СурэтыщIым и лъагъуэФэеплъ Адыгэ сурэтыщI цIэрыIуэ Маргъущ Анатолэ псэужамэ, и ныбжьыр щэкIуэгъуэм и 21-м илъэс 70 ирикъунут. Маргъущ Анатолэ 1951 гъэм Къыргъызстаным и Маилису къалэм къыщалъхуащ. 1974 гъэм къиухащ Москва щыIэ текстиль институтым декоративно-прикладной гъуазджэхэмкIэ и факультетыр. 1978 гъэм хагъэхьащ УФ-м и СурэтыщIхэм я зэгухьэныгъэм. Республикэм и художник цIэрыIуэ куэдми хуэдэу, Анатолий щеджащ Сабий творчествэмкIэ республикэ унэм сурэт щIыным щыхуэзыгъасэу, пщIэшхуэ зиIэу щыта Лукич Андрей и деж. Гъуазджэм лъагъуныгъэ ин хузиIэ и егъэджакIуэм ар нэхъри сурэт щIыным дригъэхьэхат. СурэтыщIым къыщIэна лэжьыгъэ купщIафIэхэр теухуащ ди щIыналъэм и щIыуэпс къулеймрэ абы щыпсэу цIыхухэмрэ. Маргъущым псом хуэмыдэу къехъулIауэ къалъытэ Тюмень къалэм и Гуащэ театрым, Налшык щэкI щызэIуащэ и фабрикэм, Москва къалэм и ЦУМ-м яхуищIа лэжьыгъэ хьэлэмэтхэр. Анатолэ и лъагъуэм ирикIуэжащ абы и къуэ, УФ-м и СуртыщIхэм я зэгухьэныгъэм хэт, ХудожествэхэмкIэ Пащтыхь академиер къэзыуха, портретхэр фIыуэ къызэхъулIэ Маргъущ Залым. Мы зэманым ар Санкт-Петербург къалэм щопсэу, и адэм и IэщIагъэ дахэм пещэ. Маргъущ Анатолэ лъэужьыфI къигъэнащ. СурэтыщIыр ящыгъупщэркъым и унагъуэм, и лэжьэгъухэм, и сурэтхэр зигу дыхьэхэм.
Поделиться:
Читать также:
14.04.2024 - 10:54 →
Куэд къэзымыгъащIэу куэд зылэжьа
10.04.2024 - 12:00 →
ЕгъэджакIуэр ящыгъупщэркъым
31.03.2024 - 09:22 →
Зыужьыныгъэм и лъагъуэм ирокIуэ
17.03.2024 - 11:10 →
Илъэс 40 гъуэгуанэ
17.03.2024 - 10:08 →
СурэтыщI, егъэджакIуэ
|