Къэбэрдей-Балъкъэрыр зэгъэзэхуэнымкIэ щапхъэщ

КъБР-м и Парламентым и УнафэщI Егоровэ Татьянэ хабзэубзыху IуэхущIапIэм и Президиумым и зи чэзу зэIущIэр щригъэкIуэкIым, «комитетым и сыхьэтым» хыхьэу депутатхэр едэIуащ БюджетымкIэ, на­логхэмрэ финанс IуэхухэмкIэ комитетым 2024 гъэм и фокIадэм къыщыщIэдзауэ 2026 гъэм и фокIадэ пщIондэ иригъэкIуэкIа лэжьыгъэм.

Къыхалъхьа жэрдэмхэмрэ къэпщытэныгъэ лэжьыгъэхэм­рэ кърикIуам тепсэлъыхьащ комитетым и унафэщI АфэщIа­гъуэ Михаил. Зи гугъу ящI пIалъэм къриубыдэу комитетым и нэIэм щIэт Iуэхухэм епхауэ республикэм и Парламентым хабзэ 25-рэ къищтащ. Къэпсэлъам къызэрыхигъэщамкIэ, ахэр нэхъыбэу зыхуэунэтIар республикэ, муниципальнэ бюджетхэр егъэфIэкIуэнырщ.
- Iуэхур ехъулIэныгъэ иIэу зэ­рыдгъэзащIэмкIэ Къэ­бэрдей-Балъкъэрыр къэралым япэ увыпIэ щызыIыгъ щIыналъэхэм ящыщ зыщ, ар мызэ-мытIэу ­къигъэлъэгъуащ УФ-м ФинансхэмкIэ и министерствэм, - жиIащ АфэщIагъуэм.
Ар къытеувыIащ комитетым и лэжьыгъэ нэхъыщхьэхэм ящыщ зым – республикэ бюджетыр къызэращтэмрэ зэрагъэзащIэм я нэIэ зэрытетымрэ. АфэщIагъуэ Михаил жиIащ республикэм и дэфтэр нэхъыщ­хьэр къыщащтэм, комитетхэм я зэIущIэхэм къыщыхалъхьэ зэхъуэкIыныгъэхэмрэ чэнджэщ­хэмрэ япкъ иткIэ 2025 гъэм бюджетыр зыхуеинур сом мелард 1-кIэ нэхъыбэ зэращIар. 
Къэпсэлъам къыхигъэщащ дзэ Iуэху хэхам хэтхэмрэ абыхэм я унагъуэхэмрэ защIэгъэкъуэ­ныр япэ ирагъэщ лэжьыгъэу къызэрынэр, абы епха ­Iэмал куэд къызэрагъэсэбэпыр. Илъэс къэс а мурадхэм сом меларди 5-м щIигъу хухах. ­Къи­щы­­нэмыщIауэ, дзэ Iуэху хэхам хэтхэмрэ абыхэм я уна­гъуэхэмрэ хуэгъэкIуатэ яIэу Iуэ­ху зэхуэмыдэхэмкIэ зыщIагъакъуэ. АфIэщIагъуэм къызэри­лъы­тэмкIэ, комитетым и лэ­жьыгъэм и мыхьэнэмрэ жэ­уапл­ыныгъэмрэ зыхуэдэр къегъэлъагъуэ КъБР-м и Iэтащхьэм къыхилъхьэ законопроектхэм я процент 80-м нэблагъэр я нэIэ зэрыщIэтым.
Комитетым и къалэнхэм ящыщщ фIэкIыпIэ зимыIэ медицинэ страхованэмкIэ щIына­лъэ­ фондым и бюджетым теухуа законхэм я проектхэм хэп­лъэнри. Апхуэдэуи мыхьэнэ ­зи­Iэ унэтIыныгъэхэм хохьэ ­Къ­Б­Р-м и КъэпщытакIуэ-къэ­зыбж палатэм и лэжьыгъэм ­кърикIуахэм зыщагъэгъуэзэ­ныр. 
- Комитетым адэкIи пищэнущ щIыналъэм и бюдже­тым и хэхъуэмрэ къигъэсэбэпхэмрэ зэ­ры­зэрагъэзахуэм кIэлъыплъы­ным, ди цIыхухэм я псэукIэр егъэ­фIэкIуэнымкIэ Iэмалхэм елэ­жьыным, - къыхигъэщащ АфэщIагъуэм.
Егоровэ Татьянэ жиIащ комитетыр жыджэру зэрылажьэр икIи республикэм и бюджетым епха дэфтэр нэхъыщхьэм ще­лэжьым зыхуеину тхыгъэ псори абы и пIалъэм КъБР-м и Парламентым къызэрыщыхилъхьэр. Хабзэубзыху IуэхущIапIэм и УнафэщIым гу лъаригъэтащ ко­­митетыр КъБР-м и Къэп­щы­такIуэ-къэзыбж палатэм куп­щIафIэу зэ­рыдэлажьэми. 
ЗэIущIэм депутатхэр щытеп­сэ­лъыхьащ «Хэхыныгъэхэмрэ референдумхэмрэ ятеухуа республикэ хабзэхэм зэхъуэкIыныгъэхэр хэлъхьэным и IуэхукIэ», «КъБР-м и муниципальнэ районхэмрэ къалэ округхэмрэ щIыпIэ унафэр зехьэнымкIэ я IэнатIэхэм балигъ мыхъуахэм кIэ­лъыплъын, сабий зеиншэ­хэмрэ адэ-анэм я нэIэм щIэ­мыту къэнахэмрэ я хуитыныгъэхэр хъумэн, псэупIэ пэшхэмкIэ къызэгъэпэщын и лъэны­къуэ­­кIэ къэрал пщэрылъ щхьэ­хуэхэм къару ямыIэжу къэлъытэнымрэ республикэ закон хэхахэм зэхъуэкIыныгъэхэр хэлъ­хьэнымрэ теухуа республикэ законхэм я проектхэм.
Депутатхэр хэплъащ щыпсэуну щIыпIэр къыхахынымкIэ цIы­ху­хэм яIэ хуитыныгъэхэм, цIы­хубэ зыхъумэжыныгъэм, ОВД-м и лэжьакIуэхэм я шэ­сыпIэхэм, хьэрычэт Iуэху мыинымрэ ку­рытымрэ зегъэужьыным, страховой пенсэхэм, архив Iуэхум, нэгъуэщIхэми ятеухуа феде­раль­нэ законопроектхэм.
КъБР-м и Парламентым Жы­лагъуэ шынагъуэн­шагъэм­рэ Iулъхьэм пэщIэтынымкIэ и комитетым и унафэщI Кривко Михаил тепсэлъыхьащ УФ-м те­зырхэр­ егъэпшынынымкIэ и фе­­деральнэ ­къу­лы­къущIапIэм и управленэу КъБР-м щыIэм 2025 гъэм иригъэкIуэкIа лэжьыгъэм хэплъа иужь­кIэ, Президиумым и чэнджэщхэр зэрагъэзэщIам. 
Депутатхэм унафэ къащтащ щIыпIэ унафэр зезыхьэ IэнатIэхэмрэ Къэбэрдей-Балъкъэр къэрал мэкъумэш университетымрэ я лэжьакIуэ зыбжанэм КъБР-м и Парламентым и ЩIыхь тхылъыр иратыну.
КъБР-м и Парламентым и Аппаратым и лэ­жьакIуэхэмрэ депутатхэмрэ ящыщу Санкт-Петербург и Хабзэубзыху Зэхуэ­сым и саугъэтыр зы­хуагъэфэщахэм мы зэIущIэм щратыжащ. Парламентхэм я зэпыщIэныгъэр гъэбыдэным хуащI хэлъ­хьэ­ныгъэр къалъытэу, ЩIыхь тхылъ къы­хуагъэфэщащ КъБР-м и Парламентым и УнафэщI Егоровэ Татьянэ, абы и къуэдзэхэу Жанатаев Сэлим, Къардэн Мурат сымэ. 
Санкт-Петербург и Хабзэубзыху Зэхуэсым и УнафэщI Бельс­кий Александр и ФIыщIэ тхылъхэр иратащ КъБР-м и Парламентым Егъэджэны­гъэм­кIэ, щIэныгъэмкIэ, физическэ щэнхабзэмкIэ, спор­тым­рэ щIалэгъуалэм я IуэхухэмкIэ и комитетым и унафэщI Емуз Нинэ, республикэм и хабзэубзыху IуэхущIапIэм и депутатхэу Амщокъуэ ФатIимэтрэ Мечукаев Алихъанрэ, КъБР-м и Парламентым и УнафэщIым и секретариатым и унафэщI ЦIыпIынэ Заурбэч сымэ. ФIыщIэ тхыгъэкIэ ягъэлъэпIащ ­КъБР-м и Парламентым и УнафэщIым и чэнджэщэгъу пажэ ФочыщIэ Наталье.

КъБР-м и Парламентым и пресс-IуэхущIапIэ.