Набдзэгубдзаплъэу бгъэдохьэ

УФ-м и Президентым и полномочнэ лIыкIуэу КИФЩI-м щыIэ Чайкэ Юрий видеозэпыщIэныгъэкIэ иригъэкIуэкIащ мылъкум епха Iуэхугъуэхэр хабзэм ебакъуэу къэгъэщхьэпэным пэщI­э­тынымкIэ щIыналъэхэм зэдай комиссэм и зэIущIэр. 

Чайкэ Юрий къызэхуэсахэм ягу къигъэкIыжащ КИФЩI-м бюджет зэмылIэужьыгъуэхэм къыхэкIыу щэ бжыгъэм нэс программэхэр зэрыщылажьэр. ЦIыхухэм я псэукIэр езыгъэфIэкIуапхъэ защIэщ ахэри, къэрал мылъкур здэкIуапхъэм зэрыкIуэм набдзэгубдзаплъэу кIэлъыплъын хуейщ. 
 ЗэIущIэм къыщыпсэлъащ кIэлъыплъакIуэ-надзор IуэхущIапIэхэм я лIыкIуэхэр. КИФЩI-м щыIэ РосфинмониторингымкIэ щIыналъэхэм зэдай управленэм и унафэщI Русин Алексей къызэхуэсахэр щыгъуа­зэ ищIащ хабзэншагъэкIэ къэрал мылъкум хэIэбэхэм зэрапэщIэтым, апхуэдэу зи хэхъуэр зыгъэбэгъуэн зи хьэлхэм ящIэр зэрыпаубыдымрэ ядыгъуар къызэрытрахыж щIыкIэмрэ.