Псом нэхъ шынагъуэу къалъытэ уэсукхъуэ псыIэр Iуащхьэмахуэ лъапэ къыщехыр иджы хуэдэ зэманырщ - мэлыжьыхьым и кум щыщIэдзауэ накъыгъэм и кIэм нэсыху.
- Уэсукхъуэ гъущэм зэраныгъэшхуэ къишэркъым, модрейм узэрыпэлъэщ щымыIэу и гъуэгупэм ит псори ириулъэпсыкIынущ икIи нэхъыбэу къызыдэхъейр накъыгъэм и уафэгъуагъуэ уэшхышхуэхэрщ. Апхуэдэ щIыпIэ шынагъуэу Iуащхьэмахуэ лъапэ 75-рэ иIэщ. Абы къызэщIеубыдэ гектар 700 - м щIигъу. А щIыпIэ гугъусыгъухэм уэсыр щызэтримыхьэн щхьэкIэ артиллериер къэдгъэсэбэпын хуей мэхъу, - жеIэ «Росгидромет» IуэхущIапIэм и Къэбэрдей - Балъкъэр дзэхуэIухуэщIэ службэм и унафэщI Чочаев Хъызыр.
Службэм и нэIэр сыт щыгъуи зытет щIыпIэхэм ящыщщ Нейтрино жылэм и Iэхэлъахэр, Бахъсэныпсым телъ лъэмыжым щыщIэдзауэ Азау и удзыпцIэ тафэм нэсыху.
Техникэр зыпэмылъэщ щIыпIэхэм иджырей Iэмалхэр къыщагъэсэбэп. Къапщтэмэ, Къэбэрдей - Балъкъэрым щыяпэу, Адыл - Су щаухуащ уэсукхъуэр зытезыIыгъэ «галерея». НэхъыфI дыдэу нобэ къалъытэ европей щапхъэм тет къэухь лъагэхэмкIэ къращIэкIащ Азау и удзыпцIэ щIыпIэхэри. ЗэманкIэ дызэIэбэкIыжмэ, пIалъэ пыухыкIам тету топкIэ хэуэурэ ар кърагъэхын хуей хъурт, апщIондэху гъуэгухэри зэхуащIырт, туристхэм гугъуехь щхьэхуэхэр къахудэкIуэу. Къэунэхуа а иджырей къэухьхэр ди къуршылъэ щIыпIэ куэдым щагъэувыну я мурадщ.
- Абы ахъшэшхуэ текIуэдэнущ, хэкIыпIэу щыIэри тIу къудейщ: мы гъэм и щIышылэм щыщIэдзауэ «Гидромет» IуэхущIапIэм и службэм ихъумэр езым пщIэкIэ зэгурыIуэныгъэ къезыщIылIа объектхэрщ. Псалъэм папщIэ, Урысейм и бгы – лыжэ къежэхыпIэхэм шынагъуэншагъэ псори къыщызэзыгъэпэщын хуейр ар зейуэ щыт организацэрщ. Абы хеубыдэ цIыхухэр, хьэщIэщхэр, шхапIэхэр, кIапсэ гъуэгухэр - къанэ щымыIэу и нэIэм щIэт псори. Службэр Iуэхум хыхьэну щыхуитыр дунейм и къэхъукъащIэ шынагъуэхэм пэщIэтын хуей щыхъурщ. АтIэ, къэнэжыр апхуэдэ щIыпIэхэр зыIыгъхэм зи гугъу тщIа IэмалыщIэхэмкIэ захъумэжынырщ е службэм зэгурыIуэныгъэ иращIылIэнырщ. Чочаевым къызэрыхигъэщамкIэ, илъэс псом зэгурыIуэныгъэм текIуэдэнур сом мини 120 -рэ хуэдизщ.
