Къэбэрдей-Балъкъэрым и ещанэ зэпеуэм

Къэбэрдей-Балъкъэр Республикэм и къэралыгъуэр илъэсищэ зэрырикъур зэрагъэлъапIэ Iуэхугъуэхэм хиу­быдэу «Налшык» спорт комплексым щекIуэкIащ сумомкIэ КъБР-м и ещанэ чемпионат.

Ди республикэм и дежкIэ сумор спорт лIэужьыгъуэщIэщ, ауэ жыджэру илъэс къэс зыужьыныгъэшхуэ егъуэт. ­КъБР-м и щIыналъэ псоми ­къикIауэ чемпионатым хэтащ спорт­смен 200-м щIигъу.
Зэхьэзэхуэр цIыху куэд щIэмысу екIуэкIащ, коронавирус уз зэрыцIалэм зрамыгъэубгъун папщIэ. ЗэуIуу пэшым щIэтар зы ныбжьым иту зэбэн спортсменхэрщ.
Зи хьэлъагъыр килограмм 77-м нэблагъэхэм я гупым медаль зэмылIэужьыгъуэу 3 къыщихьащ Дзэлыкъуэ районым хы­хьэ Малкэ къуажэм щыщ ­Хъуран Азэмэт. Мырзэкъан З., Нэчо С. сымэ я нэIэ щIэту алыдж-урым бэнэкIэм зыхуэзыгъасэ а щIалэм мурад ищIат спорт лIэужьыгъуэщIэм и къарур щигъэунэхуну икIи щы­уакъым. Илъэс 22-м нэблагъэ зи ныбжьхэм я гупым абы дыщэ медаль къыщихьащ, илъэс ­24-м нэсхэм я деж етIуанэ щыхъуащ, балигъхэм я зэхьэзэхуэм домбеякъ медалыр щызыIэригъэхьащ.
Къыщыхах зэпэщIэтыныгъэ­хэм къыщагъэлъэгъуа зэ­фIэкI­хэм япкъ иткIэ, Къэбэрдей-­Балъкъэрым и командэ къыхэхар зэхагъэуващ. ТекIуахэмрэ къы­хэжаныкIахэмрэ хэтынущ Урысей Федерацэм и чемпионатрэ и зэхьэзэхуэу 2022 гъэм Краснодар къалэм щекIуэкIынум.