Зи ныбжь хэкIуэтахэм я махуэм

«Урысей зэкъуэт» политикэ партым Налшык щиIэ и къудамэм щагъэлъэпIащ зи ныбжь хэкIуэтахэм я махуэр - нэхъыжьхэр кърагъэблагъэри ерыскъы IэнэкIэ ягъэхьэ-щIащ, макъамэкIэ, уэрэдкIэ, къафэкIэ я нэгу зрагъэужьащ.

 Махуэшхуэм теухуа хъуэхъу дахэкIэ къызэхуэсахэм захуи­гъэзащ Налшык дэс ветеранхэм я зэгухьэныгъэм и унафэщI Абдуллаев Мустафа.
- Нобэрей махуэр ди гум куэдрэ щыхуэбэнущ, гукъэкIыж IэфIхэри къыхэтхынущ.Тхьэм псоми узыншагъэ къывит! - жиIащ абы. 
- «Илъэсхэм къыпхах пщIэрэ щIыхьрэ» фIэщыгъэр иIэщ «Урысей зэкъуэт» политикэ партым къыщызэдгъэпэща Iуэхум. Къедгъэблэгъащ лэжьыгъэм, IэщэкIэ зэщIэузэда       къарухэм я ве­теранхэр, Ленинград и блокадэм хиубыдахэр, Хэку зауэш­хуэм и лIыхъужьхэм я фызабэхэр, фашист гъэрыпIэм исахэр, зи сабиигъуэр зауэм хиубыдахэр. Партым зэпымыууэ гулъытэ яхуещI жьыкIэфэкIэм, нэхъыжьхэр лъытэныр ди къалэн нэхъыщхьэхэм ящыщщ, - жиIащ «Урысей зэкъуэт» политикэ партым Налшык щиIэ и къудамэм и гъэзэщIакIуэ секретарь Адыгэунэ Анжелэ. 
- Къедгъэблэгъащ илъэс хыщIым щхьэдэх ныбжь зиIэхэр, илъэс ищIым, бгъущIым щIигъуахэр яхэтщ. Абыхэм гуапагъэ зыхебгъэщIэныр куэд и уасэщ. Ахэр дэркIэ зэрылъапIэр, я псалъэхэмрэ я чэнджэщхэмрэ дызэрыхуэныкъуэр зыхедгъэщIэну сыхуейщ. Сащыдэуэршэрым деж е хъыбар гуэр къысхуаIуэтэжмэ, гъащIэм куууэ зэрыхэплъэр, я псалъэм акъыл зэрыхэлъыр солъагъу. 
Нэхъыжьхэм къыхузэрагъэпэща пшыхьыр уэрэдкIэ ягъэдэхащ КъБР-м щэнхабзэмкIэ щIыхь зиIэ и лэжьакIуэ Дым Елдаррэ уэрэджыIакIуэ Аппаев Ислъамрэ.