Къэралым и чемпион Хьэсанэ Мурат

Урысей Федерацэм IэщэкIэ зэщIэузэда и къарухэм IэпщэрызауэмкIэ я чемпионат Ивановэ къалэм щекIуэкIащ. Ар хыхьащ УФ-м IэщэкIэ зэщIэузэда и къарухэм я спартакиадэм и программэм.

Къбэрдей-Балъкъэрым щыщ зауэлI Хьэсанэ Мурат шэч къызытумыхьэн текIуэныгъэ къыщихьащ IэпщэрызауэмкIэ чемпионатым.  Ди лъэпкъэгъум и щIыхьыр ихъумащ КъБР-м щыIэ къалэн щхьэхуэ зиIэ зэгухьэныгъэм. Ар и унафэм щIэтащ физическэ гъэхьэзырынымкIэ частым и командирым  и дэIэпыкъуэгъу майор Громов Владимир.

Хьэсанэм иригъэкIуэкIа зэIущIибгъум щыхигъэщIахэм ящыщщ Урысей Федерацэм IэщэкIэ зэщIэузэда и къарухэм я иджырей чемпион Кошкин Андрей. Зи хьэлъагъыр килограмм 85-м нэблагъэхэм я гупым къыщыпэлъэщын къызыхэмыкIа адыгэ щIалэр къэралым и чемпион хъуащ.

Мурат и спорт гъуэгуанэм къыщыщIидзащ къыщалъхуа къуажэм дэт «Псыгуэнсу» спорт клубым. Иджыпсту спортсменыр ягъасэ Мамхэгъ Хьэчимрэ Шыхъуэстэн Русланрэ.