауэ, зэрыхабзэу, республикэм щэнхабзэмкIэ и лэжьакIуэхэм хэхыпIэхэм зыкъыщагъэлъагъуэ, цIыхухэм я гукъыдэжыр къаIэту.
Мэкъумэшым елэжьхэм къыщIагъэкIхэм я фIагъымрэ шынагъуэншагъэмрэ къэзыпщытэ федеральнэ центрым КъБР-м щиIэ къудамэми хэхыныгъэхэр щокIуэкI. Абдеж къыщызэрагъэпэща хэхыпIэ №124-м япэу Iэ щиIэтащ Iуэху- щIапIэм и унафэщI Сэхъурокъуэ Хьэутий. «Си гуапэу сынывохъуэхъу ди къэралым дежкIэ мыхьэнэшхуэ зиIэ мы махуэмкIэ. Мы хэхыныгъэхэр ди зэкъуэтыныгъэм и нэщэнэщ. Дуней псом ирырелъагъу дызэрыкъэралыгъуэшхуэр, лъэпкъхэр дызэгурыIуэу дызэрызэдэгъуэгурыкIуэр», - жиIащ абы.
ХэхыпIэ №156-м и унафэщI Ильющенкэ Герман жеIэ: «Хэхыныгъэхэр щекIуэкIыну махуэхэм ипэ къихуэу, щIыналъэ комиссэм ди хэхыпIэм кърипха дэтхэнэ цIыхуми хъыбар едгъэщIэн хуейуэ щытти, цIыхуиплI хэтхри, а лэжьыгъэр ирагъэкIуэкIащ. Ди хэхыпIэм Iэ щаIэтыну зрагъэтхащ Кавказ Ищхъэрэм и щIыналъэхэм щыщу мы зэманым ди республикэм щылажьэхэми. Къыхэзгъэщыну сыхуейт хэхыпIэр сыт и лъэныкъуэкIи Iуэхум хуэхьэзыру къызэрызэIутхар, ар псом хуэмыдэу зи фIыгъэу къэслъытэр илъэс куэд хъуауэ комиссэм хэтхэм мы лэжьыгъэм фIыуэ зэрыхащIыкIырщ».
БАГЪЭТЫР Луизэ.
Сурэтхэр
Къарей Элинэ трихащ.
