Тэрч гимнасткэхэр щIыналъэ зэпеуэм къыщыхожаныкI

ЩIышылэм и 12-17-хэм Осетие Ищхъэрэ-Аланием и къалащхьэм дэт «Манеж» спортым и уардэунэм щекIуэкIащ Ипщэ, Кавказ Ищхъэрэ федеральнэ щIыналъэхэм художественнэ гимнастикэмкIэ я зэхьэзэхуэ. Япэ спорт разрядымрэ спортым и мастерым и кандидатым и программэхэмкIэ щхьэзакъуэ, гуп зэпеуэхэм медалхэм щыщIэбэнащ Урысей Федерацэм и ипщэ щIыналъэм щыщ спортсмен 300-м щIигъу.
Къэбэрдей-Балъкъэрым художественнэ гимнастикэмкIэ и федерацэм и вице-президент Коротковэ Наталье хъыбар къызэрыдигъэщIамкIэ, ди республикэм щыщ спортсменхэм щIыналъэ зэхьэзэхуэм хъарзынэу зыкъыщагъэлъэгъуащ. Щхьэзакъуэ зэпеуэхэм Къэбэрдей-Балъкъэрым и командэ къыхэхам ещанэ увыпIэр щиубыдащ. Спортым и мастерым и кандидатхэм я программэм хыхьэ упражненэхэмкIэ домбеякъ медалыр зыIэрагъэхьащ Тэрч къалэ къикIа «Грация» командэм хэтхэм.
ЩIыналъэ зэхьэзэхуэм къыщагъэлъэгъуа зэфIэкI лъагэм ипкъ иткIэ «Грация»-р хэтынущ урысейпсо зэпеуэу гъатхэпэм Мэзкуу щекIуэкIынум. Спортсменхэр егъасэ Щомахуэ Зинаидэ.