Лъэпкъхэм я зэкъуэтыныгъэр зыгъэбыдэхэр

КъБР-м ЩэнхабзэмкIэ и фонд Вэрокъуэ Владимир и цIэр зезыхьэм литературэ пшыхь гуапэ щекIуэкIащ, чуваш лъэпкъым и тхыдэмрэ щэнхабзэмрэ теухуауэ. Зэхыхьэр къызэрагъэпэщащ «Нарспи» чуваш лъэпкъ щэнхабзэ центрым и жэрдэмкIэ. Абы ирагъэблэгъащ КъБР-м и цIыхубэ усакIуэ Беппаев МутIэлип, Чуваш Республикэм и цIыхубэ усакIуэ, уэрэд зыбжанэм я псалъэхэр зей, публицист, зэдзэкIакIуэ, литературэ саугъэт зыбжанэм я лауреат Тургаев Валерийрэ абы и ныбжьэгъу Зайцев Александррэ, ди щIыналъэм и лъэпкъ щэнхабзэ центрхэм я унафэщIхэр.
Пшыхьыр Урысейм и щэнхабзэ хъугъуэфIыгъуэхэм я илъэсым иращIэкI Iуэхухэм ящыщщ, ар хуэгъэзащ республикэм щыпсэу лъэпкъхэм яку дэлъ зэныбжьэгъугъэр гъэбыдэным.
Беппаев МутIэлип Дагъыстэным щекIуэкIа «Белые журавли» литературэ фестивалым Тургаевыр къызэрыщицIыхуам къытеувыIа нэужь, пшыхьым кърихьэлIахэр хигъэгъуэзащ Къэбэрдей-Балъкъэрым и тхакIуэхэмрэ усакIуэхэмрэ я Iэдакъэ къыщIэкIа тхыгъэхэр Тургаевым и лъэпкъэгъухэм къазэрыригъэцIыхуам, Кулиев Къайсын, нэгъуэщI усакIуэ куэдым я тхыгъэ щэ бжыгъэхэр чувашыбзэкIэ зэрызэридзэкIам. Апхуэдэу Беппаевым жиIащ Хэку зауэшхуэ зэманым Кулиевыр уIэгъэ хъуауэ Чебоксары къалэ сымаджэщым зэрыщIэлъар, абдежи усэ купщIафIэ куэд зэрыщитхар, Тургай Валерий и жэрдэмкIэ Чебоксары усакIуэм и фэеплъ пхъэбгъу зэрыщыхуагъэувар.
Республикэм и тхакIуэхэмрэ усакIуэхэмрэ зыгъэныбжьэгъу Тургаев Валерий и псалъэм къыхигъэщащ зэIущIэм къызэрырагъэблэгъар гуапэ зэрыщыхъуар, нэгъуэщI лъэпкъхэм щыщ усакIуэ Iэзэхэм я Iэдакъэ къыщIэкIахэр зэридзэкIыурэ литературэм зэфIэкI щызиIэ тхакIуэ куэд къызэрицIыхуар. Ар къеджащ Пушкин Александр, Кулиев Къайсын, нэгъуэщIхэм я усэу чувашыбзэм къригъэзэгъахэм щыщ. Зэхыхьэм абы щигъэлъэгъуащ Кавказ усакIуэхэм я антологие иджыблагъэ къыдигъэкIар.
     - Къэбэрдей-Балъкъэрыр, Налшык къалэр фIыуэ солъагъу икIи си щыпэ къакIуэкъым. Кулиев Къайсын къыщалъхуа щIыпIэр, Шэджэм къалэм дэт и фэеплъ унэ-музейм щахъумэ хьэпшыпхэр, Бахъсэн аузыр зэзгъэлъэгъуащ, - жиIащ Тургаев Валерэ. – Чуваш лъэпкъ центрыр къызэзыгъэпэщахэм, мы зэхыхьэ гуапэр зи жэрдэмхэм фIыщIэ фхуэфащэщ.
- Чебоксары дыкIуэри, Къайсын и фэеплъыр хуэсакъыу зыхъумэ чуваш лъэпкъ телъыджэр зэдгъэцIыхуащ, - игу къигъэкIыжащ Кулиев Къайсын и унэ-музейм и унафэщI Кулиевэ ФатIимэ. – А щIыналъэм къикI, лъэпкъхэм ди зэныбжьэгъугъэр нэхъри гъэбыдэным хуэщхьэпэ, пщIэ зыхуэтщI хьэщIэ лъапIэхэр къызэрытхуеблагъэр гуапэщ.
    «Днипро» украин лъэпкъ щэнхабзэ центрым и унафэщI Харенкэ Светланэ жиIащ щылажьэ библиотекэм чуваш тхакIуэхэмрэ усакIуэхэмрэ я Iэдакъэ къыщIэкIа, щIэупщIэ зиIэ тхылъ куэд зэрыщахъумэр. «Сябры» белорус центрым и унафэщI Сидорук Павел и псалъэм къыхигъэщащ чувашхэм щэнхабзэ къулей зэраIэр, абыхэм пыщIэныгъэ быдэ зэрыхуаIэр.
КъБР-м ЩэнхабзэмкIэ и фондым и унафэщI Макоевэ Люазэ Тургаевым тыгъэ хуищIащ Вэрокъуэ Владимир и тхылъ зыбжанэ. Апхуэдэу «Нарспи» центрым къыбгъэдэкIыу хьэщIэм саугъэту иратащ Налшык къалэм и дамыгъэр – ятIэ гъэжьам къыхэщIыкIа налыр.
Зэхыхьэр игъэдэхащ махуэшхуэхэм чуваш цIыхубзхэр зэрыхэт лъэпкъ фащэр щыгъыу абы къекIуэлIа Петровэ Алинэ.

ТЕКIУЖЬ Заретэ.
Поделиться: