ЗэгурыIуэныгъэхэр зэращIылIэ

КъБР-м экономикэ зыужьыныгъэмкIэ и министр Рахаев Борис иджыблагъэ яIущIащ Пермь къалэм дэт, Прянишников Дмитрий и цIэр зезыхьэ мэкъумэш-технологие университетым и лIыкIуэхэм.
Университетым и ректор Андреев Алексейрэ абы и къуэдзэ Оборин Матвейрэ Къэбэрдей-Балъкъэрым лэжьыгъэ IуэхукIэ къэкIуауэ махуэ зыбжанэ лъандэрэ щыIэщ. ХьэщIэхэм я мурадщ щIэныгъэм и мызакъуэу, мэкъумэш промышленностымкIэ, экономикэмкIэ, щIэныгъэмкIэ Къэбэрдей-Балъкъэрым зэгурыIуэныгъэхэр къращIылIэну, иджыри къыздэсым щIыналъитIым я зэхуаку илъа зэпыщIэныгъэхэр къагъэщIэрэщIэжыну.
Пермь къикIа хьэщIэхэм хэтащ «Егъэджэныгъэ технологиещIэхэр щIыналъэхэм щIэныгъэ IэнатIэм зыщезыгъэужь Iэмалщ» зыфIаща щIэнIуатэм. Пермь къалэм дэт мэкъумэш-технологие университетым и ректор Андреев Алексейрэ КъБКъУ-м и ректорым и къалэнхэр зыгъэзащIэ Алътуд Юрэрэ егъэджэныгъэ икIи щIэныгъэ-техникэ IэнатIэхэм зэрыщызэдэлэжьэнум теухуа зэгурыIуэныгъэ зэращIылIащ. Абы ипкъ иткIэ университетитIыр я егъэджакIуэхэмкIэ зэхъуажэурэ лэжьэнущ, методикэ зэмылIэужьыгъуэхэмкIэ зыр адрейм щIэгъэкъуэн хуэхъунущ, зэрырагъаджэ программэхэр зэщIыгъуу ягъэхьэзырынущ, щIэныгъэлI ныбжьыщIэхэм я зэфIэкIыр лабораториехэм, лъэщапIэхэм, къэхутакIуэ центрхэм щагъэунэхунущ, лъэпкъ проектхэмрэ къэхутэныгъэхэмрэ зэгъусэу ирагъэк1уэк1ынущ.
Пермь дэт университетыр унэтIыныгъэ куэд зи1э IуэхущIапIэщ, къудамиблу зэхэтщ, цIыху мини 6-м щIигъу щоджэ. Университетым хэт бакалавриатыр, специалитетыр, магистратурэр программэ 60-м нэблагъэкIэ щIалэгъуалэм ядолажьэ, IэщIагъэ ярет.
Пермь къэрал университетыр дунейм къыщащIэ хамэ къэрал университетхэм япыщIащ, зэрыригъаджэ программэхэр щIыпIэ куэдым къыщагъэсэбэп, дунейпсо мыхьэнэ зиIэ щIэныгъэ зэхуэсхэм хохьэ, щIэнIуатэхэмрэ Iэнэ хъурейхэмрэ щIэх-щIэхыурэ къызэрегъэпэщ. Пермь университетыр экономикэмрэ егъэджэныгъэмрэ я мэкъумэш IэнатIэм щынэхъ лъэрызехьэ дыдэхэм ящыщу къалъытэ.
КъБР-м экономикэ зыужьыныгъэмкIэ и министр Рахаев Борис къызэрыхигъэщамкIэ, ди щIыналъэм ифI хэлъщ Пермь хэгъэгуми абы ит университетхэми зэгурыIуэныгъэхэр ярищIылIэным икIи ядэлэжьэным. «Лъэныкъуэ куэдкIэ зэдрагъэкIуэкI лэжьыгъэм щIыналъитIми тегъэщIапIэфI 2003 гъэм хуащIауэ щытыгъащ. Иджы сату-экономикэ, щIэныгъэ-техникэ, щэнхабзэ зэпыщIэныгъэхэм щIэуэ нэгъуэщI унэтIыныгъэхэр къыхохьэри, ар узыщыгуфIыкIын Iуэхугъуэщ», – къыхигъэщащ министрым.

ЩХЬЭЩЭХУЖ Инал.
Поделиться: