«Шэрджэс Ренессанс» Къэбэрдей-Балъкъэр жылагъуэ IуэхущIапIэм хъыбар гуапэ къытIэригъэхьащ. Иджыблагъэ «Яндекс ЗэдзэкIакIуэм» хагъэхьащ къэбэрдей-шэрджэсыбзэр макъкIэ ебгъэтхрэ асыхьэту пхузэридзэкIыу. Ар сэбэпышхуэ хъунущ псалъэхэр традзэну Iэмал е зэман щамыIэм деж.
2024 гъэм «Шэрджэс Ренессансым» иригъэжьа мы лэжьыгъэм адэкIи зэрызрагъэубгъунум шэч хэлъкъым. Япэ Iыхьэм хиубыдэу псалъэхэр зэдзэкIыным елэжьауэ щытащ. КъыкIэлъыкIуэр - макъкIэ трегъэтхэнырт. Иужьрей Iуэхур зрагъэхъулIэн папщIэ, IэщIагъэлIхэр лъыхъуащ бзэр зыIурылъхэм. Лэжьыгъэм къыхыхьащ егъэджакIуэхэр, школакIуэхэр, волонтёрхэр. Дэтхэнэми псалъэхэр макъкIэ иригъэтхыурэ, Яндексыр зыхуеину бжыгъэхэр ирагъэкъуащ.
- Нобэ ди лэжьыгъэм кърикIуар цIыхухэм я пащхьэ къитхьащ. Зэпсэлъэныгъэ жыпхъэм тету, зыр урысыбзэкIэ, адрейр къэбэрдей-шэрджэсыбзэкIэ псалъэ хъунущ: гуэдзэным жыIэгъуэхэр узыхуей бзэкIэ зэредзэкI икIи егъэIу. Ар «Яндекс ЗэдзэкIакIуэм» и сайтми гуэдзэнми щагъуэтынущ, - къыщыхагъэщ «Шэрджэс Ренессансым». - Ди анэдэлъхубзэр иджырей Iэмалхэм къызэрыщыдгъэсэбэпыфыр абы и зыужьыныгъэм и Iыхьэ нэхъыщхьэу къыдолъытэ. Дэ дыхуейщ къэбэрдей-шэрджэсыбзэр махуэ къэс дызэрызэпсалъэ, зэрызыдужь бзэуэ къэнэну, къэрал зэмылIэужьыгъуэхэм щыпсэу адыгэхэм я анэдэлъхубзэр нэхъыбэрэ зэхахыу, къагурыIуэу, ягъэIуу екIуэкIыну. Лъабжьэхэр пщIэжу, зэманым дэгъуэгурыкIуэн - аращ мыпхуэдэ Iуэхухэр зытещIыхьар.
Жылагъуэ IуэхущIапIэм «Яндексым» фIыщIэ хуещI купщIафIэу зэрызэдэлэжьам, анэдэлъхубзэхэм гулъытэ зэрахуищIым папщIэ. Лэжьыгъэр къызэгъэпэщынымкIэ сэбэп хъуа, тхыгъэхэр зыгъэхьэзыра, къэзыпщытэжа, зи макъкIэ ахэр езыгъэтхахэми, дауи, мы Iуэхум хуащIа хэлъхьэныгъэр къумылъытэнкIэ Iэмал иIэкъым.
«УщIэгушхуэн Iуэхугъуэхэр зэман-зэманкIэ ди гъащIэм къыхохьэри, мыр абыхэм, шэч хэмылъу, ящыщ зыщ. «Яндекс ЗэдзэкIакIуэм» ди анэдэлъхубзэр макъкIэ къызэрыщыIуным мыхьэнэшхуэ иIэщ. Псом хуэмыдэу си дежкIэ лъапIэ дыдэщ, си макъкIэ езгъэтха тхыгъэхэр я лъабжьэу, сервисым псалъэхэр къызэригъэIур, - щетх Урыс Миланэ и напэкIуэцIым деж. - Девгъэгупсысыт, дунейм и сыт хуэдэ къэралми щыIэ ди цIыхухэм «ЗэдзэкIакIуэр» къызэIуахыу, анэдэлъхубзэкIэ псалъэхэр зэрызэхахыфынум. Ди бзэ дахэр псэуным хэлъхьэныгъэ гуэр хуэпщIынымкIэ ар Iэмал гъуэзэджэт. Анэдэлъхубзэм иджырей IэмалхэмкIэ «псэщIэ» хэлъхьэным и мыхьэнэр инщ, икIи ар зэзыгъэщIэжыну хуейхэмрэ зыджхэмрэ я дежкIэ сэбэпышхуэщ. ИкъукIэ цIыху куэд зэкъуигъэуващ мы Iуэхум. «Шэрджэс Ренессансым», «Яндексым» и лэжьакIуэхэм, псоми фIыщIэ яхузощI лъэпкъ Iуэхум хэлъхьэныгъэ гуэр хуэсщIыну Iэмал къызэрызатам папщIэ. Дыщогугъ анэдэлъхубзэм гулъытэ хуащIынымкIэ, нэхъыбэрэ абы ирипсэлъэнымкIэ ар дэIэпыкъуэгъу хъуну».
Макъхэр зэхуэхьэсыным гупитI елэжьащ. Япэр «Шэрджэс Ренессансым» Лэскэн районым и курыт еджапIэхэм я унафэщIхэм гъэсэныгъэмкIэ я чэнджэщэгъухэр щIыгъуу, етIуанэр - «Дызэкъуэтмэ - дылъэщщ» жэрдэмщIакIуэ гупым хэтхэрщ. Анэдэлъхубзэр хъумэнымрэ зегъэужьынымрэ зи къару, зэман, щIэныгъэ езыхьэлIэхэм афэрым яжыдоIэ.
