Зи хъуэпсапIэр нахуапIэ хъуахэр

«Хамэ хэку сыщытхъэ нэхърэ си хэкIужь сыщылIэ», - жызыIэ ди лъэпкъэгъухэм я щапхъэщ зыхуей хуэзэу нэгъуэщI къэрал щыпсэуми, я адыгэгум я хэкужь къишэжауэ псэу ди къуэшхэр. Абыхэм ящыщ зыбжанэм я гупсысэмрэ псэукIэмрэ зыхуэдэр фэдгъэцIыхумэ, ди гуапэщ.
Джэйхьун Гумуш: Илъэс 17 си ныбжьу, Мейкъуапэ зы илъэс сыдэсынщи, урысыбзэ зэзгъэщIэнщ, университетым сыкIуэнщ жысIэри сыкъэкIуэжат. Зы гугъуехьи симыIэу сыщыпсэурт Истамбыл, ауэ си гур ХэкумкIэ щыIэт.
КАФФЕД-м адэжь щIыналъэм щеджэну хуейхэр къигъэкIуэну хуитыныгъэ къыщыдихым, сэри абы зыхэзгъэхуащ. ЩIэныгъэ зэзгъэгъуэтын хуей щыхъум, къыхэсхар медицинэращ. Абы сыхуеджэри, дохутыр сыхъуащ. Иджыпсту Мейкъуапэ къэрал технологие университетым доктор диссертацэр щызогъэхьэзыр.
Дохутыру Мейкъуапэ сыщолажьэ, си Iуэхухэри хъарзынэу докI.
Макбулэ Озлу: 1992 гъэм мазаем 25-м пщыхьэщхьэм сыхьэтыр тхум Мейкъуапэ дыкъэсащ. Ди пщащэ цIыкIум и ныбжьыр мазиплI фIэкIа мыхъуауэ, ди унэр тщэжщ, диIэ тIэкIур къызэщIэткъуэри, дыкъежьэжат. Иджы Адыгейм и щыхьэрым дыдэсщ. Сэ сыегъэджакIуэщ, Ататюрк университетым биологиемкIэ къудамэр къыщызухащ. Ауэ си IэщIагъэм срилажьэркъым иджыпсту, бэзэрым шхапIэ щызиIэщ.
Гугъэ, гупсысэ инхэр диIэу дыкъэкIуэжакъым. КъищынэмыщIауэ, къыщыдгъэзэжа лъэхъэнэм Урысейм зэхъуэкIыныгъэшхуэхэр къыщыхъурт. Гугъут а зэманыр. Ауэ иджы дытыншыжащ, зыми дыщымыщIэу допсэу, дызыхуейр догъуэт. Мейкъуапэ апхуэдизкIэ гупсэхугъуэрэ гушхуэныгъэрэ щыбогъуэтри, нэгъуэщI щIыпIэ укIуэну ухуеижынукъым.
Аскер (ГъукIэ) Диджлэ: 2009 гъэм Хэкум къэзгъэзэжауэ Налшык сыщопсэу. Тыркум дэрбзэру ательем сыщылэжьащ. Хэкум сыкъызэрыкIуэжрэ шхапIэм сыщолажьэ.
Си щхьэгъусэм къигъэзэжыну хуейти, сэри дэсIыгъащ. Мыбдеж щыIэ гъащIэмрэ дыкъыздикIыжам щекIуэкIымрэ зэщхьу жысIэфынукъым. Дызэмыса куэд долъагъу, ауэ зыдогъэзэгъ. Дыщысэуну дыщыхуейкIэ, нэгъуэщIу хъунукъым.
Хьэяти Аскэр: 2009 гъэм и япэ мазэхэм хэкум сыкъихьэжащ, Налшык сыщопсэу.
ГъущIым къыхэщIыкIа унэлъащIэхэр сщIыуэ сыщыпсэуащ Тыркум, мыбдежи ардыдэращ си IэщIагъэр.
Ди хэкужьым нэмыщI, сэркIэ нэгъуэщI хэку щыIэкъым. Лъэпкъыу дыпсэуну дыхуеймэ, адэжь щIыналъэм дисыжынращ хэкIыпIэр. Сыщыпсэунури сыщылIэнури си хэку ирехъу жысIэри, мис абы сытригъэгушхуащ.
Гугъуехьу дызыIууэхэм я гугъу пщIымэ, ди гъащIэ псом япэ щидгъэщ хэкум хамэу дызэрыщабжыр, тхылъкIэ хэкум и цIыхум дыхабжэным гугъуехь куэд зэрепхар дигу къоуэ.
КIущ Фикрэт: 1992 гъэм университетым сыщеджэну хэкум сыкъэкIуати, згъэзэжакъым, сыкъэнэжыпащ. Налшык сыщопсэу.
Япэу лэжьыгъэ сыщыпэрыхьари мыращ, си щхьэ сыхуолажьэ, сату Iуэхум сыхэтщ.
Си гугъамрэ зэрыхъумрэ зэщхьэщыкIами, зэманыр кIуэтэху сэри сесэурэ, сытыншыжащ. Дауэ мыхъуми, си хэку къызэрызгъэзэжам зэи сыхущIегъуэжакъым.

Зыгъэхьэзырар Хьэжбэвыкъуэхэ Эрдогъанрэ Гулрэщ.
Поделиться: