Клуб цIэрыIуэм и цIэр фIащащ

КъБР-м и Iэтащхьэ КIуэкIуэ Казбек УФ-м ЗыхъумэжынымкIэ и министерствэм и Армэ спорт клуб нэхъыщхьэм (ЦСКА) и унафэщI Громов Артём хуэзащ. 

«Дэ ЦСКА клубым спорт IуэхукIэ дыдолажьэ, псалъэм папщIэ, бгым дэкIынымкIэ, - итхыжащ КIуэкIуэ Казбек зэIущIэм щытеп­сэлъыхьым. - Дызэрыт илъэсым и мазаем Кавказ къурш нэхъыщхьэм цIэ зимыIэ и щыгухэм я зым ЦСКА-м и цIэр фIащащ. Абы теухуа унафэм Iэ щIидзащ УФ-м и Правительствэм и УнафэщI Мишустин Михаил. 
ЦСКА-м и цIэр зезыхьэ Щыгум метр 3721-рэ и лъагагъщ. Абы и бгъэдыхьэпIэм эколъагъуэ къыщызэIутхащ, илъэси 100-м нэс тхыдэ зиIэ клубым и фэеплъу. 
Къуршым альпинист лъагъуэ щыпхашащ, зэрыдэкIуея бжыгъэр къэзыпщытэ стелэ ягъэуващ. Ипэ тхьэмахуитIым къриубыдэу, абы дэкIуеящ цIыху 260-м нэс. 
Нобэ клубым и лIыкIуэхэр Къэбэрдей-Балъкъэрым къэкIуащ, а хэ­купсэ Iуэху дахэм папщIэ фIыщIэ къытхуащIыну. 
Мэкъуауэгъуэм Iуащхьэмахуэ лъапэ щекIуэкIащ «Урысейм и къурш­хэр. Iуащхьэмахуэ 2026» чемпионатыр. Урысейм и махуэм ирихьэлIэу, дзэм хэт цIыху зыбжанэ ЦСКА-м и цIэр зезыхьэ Щыгум дэкIахэщ». 
КIуэкIуэ Казбек Громов Артём фIыщIэ хуищIащ Къэбэрдей-­Балъкъэрым спортым, бгы туризмэм, псоми фIыуэ ялъагъу ЦСКА клубым и пщIэр зыIэт Iуэхугъуэхэм зэрыщызригъэужьым щхьэкIэ.