ГъэтIылъыгъэхэр къызэрагъэпэщ

УФ-м и Правительствэм и УнафэщIым и япэ къуэдзэ Мантуров Денис, вице-премьерхэу Новак Александр, Хуснуллин Марат сымэ экономикэм и къудамэ псори мардэм тету гъэлэжьэнымкIэ комиссэ щхьэхуэм и зэIущIэ ирагъэкIуэкIащ. Абы видеозэпыщIэныгъэкIэ хэтащ КъБР-м и Iэтащхьэ КIуэкIуэ Казбек. 

ЗэIущIэр теухуат псэупIэ-коммунальнэ хо­зяйствэр, псом хуэмыдэу электроэнергетикэр, 2026-2027 гъэхэм я бжьыхьэ-щIымахуэ гъэп­лъы­гъуэм хуэгъэхьэзырыным. Къэралымрэ щIы­­налъэ­хэм­рэ я унафэщIхэр зым ищIэм адрейр щыгъуэзэн хуэдэу, зэрызэлъэIэсыпхъэр къыхагъэщащ. Энергиемрэ гъэсыныпхъэ­хэм­рэ къемэ­щIэкI ­хъу­мэ, къагъэщхьэпэ хъуну гъэ­тIы­лъы­гъэхэр зыхуэдизыр къапщытэжын зэрыхуейми и гугъу ящIащ. 
Энергиер зэбгрызытыкI IуэхущIапIэ ин ды­дэхэм я унафэщIхэм зэIущIэм кърихьэлIахэр щыгъуазэ ящIащ бжьыхьэмрэ щIымахуэмрэ ­къриубыдэу, псори мардэм тету ягъэлэжьэну зэрамурадым. 
Гъэплъыгъуэ пIалъэм ирихьэлIэу, Къэбэрдей-Балъкъэрым икIэщIыпIэкIэ къэбгъэщ­хьэпэ ­хъуну гъэтIылъыгъэхэр щызэрагъэпэщащ, ар энергетикэм къыщысэбэп Iэмэпсымэ е IуэхущIапIэхэр зыхуэныкъуэ хьэпшып ирехъу.­ ЦIыху 746-м нэс хъууэ, авариехэр зыгъэзэкIуэж лэжьакIуэ гупхэр зэрагъэуIуащ. Абыхэм папщIэ техникэ хэхауэ 247-рэ щыIэщ, дэтхэнэ зы­ри зыхуэныкъуэ IэмэпсымэхэмкIэ къызэгъэпэщауэ.