Уней IуэхущIапIэхэм заужь

2026 гъэм жэпуэгъуэм и 1-м ирихьэлIэу Къэбэрдей-Балъкъэрым розницэ сатум хэт и уней IуэхущIапIэхэм (ИП), автомобилхэмрэ мотоциклхэмрэ зыщэхэр яхэмыту, я бжыгъэм процент 0,4-кIэ е 28-кIэ кIэрыхуащ икIи 6850-рэ ахэр хъуащ,  къитащ Кавказ Ищхъэрэм Къэрал статистикэмкIэ и управленэм.

  Къэбгъэлъагъуэмэ опт, розницэ сатум хэт ИП-хэм я бжыгъэр, автотранспортхэмрэ мотоциклхэмрэ зэзыгъэпэщыжхэри яхэту, процент 0,4-кIэ е 13-кIэ нэхъ мащIэ хъуащ икIи ар 8205-м нызэрыхьэсащ.

Опт сатум хэт уней IуэхущIапIэхэм, автомобилхэмрэ мотоциклхэмрэ зыщэхэр хэмыту, я бжыгъэр процент 1,5-кIэ е 13-кIэ нэхъ мащIэ хъуащ, 853-ми нызэрыхьэсащ. Апхуэдэу щыхъукIи, автотранспортхэмрэ мотоциклхэмрэ зэзыгъэпэщыжхэм я бжыгъэм 5-кIэ къыхэхъуащ икIи 502-рэ хъуащ.

Къуажэ, мэз хозяйствэхэм, щэкIуэным, бдзэжьей ещэнымрэ къэгъэхъунымрэ хэт ИП-хэм я бжыгъэр процент 0,7-кIэ е 8-кIэ нэхъ мащIэ хъуащ, I090-м нызэрыхьэсащ. Мыбдежым хэщIыныгъэр щынэхъыбэр къуажэ хозяйствэм щылажьэ уней IуэхущIапIэхэрщ: хьэрычэтыщIэхэм я бжыгъэр процент 0,7-кIэ е 7-кIэ нэхъ мащIэ хъуащ икIи 1061-м нэсащ.

 Ерыскъымрэ ерыскъыхэкIымрэ елэжь ИП-хэми я бжыгъэр процент 0,7-кIэ е 3-кIэ нэхъ мащIэ хъуащ, икIи 407-м нызэрыхьэсащ.

 Апхуэдэу щыхъукIи, къапщытэж пIалъэм къриубыдэу Къэбэрдей-Балъкъэрым и уней IуэхущIапIэхэм я бжыгъэм проценти 2-кIэ е 367-кIэ нэхъыбэ хъуащ икIи псори зэхэту I8 696-м нызэрыхьэсащ. Хэхъуэ нэхъыбэ здэщыIэр хьэлъэхэр гъэIэпхъуэнымрэ пхъэщхьэмыщхьэ, гъавэ, хьэпшып, н.къ. хъумапIэхэмрэ япыщIа ИП-хэм я дежщ. Абыхэм къахэхъуащ IуэхущIапIэу 149-рэ е проценти 6,3-кIэ нэхъыбэ хъуащ. Апхуэдэ уней IуэхущIапIэхэр иджыпсту 2506-рэ мэхъу.

ЩIэныгъэ, егъэджэныгъэ, техническэ хуэIухуэщIэхэм хэт ИП-хэм я бжыгъэм проценти 10,9-рэ е 104-рэ къыхэхъуащ икIи I056-м нызэрыхьэсащ.

Информацэмрэ связымрэ хэт уней IуэхущIапIэхэм я бжыгъэри проценти 9,1-кIэ е 37-кIэ нэхъыбэ хъуащ, 442-м нызэрыхьэсащ.

Ухуэныгъэм хэт ИП-хэм я хэхъуэр проценти 3,3-кIэ е 26-кIэ нэхъыбэ хъуащ икIи 8II-м нызэрыхьэсащ.

ПсэупIэхэр щэн-къэщэхун хуэIухуэщIэхэм хэт ИП-хэм я бжыгъэм проценти 3,6-кIэ е 22-кIэ къыхэхъуащ, псори зэхэтуи 637-рэ хъуащ.

 Iуэхутхьэбзэ зэхуэмыдэхэр щызэрахьэ уней IуэхущIапIэхэм я бжыгъэм проценти 4,1-кIэ е 27-кIэ къыхэхъуащ икIи 679-м нызэрыхьэсащ. Административнэ хуэIухуэщIэхэм хэт е абы пыщIа Iуэхутхьэбзэхэр зылэжь ИП-хэм я бжыгъэр процент 1,9-кIэ е 9-кIэ нэхъыбэ хъуащ икIи 476-м нызэрыхьэсащ.

ХьэщIэщ, шхапIэ бизнесым хэт уней IуэхущIапIэхэм я бжыгъэм процент 0,7-кIэ е 8-кIэ къыхэхъуащ, I082-м нызэрыхьэсащ.

Продукцэ зэхуэмыдэхэр къыщIэзыгъэкI, абыхэм елэжь ИП-хэм я бжыгъэм процент 0,9-кIэ е 10-кIэ къыхэхъуащ, икIи 1117-м нызэрыхьэсащ. Абы щыщу гъущIым къыхэмыщIыкIа минерал продукцэхэр къыщIэзыгъэкI уней IуэхущIапIэхэм я бжыгъэм проценти 9-кIэ е 7-кIэ къыхэхъуащ икIи 85-рэ хъуащ. ГъущIым къыхэщIыкIа продукцэ хьэзырхэр къыщIэзыгъэкI ИП-хэм, машинэхэмрэ обрудованэхэмрэ яхэмыту, я куэдагъым проценти 3,9-кIэ е 3-кIэ къыхэхъуащ, икIи 80-м нызэрыхьэсащ.

 Машинэхэмрэ обрудованэхэмрэ зэзыгъэпэщыж, ахэр зыгъэув уней IуэхущIапIэхэм я бжыгъэм процент 16,7-кIэ е 8-кIэ къыхэхъуащ, икIи 56-м нызэрыхьэсащ.

  Кавказ Ищхъэрэм Къэрал статистикэмкIэ и управленэм къызэрыхигъэщымкIэ, абы къигъэлъэгъуа статистикэм хохьэ уней IуэхущIапIэу хъуар, уэчылхэри нотариусхэри яхэту, ауэ фермер IуэхущIапIэхэм я унафэщIхэр къищтакъым.

     ХЬЭЩОКЪУЭ Алыдж.

Поделиться: