Гъунэгъу республикэм и гулъытэ гуапэ

Дунейпсо Арт Комитетым и вице-президент, академик Бейтыгъуэн Iэуес зи пашэ гуп лэжьыгъэ IуэхукIэ Осетие Ипщэ Республикэм щыIащ.

Iэуес щIыналъэм и унафэщIхэм хъыбар зэраригъэщIам ­тету, лъэпкъ щэнхабзэмрэ гъуазджэмрэ хъумэным, абыхэм зегъэужьыным ехьэлIа лэжьыгъэшхуэ зэращIэм, апхуэдэуи Дунейпсо Арт комитетыр къызэрызэрагъэпэщрэ илъэс 30 ­зэ­рырикъум папщIэ, Осетие Ипщэ Республикэм и щIы- ­хьы­цIэхэр къыфIащащ КъБР-м щыщ цIыху зыбжанэм. Апхуэдэу а щIыналъэм щIыхь зиIэ и артисткэ хъуахэщ КъБР-м и къэрал Музыкэ театрым и солисткэхэу Мамбэт Мадинэрэ Мэз Джульеттэрэ, Шэшэн Республикэм уэрэдымрэ къафэмкIэ и «Нохчи» къэрал IуэрыIуатэ ансамблым и уэрэджыIакIуэ Парсановэ Таисэ, «Осетие Ипщэ Республикэм гъуазджэ­хэм-кIэ щIыхь  зиIэ и лэжьакIуэ» цIэ лъапIэр къыфIащащ адыгэ лъэпкъ къафэхэмкIэ «Шагъдий» цIыхубэ ансамблым и ху­дожест­веннэ унафэщI икIи и балетмейстер нэхъыщхьэ Унэжокъуэ Заремэ.
- И гулъытэм папщIэ фIыщIэшхуэ хузощI щIыналъэм и Iэ­тащ­хьэм. РеспубликэщIэм ехъулIэныгъэ иIэну, сыт и лъэныкъуэ­кIи зиужьыну, ефIэкIуэну си гуапэщ, - жеIэ Бейтыгъуэным.
Iэуес зи пашэ гупыр етIуанэ махуэм ирагъэблэгъащ Цхинвал къалэм дэт Осетие Ипщэ къэрал университетым и рек-­тор, педагогикэ щIэныгъэхэмкIэ кандидат, профессор Тедеев ­Вадим. Хэгъэрейр хьэщIэхэм гуапэу къаIущIащ. Абыхэм ­ирагъэлъэгъуащ университетыр, еджапIэ нэхъыщхьэм и профессор-егъэджакIуэ гупыр ирагъэцIыхуащ, СурэтыщI гъуазджэхэмкIэ музейм (ари университетым хэтщ), Лъахэхутэ, Зоологие музейхэм зыщрагъэплъыхьащ.
ЗэIущIэм и зы Iыхьэ гуапэу щытащ Дунейпсо Арт Ко­митетым и «Дыщэ пегас» дамыгъэ лъапIэр Бейтыгъуэным Тедеев Вадим зэрыритар. Ар IэщIагъэлIым хуагъэфэщащ ­дунейм щыпсэу лъэпкъхэр зэкъуэгъэувэным, зэгурыIуэу псэуным, къытщIэхъуэ щIэблэр дахагъэмрэ гуапагъэмрэ я­ ­гъуазэу къэгъэтэджыным папщIэ хузэфIэкIахэм пэкIуэу. И вузыр, абы щылажьэ егъэджакIуэхэмрэ щеджэ студентхэмрэ фIыуэ зылъагъу, профессиональнэ щIэныгъэ егъэгъуэ­тыныр зыхуей хуэзэу къызэзыгъэпэщыф унафэщIым и хэкур, и лъэпкъыр зыпищI щыIэкъым икIи псэкIэ къулей щIэблэ гъэ­сэнырщ абы и къалэн нэхъыщхьэ дыдэр зыхилъагъуэр.
1932 гъэм къызэIуаха, Тибилов А. А. и цIэр зезыхьэ Осетие Ипщэ къэрал университетыр, республикэм еджапIэ нэхъыщ­хьэу ит закъуэр, мы гъэм илъэс 90 ирокъу. Ар щагъэлъэпIэну махуэхэм хэтыну ирагъэблэгъащ Дунейпсо Арт Коми­тетым и лIыкIуэхэр.
- Ди гуапэу иджыри зэ дыкIуэнщ Осетие Ипщэм, университетым и махуэшхуэри абы и лэжьакIуэхэмрэ и еджакIуэхэмрэ ядэтIыгъынщ, дунейм тет лъэпкъхэр зэрызэкъуэтымрэ зэры­зэкъуэшымрэ и щыхьэту, - къыхигъэщащ и гуапэу Бейтыгъуэн Iэуес.

ИСТЭПАН Залинэ.
Поделиться: