НОБЭ

♦Урысей Федерацэм и прокуратурэм и лэжьакIуэм и махуэщ. 1722 гъэм Пётр Езанэм къэрал органыщIэ – Урысейм и прокуратурэр – къызэригъэпэщащ. Урысейм и япэ прокурору ягъэуват Ягужинский Павел.
♦1820 гъэм Инджылызым къыщызэрагъэпэщащ Пащтыхьыгъуэм и астрономие зэгухьэныгъэ.
♦1922 гъэм Къэрэшей-Шэрджэс АО-р къэунэхуащ.
♦1936 гъэм «Локомотив» спорт зэгухьэныгъэр къызэрагъэпэщащ.
♦1945 гъэм советыдзэхэм Вислэ, Одер псыхэм деж щебгъэрыкIуэн щIадзащ. ЩIышылэм и 12 – мазаем и 3-хэм екIуэкIа а зауэшхуэм мыхьэнэшхуэ иIащ Польшэр фашистыдзэхэм къаIэщIэгъэкIыжынымкIэ.
♦1950 гъэм СССР-м и Совет Нэхъыщхьэм и Президиумым къищтащ Хэкум епцIыжахэм, нэгъуэщI щIэпхъаджагъэ хьэлъэ зылэжьахэм я судыр укIкIэ ящIэну хуит зыщI унафэ. Ди къэралыр абы тетащ I996 гъэ пщIондэ.
♦1628 гъэм къалъхуащ франджы тхакIуэ, усакIуэ, дуней псом цIэрыIуэ щыхъуа таурыхъ куэд зи къалэмыпэм къыщIэкIа Перро Шарль.
♦1876 гъэм къалъхуащ США-м щыщ тхакIуэ цIэрыIуэ Лондон Джек (и цIэ-унэцIэ дыдэр Джон Гриффит Чейнищ).
♦1903 гъэм къалъхуащ совет физик цIэрыIуэ, СССР-м япэ атомнэ бомбэ щызыщIа гупым и унэтIакIуэу щыта Курчатов Игорь.
♦1907 гъэм къалъхуащ академик, Социалист Лэжьыгъэм тIэунейрэ и ЛIыхъужь Королёв Сергей.
♦1916 гъэм къалъхуащ техникэ щIэныгъэхэм я доктор, РСФСР-м щIыхь зиIэ и егъэджакIуэ Къатхъэн Чэрим.
♦1936 гъэм къалъхуащ композитор, пианист цIэрыIуэ, СССР-м и цIыхубэ артист Паулс Раймонд.
♦1948 гъэм къалъхуащ ЩIДАА-м и академик, Къэрэшей-Шэрджэс Республикэм и Жылагъуэ палатэм хэт, Урысейм ис адыгэхэм я лъэпкъ-щэнхабзэ автономием и унафэщI Уэхъутэ Александр.
Дунейм и щытыкIэнур
«pogoda.yandex.ru» сайтым зэритымкIэ, Налшык пшэр техьэ-текIыу щыщытынущ. Хуабэр махуэм градуси 4 - 8, жэщым градус 1 – 2 щыхъунущ.
Лъэпкъ Iущыгъэ:
Гунэс ямыщI саугъэт умыщI.