IэщIагъэлIхэм я нэIэм щIэту

Ди республикэм мы махуэхэм щокIуэкI цIыхум психикэ и лъэныкъуэкIэ и узыншагъэм нэхъыфIу елэжьы­ным хуэщIа IэмалыщIэхэр къыщагъэнаIуэ щIэныгъэ-практикэ конференц. Къэралым и щIыналъэ куэдым я лIыкIуэхэр къызрихьэлIа а медицинэ зэIущIэшхуэм хэтхэм яхуэзащ КъБР-м и Iэтащхьэ КIуэкIуэ Казбек. 

Конференцым и лэжьыгъэм хэт щIэныгъэлI цIэры­Iуэхэм, IэщIагъэлI щыпкъэхэм ящыщщ ПсихологиемкIэ Урысей щIэныгъэ центрым и унафэщI Чайкэ Юлие, Бехтеревым и цIэр зезыхьэ, Психиатриемрэ неврологиемкIэ щIэ­ныгъэ центрым и пашэ Незнанов Николай, Сербскэм и цIэр зезыхьэ, Психиатриемрэ наркологиемкIэ центрым НаркологиемкIэ и къудамэм и унафэщI Клименкэ Татьянэ, Ломоносовым и цIэр зезыхьэ МКъУ-м Психическэ узыншагъэмрэ клиникэ психиатриемкIэ и кафедрэм и унафэщI Костюк ­Георгий, ПсихиатриемкIэ дунейпсо зэгухьэныгъэм Къуэ­кIыпIэ Европэм щиIэ лIыкIуэ, Къэзахъстаным Узыншагъэр хъумэнымкIэ и ­министерствэм и IэщIагъэлI Негай Николай, Психиатрическэ узыншагъэмкIэ Урысей щIэныгъэ центрым и унафэ­щIым и къуэдзэ Каледа Василий, а центрым Сабий психиатриемкIэ и институтым и уна­фэщI Бархатовэ Александрэ, нэгъуэщIхэри. 
Дунейпсо цIэрыIуагъ зиIэ а еджагъэшхуэхэм фIыщIэ ин яхуищIащ КIуэкIуэ Казбек, узыншагъэр хъумэнымкIэ щIыналъэ IэнатIэм и зыужьыныгъэм хэлъхьэныгъэ ин зэры­хуащIым папщIэ. А IэщIагъэлIхэм я нэIэм щIэту Кавказ Ищхъэрэ федеральнэ щIыналъэм къикIа дохутырхэм (наркологхэм, психотерапевтхэм, неврологхэм, медицинэ пси­хологхэм) папщIэ къызэрагъэпэщ егъэджэныгъэ курсхэр. Апхуэдэ Iуэхугъуэхэр, шэч хэмылъу, сэ­бэпышхуэ хъунущ цIыхухэм психикэ и лъэны­къуэкIэ я узыншагъэр нэхъыфIу хъумэнымкIэ, а унэтIыныгъэмкIэ Iэмалы­щIэхэр къэгъэсэ­бэ­пынымкIэ. 
КIуэкIуэ Казбек зэрыжиIамкIэ, нэхъапэIуэкIэ яублауэ ди республикэм щокIуэкI Нарко­логиемрэ психиатриемкIэ республикэ центрым и мылъку-­техникэ лъабжьэр къэгъэ­-     щIэ­рэщIэжыным хуэгъэпса     лэ­жьыгъэшхуэхэр, КъБР-м Узын­шагъэр хъумэнымкIэ и ­министерствэм къызэригъэпэщауэ. 
Мы махуэхэм ди щIыналъэм щекIуэкI конференцым къриу­быдэу абы кърихьэлIахэм ­папщIэ лекцэ купщIафIэхэм ­къеджэнущ экспертхэр. Апхуэ­дэу дохутырхэр тепсэлъыхьынущ психическэ узыншагъэ и лъэныкъуэкIэ зыгъэпIейтей Iуэхугъуэ куэдым.