Къумыкъу Мамдухь: Сэ сыкъэзышэжар Хэкум хузиIэ лъагъуныгъэрщКавказ зауэжьым и нэпкъыжьэ зытелъхэм ящыщщ Къумыкъу Мамдухь. Ар Сирием и КъунейтIрэ куейм хыхьэ Хъышней къуажэм къыщалъхуащ. Абы дэт курыт еджапIэр къиухри, Дамаск муслъымэн диным щыхурагъаджэ институтым, итIанэ университетым и щIэныгъэм щыхигъэхъуащ. Мамдухь егъэджакIуэу щылэжьащ хьэрып къэрал зыбжанэм, Дамаск щыIэ Адыгэ ФIыщIэ Хасэм и Iуэхухэми жыджэру хэтащ. Къумыкъу Мамдухь и тхыгъэхэр хьэрыпыбзэкIэ дунейм къыщытехьащ Дамаски Аммани. «Сыт псыхъуэ цIыкIум жиIэр» тхылъыр и анэдэлъхубзэкIэ адэжь щIыналъэм къыщыдэкIащ. Къумыкъур Сирием, Урысей Федерацэм я ТхакIуэхэм я союзхэм хэтщ. Адэм и псалъэ IущхэрЦIыхум гъащIэм щиубыдыну увыпIэр куэдкIэ елъытащ унагъуэм илъ зэхущытыкIэм, абы щигъуэт гъэсэныгъэм. Къумыкъу Мамдухь и сабиигъуэр и нэгу къыщыщIигъэхьэжкIэ жеIэ и адэ-анэм я лъагъуныгъэр зыхищIэу къызэрыхъуар. Зымыгъэунэхуам къыгурыIуэнукъым- Ди нэхъыжьхэм къаIуэтэжу куэдрэ зэхэсхат адэжь щIыналъэм теухуа хъыбархэр, - жеIэ Мамдухь. – Апхуэдизу абыхэм я нэ къызыхуикI Хэкур тлъагъуныр дэри ди хъуэпсапIэ хъуат. ИужькIэ зэман дэкIауэ, а хъуэпсапIэр щызэзгъэхъулIам, сызэригугъамрэ Хэкум си нэгу щыщIэкIымрэ куэдкIэ зэщхьэщыкIырт. ИхъуреягъкIэ слъагъур пщIыхьэпIэу къысщыхъурт. Хабзэ къыткIэлъызэрахьэу дагъэхьэщIащ, щIыналъэм зыщыдагъэплъыхьащ. Iуащхьэмахуэ лъапэ щытлъэгъуа дахагъэм хуэдэ нэгъуэщI щIыпIэ щыIэу фIэщщIыгъуейт. Абы щыгъуэм си нэгу щIэкIахэр си гъащIэ псокIэ гукъинэж сщыхъуащ. Тхыдэм зыщIритарХэхэс адыгэхэр лъэпкъ щэнхабзэм, IуэрыIуатэм, литературэм хигъэгъуэзэнымкIэ Къумыкъу Мамдухь лэжьыгъэшхуэ зэфIигъэкIащ. Абы хьэрыпыбзэкIэ зэридзэкIыурэ Дамаск къыщыдигъэкIащ къэбэрдей тхакIуэхэм я тхыгъэхэр. Апхуэдэхэщ, псалъэм папщIэ, КIыщокъуэ Алим и роман цIэрыIуэхэр, IутIыж Борис и «Тыргъэтауэ» драмэр, нарт хъыбархэр, нэгъуэщIхэри. Абыхэм къищынэмыщIауэ, Мамдухь езыми рассказ гъэщIэгъуэнхэр итхауэ и анэдэлъхубзэкIэ дунейм къытригъэхьащ. ГъащIэ гупсысэДэтхэнэ зыми гъащIэм езым и еплъыкIэ иIэжщ. Ар елъытащ и гупсысэкIэм, и цIыху щIыкIэм. Ныбжьыр кIуэтэхукIи гъащIэм дерс гуэр къыхыбох. КъикIуа гъуэгуанэм щриплъэжкIэ, Мамдухь къыхегъэщ гъащIэм цIыхугъэр нэхъыщхьэу къызэрыщилъытэр. Жьэгу пащхьэм щытепщэрУнагъуэ дахи и щIыбагъ къыдэтщ Къумыкъу Мамдухь. Хабзэмрэ нэмысымрэщ Къумыкъухэ я жьэгу пащхьэм щытепщэр. ЗэгурыIуэрэ пщIэрэ зяку дэлъ зэщхьэгъусэхэм я бынхэми гъэсэныгъэ тэмэм иратащ. ХъыджэбзитIрэ зы щIалэрэ яIэщи, псоми щIэныгъэ, IэщIагъэ ирагъэгъуэтащ, гъащIэм лъэ быдэкIэ хагъэуващ. Нэхъыжьхэр я щIэблэм я ехъулIэныгъэм щыгуфIыкIыу, нэхъыщIэхэри зи жьауэм щIэтхэр я гъуазэу мэпсэу.
Поделиться:
Читать также:
19.04.2024 - 16:36 →
Зыкъамыту хэкIуэдащ
19.04.2024 - 16:26 →
Щыуагъэм щахъумэу
19.04.2024 - 15:46 →
Дэчыхыныгъэм кърикIуар
19.04.2024 - 12:55 →
Мыщэ хужьхэр гугъу езыгъэхьыр
19.04.2024 - 12:41 →
ТекIуэныгъэм и диктантым къэрал 50-м щIигъу хэтынущ
|