Адыгэшымрэ адыгэлIымрэ

Адыгэшымрэ адыгэлIымрэ я зэпыщIэныгъэр нэхъ быдэ хъу зэпытурэ къокIуэкI лIэщIыгъуэкIэрэ. Гъэ къэси адыгэ зэрыс хэгъэгухэм зэхыхьэ гъэщIэгъуэнхэр къыщызэрагъэпэщ, лIы щыпкъэхэр щызэпоуэ, шы лъэрызехьэхэм я зэфIэкIхэр щагъэунэху. Апхуэдэу иджыблагъэ Адыгэ Республикэм щрагъэкIуэкIащ «Шэрджэс зекIуэ - Фыщт 2026» зи фIэщыгъэ Iуэху дахэр. Гуапэ зэрыхъущи, абы щытекIуар Къэрэшей-Шэрджэсым щыщ адыгэ щIалэщ. Абы теухуа хъыбар къытхуитхыжащ ГъукIэкъул Иринэ.

АтIэ, зекIуэм и къалэну щытар адыгэшымрэ абы и уанэгум ис шумрэ я бэшэчагъыр, псынщIагъыр къэхутэнрат, адыгэшым и Iуэхур къэгъэщIэрэщIэжыным цIыху нэхъыбэм гу лъегъэтэнырт, щIалэгъуалэр а спорт лIэужьыгъуэм къыхэшэнырт, адыгэм и щIэиныр хъумэнырт.

А псом ипкъ иту, зекIуэм и гъуэгуанэр бгылъэ щIыпIэхэм щаукъуэдиящ: гъуэгум и кIыхьагъыр километр 60 хъурт, ар зэм удэкIуейуэрэ, зэм укъехыжурэ гъэпсат. ИкIи хым елъытауэ гъуэгуанэм и лъагагъыр куэдкIэ зэщхьэщыкIыу щытащи, ари зекIуэр нэхъри гугъу зыщIа щхьэхуэныгъэщ. Шухэр Даховская жылэм къыщежьэри, Мэзмей къуажэмкIэ яунэтIащ, абы Мэзмей бгыр къыкIэлъыкIуащ, зекIуэр Фыщт хьэщIэщым щаухащ.

Мы зекIуэр зэпеуэ къудейтэкъым, атIэ, узыфIэмыкIыжыну шумрэ шымрэ я хьэлым, а тIур зэрызэгурыIуэм, я къарум, зэфIэкIым и гъэунэхупIэт! Мыбдеж мыхьэнэшхуэ щиIэт гъуэгум псынщIэу хэгъэщIыным къинэмыщIауэ, къарур тыншу гъуэгуанэ псом тегуэшэнми.

Къыхэгъэщыпхъэщ, зекIуэм шу 12 зэрыхэтар. Ахэр дэтхэнэри зытесар адыгэшщ, апщыгъуэми шым и ныбжьыр илъэситхум щегъэжьауэ нэхъыжьми хъунут.

Бгылъэхэм щыпхаша гъуэгу гугъур къызэранэкIыфащ зекIуэм къыхыхьа псоми. Езы шухэми я адыгэшхэми я цIэр ижь-ижьыж лъандэрэ тхыдэм пщIэ яIэу зэрыхэIуар ягъэпэжыжащ. АтIэ, адыгэшыр илъэс щэ бжыгъэкIэрэ ди цIыхубэм къагъэщIа, зауэм, гъуэгуанэ кIыхьым хуэгъэпса шы лIэужьыгъуэщ. Мы шыхэм я конституцэр лъэщщ, узыншагъэ быдэ яIэщ, бэшэчагъ къызэрымыкIуэ яхэлъщ.

Гугъуехь нэужьым щIэх зыкъащIэж, я къару зрагъэгъуэтыж, жьыуэпсым, къэхъукъащIэ зэхуэмыдэхэм щIэх йосэ. Абы и фIыщIэкIэ адыгэш гуартэхэр уафэ лъащIэм щаIыгъ, щIымахуэ щIыIэ дыдэ хъумэ шэщым щIагъэхьэ. Апхуэдэ щытыкIэ-зэхэлъыкIэхэм къахэкIыу адыгэшым щIэупщIэ иIэурэ къекIуэкIащ. Абы теухуа хъыбархэр КъухьэпIэ Азием щыщIэдзауэ КъуэкIыпIэ Европэм нэс щызекIуэрт. Адыгэшым сыт и лъэныкъуэкIи адыгэ лъэпкъым и блэкIар къыдигуэшащ, и цIыхубэм къащыщIа мыгъуагъэм ижь абыи къыщIихуащ, жагъуэ зэрыхъущи. Абы къыхэкIыу, нобэкIэ адыгэшым и бжыгъэр куэд хъужыркъым. Ауэ гуапэщ адыгэшыр гъэбэгъуэжыным нобэ адыгэлI куэд егупсыс, абы хуэлажьэ зэрыхъуар. ИкIи мы зи гугъу тщIы дауэдапщэр абы и щапхъэфIщ.

Догугъэ илъэс мин бжыгъэхэм къриубыдэу ди адэжьхэм къагъэщIа шы лIэужьыгъуэ Iущыр, къуэш пэлъытэу яIар нобэм хэпсэукIхэм зыIэщIэдмыгъэкIыу, абы мыхьэнэуэ иIэр къыдгурыIуэу ди пщэдейм дымыгъэкIуэду здыхэтшэну.

МыдэкIэ ди зэпеуэмкIэ дгъэзэжынщи, абы хэта псоми фIыуэ зыкъагъэлъэгъуа пэтми, зэхьэзэхуэ щыхъукIэ, зыгуэркIэ нэхъ ефIэкIахэри щыIэщ. АтIэ, зэпеуэм и щытыкIэм къызэригъэувымкIэ, гъуэгур сыхьэт 11-м фIэмыкIыу шухэм къызэранэкIыпхъэт, апщыгъуэми шым и къарури фIыуэ къызэтенэу.

Апхуэдэу, зекIуэр зэрекIуэкIар къапщытэжа нэужь, япэрей увыпIищыр хуагъэфэщащ: япэр - Къэрэшей-Шэрджэсым щыщ Дыгъужь Рустамрэ абы и Атлант адыгэшымрэ; етIуанэр - Адыгэ Республикэм щыщ Чамокъуэ Рэмэзанрэ и Гирей шымрэ; ещанэр - Адыгэ Республикэм щыщ Къэзанокъуэ Дамиррэ и Карат шымрэ.

Япэ увыпIэр зылъыса Дыгъужь Рустам хуагъэфэщащ Адыгэ Республикэм и Iэтащхьэм и кубокымрэ дипломымрэ. Абыхэм ящIыгъуащ зэпеуэм и тыгъэ нэхъыщхьэр - «Майкопский» КФХ-м щыщ шыщIэ цIыкIум и сертификатыр. ШыщIэр къыщIэхъуащ «Иппосфера»-м адыгэшхэр щыщагъэлъагъуэм и чемпион хъуауэ щыта Ансар шым. Ар адыгэш къабзэм и щапхъэ нэхъыфI дыдэхэм языхэзщ.

ЕтIуанэ, ещанэ увыпIэхэр зылъысахэми кубокрэ дипломрэ хуагъэфэщащ. ИкIи цIыхухъу цей зэрыхуадынумкIэ сертификатхэр тыгъэ хуащIащ.

ТекIуэныгъэр зылъыса Рустам Хъумэрэ къуажэм щыщщ, ар илъэс 28-рэ хъуауэ шы Iэпслъэпсхэр, уанэхэр зыщI Дыгъужь СулътIан и къуэщ.

Мыри жыIапхъэщ, Атлант адыгэшым абы трилъхьар и адэжьхэм яйуэ щыта, адэм къигъэщIэрэжа, илъэс 200 зи ныбжь уанэращ...

Атлант и гугъу пщIымэ, ар «Малкэ» заводым къыщыхъуащ, Арес шым къыщIэхъуащ. Атлант шыгъажэхэми, зекIуэ гугъухэми фIыуэ зыкъыщигъэлъэгъуагъэххэщ.

Адыгэшыр къэгъэщIэрэщIэжыным, ар гъэбэгъуэжыным гукIи псэкIи хуэлажьэ гупщ мы зекIуэ гъэщIэгъуэныр къызэзыгъэпэщахэр. Ар Адыгэ Республикэм щылажьэ Шу Хасэрщ. Проектыр ягъэзэщIащ Президентым и грантхэмкIэ фондымрэ Адыгэ Республикэм и грантхэмрэ я щIэгъэкъуэну.

КъинэмыщIауэ, АР-м Мэкъумэш IэнатIэмкIэ и министерствэри, ЩIалэгъуалэ IуэхухэмкIэ комитетри дэIэпыкъуэгъу хъуащ.

КIэух псалъэу жыIапхъэщ мыпхуэдэ IуэхугъуэфIхэр къызэзыгъэпэщ, ахэр дахэу екIуэкIыным хэлэжьыхь, мылъкукIэ, унафэкIэ щхьэпэу къыхыхьэ дэтхэнэми фIыщIэ зэрахуэфащэр! Лъэпкъым и сыт хуэдэ хъугъуэфIыгъуэри, щIэинри зыхъумэнрэ зезыхьэнрэ Тхьэм куэду къытхигъэкI!

Ди хэкуэгъу Дыгъужь Рустам и ехъулIэныгъэмкIэ дохъуэхъу, адыгэлIым хуэфащэ и зэфIэкIым дропагэ!

Дарий Дахэнур.