Пщащэм и ехъулIэныгъэхэр

Бахъсэн щIыналъэм щыщ, КъБКъУ-м и 4-нэ курсым щеджэ Нэхущ Арианэ къихьащ Урысейм и Правительствэм и стипендиер. Ар зыхуагъэфащэр щIэныгъэм, проект зэмылIэужьыгъуэхэм, жылагъуэ Iуэхухэм теухуауэ ехъулIэныгъэ зиIэрщ.

 Нэхущ Арианэ курыт еджапIэр дыщэ медалкIэ къиухащ. Ар зэуэ щоджэ «Социология», «Юриспруденция» факультетхэм. Абы къыдэкIуэу, щIэныгъэ лэжьыгъэхэр етх, проектхэм я унафэщIщ, конференцэхэм жыджэру хэтщ, Хэку зауэшхуэм и тхыдэ фэеплъхэр хъумэнми хэлъхьэныгъэ хуещI. КъБКъУ-м и егъэджэныгъэ, щIэныгъэ зэхыхьэхэм зэпымыууэ хэтщ. И тхыгъэхэр мызэ-мытIэу къытехуащ щIэныгъэмкIэ журналхэм.

 Арианэ мы гъэм щытекIуащ Ломоносов Михаил и цIэр зезыхьэ МГУ-м къызэригъэпэща «Ломоносов» универсиадэм. Ар МГУ-м кIуэри, олимпиадэм и IыхьитIми щыпхыкIащ.

 И унагъуэм и гъусэу, Арианэ хэтщ къэхутэныгъэ Iуэхуми. Хэку зауэшхуэм и лIыхъужьхэм хуагъэфэща, щхьэусыгъуэ зэмылIэужьыгъуэхэмкIэ ирамытыжа дамыгъэхэмрэ абыхэм я тхылъхэмрэ къалъыхъуэжурэ зейм я щIэблэм иратыж. Илъэситхум къриубыдэу мы унагъуэм къигъуэтыжащ икIи я щIэблэм яритыжащ дамыгъэ 23-рэ.

 - Унагъуэм зэфIэдгъэкI Iуэхур Хэку зауэшхуэм хэтахэр тщымыгъупщэнымкIэ мыхьэнэ зиIэщ. Къэдгъуэтыж дэтхэнэ зы дамыгъэми и фIыгъэкIэ цIыхум къикIуа, пщIэрэ щIыхьрэ зыпылъа гъуэгуанэм и щIэблэр ириплъэжыну Iэмал иIэщ, - жеIэ Нэхущ Арианэ.

 - Хэку зауэшхуэм хэта си адэшхуэ Нэхущ Хьэмти къыхуагъэфэща дамыгъэ лъапIэхэр къэдгъуэтыжынымкIэ едгъэжьа хъуащ мы Iуэхур. Ар къыщыдэхъулIэм, нэгъуэщI унагъуэхэми абыкIэ дадэIэпыкъуну, псапэ длэжьыну къалэн зыщытщIыжащ, - пещэ Арианэ и адэ Ахьмэд.

ТЕКIУЖЬ Заретэ.