Иджыпсту щыщIэдзауэ пэщIэтыпхъэщ.

Урысейм и щIэныгъэлIхэр егъэпIейтей щIыуэпс къабзагъэр щытепщэ Кавказыр губгъуэжыхапхъэм зэрызэщIищтэм.

Абы и къежьапIэр хэти дуней щытыкIэ зызыхъуэжым, хэти уэлбанэ кIыхьхэм хуахь.

СыткIи нэхъ псынщIэу зэрызиужьыным зи лъэдий быдэхэр хуэщIа къэкIыгъэ гъэщIэгъуэныщэр япэу къыздикIар Америкэ Ищхъэрэ континентырщ, ауэ абы щыпсэухэр амброзием зыкIи гугъу дехьыркъым -  а щIыпIэм щыIэщ щыщ къыхэмынэу ар зышх цIыв лIэужьыгъуэ.

Европей щIэныгъэлIхэм ар къагъэсэбэпынуи траухуат, арщхьэкIэ губгъуэжыхапхъэр шхын иуха нэужь, цIывыр хадэхэкIхэми зэрынэсынур къалъытэри, Iуэхур зэрагъэтIылъэкIыжащ.

Къэбэрдей - Балъкъэрым бгылъэ щIыпIэхэм я экологиер хъумэнымкIэ институтри а Iуэхум иужь ихьауэ щытащ, уеблэмэ а цIыв цIыкIури ди нэкIэ дагъэлъэгъуат…

ЩIэныгъэлIхэм абы зэрыпэщIэтыну Iэмалхэр къагупсысыху езы удзым щIыналъэр зэщIещтэ.

Псалъэм папщIэ, зэманкIэ дызэIэбэкIыжмэ, губгъуэжыхапхъэм Iуащхьэмахуэ лъапэ ущрихьэлIэу щытакъым.  Иджы щытыкIэм зихъуэжащ - къуршылъэхэми нэсащ ар. ЗэкIэ мы къэкIыгъэр зэмызэгъхэм зэрыхузэфIэкIкIэ абы зыщахъумэнырщ.

Гъатхэм губгъуэжыхапхъэр адрей удз ежьужьхэм я гъусэу къэпхын щIэбдзэмэ, гъэ псом тхуэней - хэнейрэ мынэхъ мащIэрэ Iуэхур къехьэлIэн хуей хъунущ, арыншамэ, зыIэзыбжьэм укIэщIэмыхьэу зеубгъу.

Иджыпсту Iуэхум ткIийуэ кIэлъоплъ УФ - м и «Россельхознадзор» IуэхущIапIэм и Кавказ Ищхъэрэ къудамэр.  Абы и къэпщытакIуэхэм хъыбар къызэратамкIэ, псом хуэмыдэу гъавэщIапIэхэр щIапщытыкIынущ икIи ар зи хьэсапкъэ щыбагъуэхэм етхьэкъунущ.

Нэгъабэ гъавэ къехьэлIэжыгъуэм Къэрэшей - Шэрджэсым и щIыпIэ зыбжанэм къабзагъэ мардэхэр къыщызэпыуда хъуащ, жылагъуэу 10 - м а удзыр гъэкIуэдыным ехьэлIа зы лэжьыгъэ щрамыгъэкIуэкIауэ къыщIэкIащ икIи абыхэм ятеухуа административнэ Iуэхуу 40 - м нэс къаIэтащ. Мы гъэми Кавказым и щIыналъэ псоми къэпщытэныгъэхэм щыпащэнущ. Абы къежьапIэ хуэхъуар  Осетие  Ищхъэрэ - Аланием и мэкъумэш IуэхущIапIэхэм ящыщ зым губгъуэжыхапхъэм и жылэр хэзу зыхэлъ нартыху гъэлъэлъауэ тонн 24 - рэ зэрищарщ. Ар псынщIэ дыдэу зэхагъэкIри, етхьэкъуащ, ауэ жылэм ищIэнур ищIэнущ, ди жагъуэ зэрыхъунщи.

«Россельхознадзор» IуэхущIапIэм и лэжьакIуэхэр пэджэжынущ  мы удзым я закъуэу пэмылъэщ цIыхухэм я дэтхэнэ зы лъэIуми, хъыбар ирагъащIэ къудеймэ.

Губгъуэжыхапхъэр щыбэгъуа щIыпIэхэм гербицидхэр къыщыбгъэсэбэп хъуну къэзылъытэхэм ящIапхъэщ жылагъуэхэм, Iэщ хъупIэхэм, зыгъэпсэхупIэхэм ахэр жыжьэуи епхьэлIэ зэрымыхъунур. ЩIэныгъэлIхэм псом нэхъыфIу къалъытар гугъуэжыхапхъэр уэру къыщыкI щIыпIэхэм абы зезымыгъэужь удз лIэужьыгъуэхэр щыхэсэнырщ. Iэщ фермэхэм я Iэгъуэблагъэхэм, мэкъупIэхэм, хъупIэхэм щыхэпсэну хъарзынэщ джэшхэкIхэр, хьэцэпэцэр, тхьэкIищыр ( люцернэр), бажэкIэр. Ахэр зы илъэс - илъэситIым Iуву зэщIокIэри губгъуэжыхапхъэр дунейм къытрагъэхьэркъым.