Хэт къэкIуэнур зыунэтIыр?

  ФIэщхъуныгъэ зыхэлъ  дэтхэнэми жиIэнщ: дауи, ди Щхьэщыгу Итырщ. АрщхьэкIэ абы цIыхур къигъэщIащ зыхуейр ищIэу дунейм тетыну, жэуап щихьынур иужькIэщ. А «иужьым» емыгупсысыр мащIэкъым. Аращ залымыгъэри. хъунщIэн-фыщIэнри, кIэщIу жыпIэмэ, щIэпхъаджагъэ псори къызыхэкIыр. Уеблэмэ зыгуэрхэр хуожьэ цIыхум и гъащIэри, абы и къэкIуэнури зарахъуэкIыну.

 Апхуэдэщ, псалъэм и хьэтыркIэ, Аттали Жак. Нобэ зи гугъу фхуэтщI а цIыхур зэфIэкIышхуэ зыбгъэдэлъ икIи гъуэгуанэшхуэ къэзыкIуа политикщ.. Миттеран Франсуа и деж къыщыщIэдзауэ Франджым и президент псоми я чэнджэщэгъуу щытащ. Абы и гуащIэкIэ властым и щыгум дэкIуеящ иджырей президент Макрон Эммануэль. Аттали икIи финансист, литератор, философ  цIэрыIуэщ. Сыт щыгъуи хущIокъу ди къэкIуэнур зыхуэдэнур дигъэлъэгъуну. Абы жиIэхэр шынагъуэщ.

 Жыжьэ хъуа 1981 гъэм Жак «ГъащIэм и къэкIуэнур» тхылъым къыщигъэлъэгъуащ, илъэс тIощIрэ пщIырэ дэкIмэ, дунейм и тепщэхэм ЩIым щыпсэухэм я бжыгъэр хуабжьу ягъэмэщIэну. Апхуэдэ мурадкIэ къагупсысынущ «пандемие гуэр». ИужькIэ къэнэжынур зы мелардщ…

Аттали итхащ: «Ди къэкIуэнур пыщIащ цIыхухэм я бжыгъэр зэрыдгъэмэщIэну Iэмалыр къэлъыхъуэным. Жьы хъуахэм я деж къыщыщIыдодзэ - зи ныбжьыр илъэс 60-65-м щIигъуахэр жыпIэ хъунущ пщIэншэрышхэу. Жылагъуэм абыхэм мылъкушхуэ ятрегъэкIуадэ. ЯкIэлъыкIуэнущ лъэрымыхьхэр, итIанэ сэбэпыншэхэр, псом хуэмыдэу ахьмакъхэр. Ди эвтаназиер (цIыху гъэлIэныр) псом япэу зыхуэгъэзауэ щытынур апхуэдэ гупхэрщ».

 Жак ар  захуагъэу къелъытэ. Езыр, дауи, ягъэлIэнухэм я бжыгъэм хэткъым. ИпэкIэ зэрыжытIащи, ар гъащIэм нэхъ щехъулIэ дыдэхэм ящыщщ. I99I гъэм и Iэтащхьэ хъуащ ЕфIэкIуэныгъэмрэ зыужьыныгъэмкIэ европей банк къызэIуахам. И къекIуэкIыкIам IэпапIэ фIыцIэхэри хэтщ: газетхэм ятхауэ щытащ абы и япэ мелуанипщIхэр Анголэм хабзэншагъэкIэ Iэщэ щищэурэ зэригъэпэщауэ. Ауэ, зэрыжаIэщи, ахъшэхэм мэ ящыуркъым. Къэхъея къаугъэр Жак псынщIэу щIиуфэжыфащ.

 Езым къигупсыса пщалъэм ипкъ иткIэ, жылагъуэр фIэкIыпIэ имыIэу къулей, къулейсыз гуэшыкIэм хуэкIуэн хуейщ. Аттали сыт щыгъуи къилъытэрт дэтхэнэми Iэрыхьэн хуейр и акъылрэ и зэфIэкIкIэ къиугъуеяр арауэ. Ахэр ехъулIэнущ, щхьэхынэхэмрэ акъылыншэхэмрэ тхьэмыщкIэнущ.

Аттали дунейпсо цIыхубэм и къэкIуэнур биороботизацэм быдэу ирепх. НэгъуэщIу жыпIэмэ, цIыхум и зэхуэдитIыр щытынущ… роботу.

 Ауэ ар цIыхуж? Гуапагъэ, хьэлэлыгъэ, гущIэгъу зыхэмылъым, лъагъуныгъи гуапагъи зыхэзымыщIэм, Iыхьлыи благъи зимыIэм дауэ цIыхукIэ узэреджэнур?

ЖытIэнщи, Жак и гупсысэкIэм куэдкIэ къытохуэ КъухьэпIэм щыцIэрыIуэ нэгъуэщIи -Дунейпсо экономикэ форумым и президент Шваб Клаус.  Абы и закъуэуи къыщIэкIынукъым. Ар шынагъуэщ.

Мыбдежым фIэкIыпIэ имыIэу уогупсыс: ди гъащIэм  шэмэдж иIыгъыу ирикIуа, иджыри мыувыIэжа коронавирус емынэунэр зыгуэрхэм ямыIэужьу пIэрэ?  Ар  апхуэдэу къэзылъытэ еджагъэшхуэхэр щыIэщ.

 Аттали сымэ сытри къуащIэфынущ…