ЩIэинхэр хъумэным и мыхьэнэр

Къэбэрдей-Балъкъэр къэрал университетым и «Эрмитаж-Кавказ» щэнхабзэ-егъэджэныгъэ цент­рым и унафэщI Сэралъп Альберт хэтащ ЕтIуанэ Дунейпсо жылагъуэ ассамблеем и лэжьыгъэм. Зэхыхьэр фокIадэм и 18 - 19 махуэхэм Москва ще­кIуэ­кIащ.

«ДунеищIэ: лъэпкъ­хэр зэзышалIэ лъапIэныгъэхэр» зэIущIэм къыщы­зэхуэсат къэрали 154-м я лIыкIуэхэр. Абыхэм яхэтт жылагъуэ дипломатием и пашэхэр, щIэныгъэлIхэр, щэнхабзэ, егъэджэныгъэ IэнатIэхэм я лэжьакIуэхэр. МахуитIкIэ екIуэкIа Iуэхур теухуауэ щытащ лъэпкъ щэнхабзэ, цивилизацэ зэмылIэужьыгъуэ куэдкIэ бей дунейм лъэпкъхэр дзыхь зэхуащIу зэдэлэ­жьэным я лъапIэныгъэ­хэр хъумэнымрэ.
Сэралъп Альберт хэтащ ассамблеем къы­щызэрагъэпэща «Тхыдэ фэеплъыр цIыхухэм я къэкIуэнум и лъабжьэщ» зэIущIэм. Абы хэтт къэрал зэмылIэужьыгъуэхэм къикIа тхы­дэджхэр, жылагъуэ, егъэджэныгъэ зэгухьэныгъэхэм, музей, архив IуэхущIапIэхэм я лIыкIуэхэр. Къызэхуэсахэр куууэ тепсэлъыхьащ тхыдэр, фэеплъхэр хъумэным пыщIа Iуэхухэм.
«Эрмитаж-Кавказ» центрым и унафэщIыр къэпсэлъащ «Живое наследие народов: традиции, культурные коды и образ будущего» жы­хуиIэ Iуэхум теухуауэ. Абы щыгъэбелджылат лъэпкъ IэпщIэлъапщIагъэр хъумэным, зегъэу­жьыным, щIыналъэхэм щыIэ зэгухьэныгъэхэм защIэгъэкъуэным, лъэпкъхэм я щэнхабзэ зэхэ­щIыкIыр зэтегъэувэным, къэралхэр, жылагъуэ­хэр, IэпщIэлъапщIэхэр зэ­дэгъэлэжьэнымкIэ IэмалыщIэхэр къэлъыхъуэ­ным.
Сэралъп Альберт къы­зэхуэсахэм яхутепсэ­лъы­хьащ Кавказым щыпсэу лъэпкъхэм я щэнхабзэ щIэинхэм, мыхьэнэшхуэ зиIэ щэнхабзэ ухуэныгъэхэр зэрахъумэ Iэмалхэмрэ хабзэхэмрэ. Абы къыхигъэщхьэхукIащ къэ­ралыр, жылагъуэр, творческэ зэгухьэныгъэ­хэр зэгурымыIуэмэ, зэдэ­мылажьэмэ, апхуэдэ щIэин­хэр зэрыпхуэмы­хъумэнур.
- Кавказым ис лъэпкъ­хэм я щэнхабзэ щIэинхэр хъумэныр блэкIам пщIэ хуэтщIу аркъудейкъым, ар къэкIуэнум лъабжьэ хуэхъу Iуэхугъуэщ. Фэ­еплъхэм я мызакъуэу, ди адэжьхэм зэрахьа хабзэ­хэри, лъэпкъ хъугъуэфIыгъуэхэри къыкIэлъыкIуэ лIакъуэхэм яIэрыдгъэхьэн хуейщ. ЦIыхубэм къэкIуэну гъунэгъум зэпIэзэрыту зэрызаужьы­фынур щэнхабзэ, егъэджэныгъэ, щIэныгъэ я лъэныкъуэкIэ дызэдэлажьэмэщ», - къыхигъэщащ Сэралъп Альберт.
ЕтIуанэ Дунейпсо жылагъуэ ассамблеем и лэжьыгъэм КъБКъУ-р зэрыхэтар ящыщщ ­Кавказ Ищхъэрэм и щэнхабзэ щIэинхэр хъу­мэнымрэ къыдэкIэутей щIэблэм егъэцIыхунымкIэ университетым зэфIигъэкI Iуэхугъуэшхуэхэм. Апхуэдэ проект куэд ирегъэкIуэкI «Эрмитаж-Кавказ» центрым. Абыхэм ящыщщ Кавказым и испы унэхэм ятеухуахэр бжыгъэр зи лъабжьэ IэмалхэмкIэ къэгъэщIэрэщIэныр, фащэм и зэхэ­лъыкIэр джыныр, щIыналъэм щэнхабзэегъэ­­джэныгъэ туризмэм зыщегъэужьыныр, нэ­гъуэщI­­хэри.